Հոկտեմբերի 10-ին ԵՊՀ հայ բանասիրության ֆակուլտետի դահլիճում կայացավ Ռազմիկ Դավոյանի գրական գործունեության մասին պատմող գիտաժողով` նվիրված անվանի բանաստեղծի ծննդյան 85-ամյակին։

Ժամանակակիցները հիշեցին ու արժևորեցին բանաստեղծի անցած գրական ուղին և կարևորեցին նրա թողած հարուստ ժառանգությունը։

Միջոցառումը կազմակերպվել էր Համազգային հայ կրթական և մշակութային միության Երևանի գրասենյակի նախաձեռնությամբ և ԵՊՀ Հայ բանասիրության ֆակուլտետի հետ համագործակցությամբ։

Համազգայինի Երևանի գրասնյակի տնօրեն Ռուզան Առաքելյանի խոսքով՝ գիտաժողովը առիթ է ևս մեկ անգամ նշանավորելու Ռազմիկ Դավոյանի գրական վաստակը, քանզի, ինչպես նշեց Ռ. Առաքելյանը, հայ գրականության տաղանդավոր բանաստեղծ Ռազմիկ Դավոյանն իր ստեղծագործություններով կամրջեց անցյալն ու ներկան` բացելով հավիտենականություն տանող դուռը։ «Տարիների ընթացքում նա իր ներկայությամբ կարողացավ բովանդակել այն միջավայրը, որում գտնվեց։ Նա ղեկավարեց գրողների միությունը, եղավ Հայաստանի նախագահի խորհրդական, Համազգայինի Երևանի գրասենյակի հիմնադիր անդամ, ակտիվ գործունեություն ունեցավ հասարակական, քաղաքական կյանքում։

Քանի՜ սերունդ ապրեց նրա պատգամներով և դեռ քանի՜ սերունդներ նրա ստեղծագործություններով պիտի հաղորդակցվեն բարձրարժեք գեղարվեստին, ապրեն մարդկային այն հոգեվիճակները, որ Դավոյան բանաստեղծը հանճարի ուժով փոխանցել է մեզ»,- ասել է Ռուզան Առաքելյանը։

Համազգայինի Կենտրոնական վարչության անդամ Արտաշես Շահբազյանն էլ իր խոսքում նշեց. «Նա շատ բուռն մտավ պոեզիայի աշխարհ, շատ երիտասարդ էր, երբ արդեն նրան դիտում էին որպես կայացած բանաստեղծ։ Մեծ երևույթներից երևի պետք է փոքր֊ինչ հեռանալ, որպեսզի կարողանաս գնահատել նրանց իրական մեծությունը։ Կարծում եմ` Դավոյանը ոչ միայն մնալու է, Դավոյանը դեռ մեծանալու է և գուցե հիմա դեռ ամբողջապես բացահայտված և ճանաչված չէ։ Այս գիտաժողովը Դավոյանին գիտական մակարդակով արժևորելու փորձ է, որն արդեն իսկ գնահատական է»։

Համաժողովին ելույթի խոսքով հանդես եկան նաև ԵՊՀ հայ բանասիրության ֆակուլտետի դեկան Արշալույս Գալստյանը, Լոնդոնի համալսարանի լեզվաբանության դոկտոր, Ռազմիկ Դավոյանի տիկին Արմինե Թամրազյան-Դավոյանը, պ.գ.դ., պրոֆեսոր Դավիթ Գասպարյանը, արվեստագիտության դոկտոր, պրոֆեսոր Աննա Ասատրյանը, բ.գ.դ., պրոֆեսոր Սուրեն Աբրահամյանը, բ.գ.դ., պրոֆեսոր Սոկրատ Խանյանը, բ.գ.դ., դոցենտ Կարինե Մարտիրոսյանը, արվեստագիտության թեկնածու, դոցենտ Անուշ Ասլիբեկյանը, գրականագետ Քնարիկ Աբրահամյանը։

Գիտաժողովին ներկա էին Ռազմիկ Դավոյանի գրական, կուսակցական ընկերները, ուսանողներ, գրականագետներ, նրա գրականությունը սիրող ու գնահատող մարդիկ։

Համազգայինի Երևանի գրասենյակ