«ԱԼԻՔ», Կ. Դ. – Հոկտեմբերի 28-ի երեկոյեան, «Արարատ» մարզաւանի «Վաչիկ Ղարաբէգեան» սրահում, տեղի ունեցաւ Հ.Մ.Ա.Կ.-ի 31-րդ Պատգամաւորական ժողովի պաշտօնական բացումը:

Սկզբում, Հ.Մ.Ա.Կ.-ի Սկաուտական միութեան դրօշակագարդի միջոցով կազմակերպութեան դրօշը տեղադրւեց սրահում եւ Հ.Մ.Ա.Կ.-ի «Արարատ» եւ Հ.Հ.Մ.Ը.-ի «Տաւիղ» համատեղ երգչախումբը Արփի Սիմրոջեան (Նազարեան)-ի ղեկավարութեամբ հնչեցրեց կազմակերպութեան հիմնը։

Հ.Մ.Ա.Կ.-ի շրջանավարտ վարչութեան նախագահ Սոֆի Ջաղարբէգեանը ողջունելով ներկաներին ամփոփ գծերով անդրադարձաւ շրջանաւարտ վարչութեան 29-ամսեայ գործունէութեանը: Նա իր շնորհակալութիւնը յայտնեց բոլոր նրանց, ովքեր 29-ամսեայ ժամանակաշրջանում, չեն խնայել իրենց աջակցութիւնը եւ կարելին յանուն «Արարատ»-ի:

Ժողովի որպէս ժամանակաւոր դիւան ընտրւեցին ժողովին մասնակից երիցագոյն եւ կրտսերագոյն անդամներ՝ Համլետ Խալոյեանը եւ Մարիամ Էլիասզադէն եւ մասնակիցների մանադատների վաւերականութիւնը հաստատելուց յետոյ, ընտրւեց ժողովի մնայուն դիւանը՝ Համլետ Խալոյեան, Ալեքս Կարապետեան եւ Արա Ջահանեան, որոնք ընթացող օրերի ընթացքում ղեկավարելու են նիստերը:

Կազմակերպութեան շրջանաւարտ վարչութեան անունից Արտոյտ Զոհրաբեանը ներկայացրեց վարչութեան 29-ամսեայ գործունէութեան ամփոփ տեղեկագիրը: Ապա ցուցադրւեց կազմակերպութեան տարբեր միաւորների աշխատանքների մասին պատմող տեսաֆիլմ:

Իրենց խօսքերը փոխանցելու համար ամբիոնի մօտ հրաւիրւեցին Համազգային Հայ կրթական եւ մշակութային միութեան Կենտրոնական վարչութեան անդամ՝ Հայաստանից ժամանած Արտաշէս Շահբազեանը, «ԱԼԻՔ» հաստատութեան ներկայացուցիչ, «ԱԼԻՔ» օրաթերթի գլխաւոր խմբագիր Արամ Շահնազարեանը:

Խօսքերը եզրափակւեց Թեհրանի հայոց թեմի առաջնորդ Տ. Սեպուհ արք. Սարգսեանի օգնական Տ. Առաքել աբեղայ Գատեհճեանի օրհնութեան ելոյթով:

Միջոցառմանը ներկայ էին՝ ՀՅԴ Բիւրոյի անդամ Սեւան Դանիէլեանը, Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը, «ԱԼԻՔ» հաստատութեան ներկայացուցիչները, Թ. Հ. Թ. Թեմական խորհրդի ատենապետ Վարուժ Յովհաննիսեանը, քոյր միութիւնների ներկայացուցիչները եւ միութենականները։