Տեղի է ունեցել Խաչիկ Տեր-Ղուկասյանի «Սահմանելի» խորագրով անդրանիկ գրքի շնորհանդեսը
09 Նոյեմբեր 2025
Համազգային հայ կրթական և մշակութային միության Երևանի գրասենյակում նոյեմբերի 7-ին տեղի ունեցավ սփյուռքահայ գրող Խաչիկ Տեր- Ղուկասյանի «Սահմանելի» խորագրով անդրանիկ գրքի շնորհանդեսը։
Սույն ժողովածուն ընդգրկում է հեղինակի տարբեր տարիների գրած բանաստեղծությունները։ Հոգու խռովք, լռություն, կյանքի ու սիրո խոհափիլիսոփայական ընկալումներ, պատերազմ ու ապրելու տենչ. այս ամենը դառնում են բառ ու տող և ընթերցողին ծանոթացնում ժամանակակից գրականության մեջ մի նոր անվան հետ։
Խաչիկ Տեր-Ղուկասյանն իր առաջին գրքով վստահ, ինքնուրույն քայլով է մտնում բանաստեղծական աշխարհ, և գիրքը, որը նրա երախայրիքն է, խոստանում է ունենալ շարունակություն…
Շնորհանդեսին ներկա էին Համազգայինի և ՀՅԴ մեծ ընտանիքի անդամներ, գրականագետներ, գրողներ, գրքասերներ։ Ներկա էին ՀՅԴ Բյուրոյի անդամ Լիլիթ Գալստյանը եւ ՀՅԴ Հայաստանի Գերագույն Մարմնի անդամ Գեղամ Մանուկյանը։
Բացման ու շնորհավորանքի խոսքով հանդես եկավ Համազգայինի Երևանի գրասենյակի տնօրեն Ռուզան Առաքելյանը` իր խոսքում անդրադառնալով մեր օրերում սփյուռքահայ գրականության դերին և նշանակությանը, ինչպես նաև` հայ գրողի առաքելությանը ճակատագրական պահերին հայրենիքին ծառայելու եւ ազգային արժեքների սերմանման գործում։
Միջոցառման բանախոսն էր գրող, գրականագետ Արթուր Անդրանիկյանը, ով իր խոսքում ներկայացրեց Տեր-Ղուկասյանի բանաստեղծական լեզուն, խոսքի վարպետությունն ու բանաստեղծական մշակույթը` այն գնահատելով ինքնեղ, համարձակ ու ժամանակի շնչին համընթաց։
Շնորհանդեսը շարունակվեց գրողի հետ զրույցով, որը վարում էր «Տորոնտոհայ» ամսագրի խմբագիր Ռուբեն Ջանբազյանը։ Զրույցի ընթացքում ներկաները հնարավորություն ունեցան բացահայտելու բանաստեղծի խորունկ աշխարհը, նրա ընկալումները բառ ու բանի շուրջ, հոգեհարազատ թեմաներն ու գրական ազդեցությունները, ինչպես նաև`նրա մտորումները Սփյուռքում ու Հայրենիքում ստեղծվող ժամանակակից գրականության խնդիրների շուրջ։
Համազգայինի Կենտրոնական վարչության անունից խոսք ասաց ԿՎ անդամ Արտաշես Շահբազյանը։ «Պոեզիան հոգու կենսագրություն է։ Խաչիկ Տեր- Ղուկասյանի պոեզիայի հերոսը աշխարհի թոհուբոհի մեջ մի կողմ քաշված ու տարակուսանքով աշխարհի անցուդարձին և վայրիվերումներին նայող մարդն է։ Նրա բանաստեղծությունները խոսուն ու պատկերավոր պատմություններ են` իրենց մեջ ամփոփելով նովելային արձակի շատ ու շատ տարրեր։ Սա բանաստեղծական կարևոր հմտություն է»,- նշեց նա։
Շնորհանդեսին սրտի խոսք ասացին Լիլիթ Գալստյանը, Համահայկական գրողների միության նախագահ Աբգար Ափինյանը, Խաչիկ Տեր-Ղուկասյանի ճեմարանական ընկերները։
Վերջում հեղինակը «Սահմանելի» խորագրով գիրքը՝ իր մակագրությամբ, նվիրեց ներկաներին` խոստանալով շարունակություն և նոր գրական հանդիպումներ։
