Մենք անսասան կը մնանք մեր ազգային օրակարգին մէջ
06 Հունվար 2026 Ընկերական ԶրոյցՆՈՐ ՏԱՐՈՒԱՆ ԵՒ ՍՈՒՐԲ ԾՆՆԴԵԱՆ ՈՒՂԵՐՁ
Մինչ կը դիմաւորենք Նոր տարին եւ կը տօնենք Սուրբ Ծնունդը, մեր ամէնէն ջերմ բարեմաղթութիւնները կը փոխանցեմ ձեզի, ձեր ընտանիքներուն եւ մեր ամբողջ համայնքին՝ մաղթելով յաջող տարի մը, լեցուն առողջութեամբ, յոյսով եւ Հայ Դատի հանդէպ մեր միասնական յանձնառութեան վերանորոգուած նուիրումով։
2026 տարին կը սկսինք մեր պատմութեան վճռորոշ պահուն մէջ, որ կը պահանջէ միասնութիւն, անսասան կամք եւ քաջ ու սկզբունքային գործողութիւն։ Այս տարին ժամանակն է բոլորս միասին գործելու՝ նպատակի յստակ գիտակցութեամբ, ամրապնդելու մեզ միաւորող կապերը եւ վճռականութեամբ պաշտպանելու մեր ժողովուրդին իրաւունքները եւ ապագան։
Պատմութիւնը մեզի ցոյց տուած է, որ երբ միացեալ ենք եւ կ՛առաջնորդուինք ընդհանուր տեսլականով՝ ո՛չ մէկ մարտահրաւէր եւ ո՛չ մէկ արգելք անյաղթահարելի է։ Միասին կրնանք կերտել հայ ազգին համար աւելի լուսաւոր, աւելի հզօր եւ աւելի դիմակայուն ապագայ մը։
Մենք անսասան կը մնանք մեր ազգային օրակարգին մէջ՝
– Արդար եւ մնայուն խաղաղութիւն, հիմնուած հայ ժողովուրդի անքակտելի իրաւունքին՝ ազատ եւ ապահով ապրելու իր պատմական հայրենիքին մէջ, ներառեալ Արցախի եւ Արեւմտեան Հայաստանի, որոնք բռնագրաւուած են Ատրպէյճանի եւ Թուրքիոյ կողմէ՝ ուժի գործադրումով, ցեղասպանութիւններով, ցեղային զտումներով եւ շարունակուող յարձակողականութեամբ։
– Իրապէս ժողովրդավար հայկական պետութիւն մը, ուր ընդդիմադիր ձայները չեն հալածուիր, անկախ մամուլը ազատ է, եւ որեւէ հաստատութիւն, ներառեալ Հայ եկեղեցին, թիրախ չեն դառնար կամ չեն լռեցուիր բռնապետական իշխանութեան կողմէ։
– Առաջնորդութիւն մը, որ ազգային շահերը, հայկական ինքնութիւնը եւ երկարաժամկէտ պետականութիւնը կը դասէ անձնական շահերէն, քաղաքական գոյատեւումէն կամ ցեղասպան եւ բացայայտ թշնամական վարչակարգերու հետ գործընկերութիւններէն վեր։
– Արեւմտեան երկիրներու կառավարութիւններէն յստակ եւ սկզբունքային քայլեր, որոնց ազատութեան եւ արդարութեան հռչակուած նուիրուածութիւնը պէտք է վերածուի Հայաստանի նկատմամբ գործնական աջակցութեան, այլ ոչ թէ մարդու իրաւունքներ խախտողներու հանդէպ զիջումներու՝ առեւտրական ուղիներու, աշխարհաքաղաքական գործարքներու կամ ուժանիւթի շահերու համար։
– Եւ Պաքուի մէջ անօրէն կերպով պահուող բոլոր հայ ռազմագերիներու եւ քաղաքացի պատանդներու անմիջական եւ անվերապահ ազատ արձակում, որոնց շարունակուող գերութիւնը միջազգային իրաւունքի կոպիտ խախտում է։
Այս ազգային օրակարգին ուղղութեամբ արդիւնաւէտ աշխատանքը կը պահանջէ Հայաստանի մէջ արմատական քաղաքական փոփոխութիւն։ Վարչակարգի փոփոխութիւնը միայն կառավարման հարց չէ, այլ՝ ազգային հրամայական մը։ Ներկայի իրականութիւնը խարխլած է Հայաստանի ապահովութիւնը, քայքայած՝ ժողովրդավարական հաստատութիւնները, թուլցուցած՝ ազգային կամքը եւ արգելակած՝ մեր ժողովուրդին արդարութեան ձգտումը։
Վերանորոգուած Հայաստան մը պէտք է առաջնորդուի այնպիսի ղեկավարութեամբ մը, որ կը վերականգնէ ազգային արժանապատուութիւնը, կը պահպանէ ժողովրդավարական ազատութիւնները, անզիջում՝ կը պաշտպանէ հայկական իրաւունքները եւ կը վարէ արտաքին ու ներքին քաղաքականութիւն մը՝ հիմնուած արդարութեան վրայ եւ իրականացուած ուժի դիրքէն, այլ ոչ թէ ենթարկուելու դիրքէն։ Միայն այսպիսի ղեկավարութիւն մը կրնայ վերակերտել առողջ, սկզբունքային, արդիւնաւէտ եւ տեւական Հայաստան–Սփիւռք յարաբերութիւն մը, որ Սփիւռքը կը դիտէ իբրեւ հայկական պետականութեան անփոխարինելի սիւն մը եւ մեր համազգային օրակարգը յառաջ մղող գործընկեր մը։
ՄԵՐ ՀԱՄԱՅՆՔԻ ԵՒ ՀԱՍՏԱՏՈՒԹԻՒՆՆԵՐՈՒ ԱՄՐԱՊՆԴՈՒՄԸ ԱՐԵՒՄՏԵԱՆ ՄԻԱՑԵԱԼ ՆԱՀԱՆԳՆԵՐՈՒ ՄԷՋ
Արեւմտեան Միացեալ Նահանգներու մէջ, մեր պարտականութիւնը գործելն է, այլ ոչ թէ ինքնաբաւութեամբ գոհ մնալը։ Ուժեղ եւ միացեալ հայկական համայնք մը՝ կազմակերպուած, նպատակի յստակ գիտակցութեամբ եւ հանրութեան գործուն մասնակցութեամբ։
Ամերիկայի Հայ Դատի յանձնախումբին (ANCA) անխոնջ աշխատանքով պէտք է շարունակենք ընդլայնել հայ-ամերիկեան քաղաքական պաշտպանութիւնը, շարժել ընտրողները, դիմադրել անարդարութեան եւ հաշուետու պահել ընտրուած պաշտօնատարները՝ կառավարութեան բոլոր մակարդակներուն վրայ։
Մեր ապագային սիրտը մեր երիտասարդութիւնն է՝ հայկական եւ հանրային դպրոցներու ու համալսարաններու մէջ, ANCA-ի կրթաթոշակի եւ փորձառական ծրագիրներուն մէջ, եւ յատկապէս Հայ Երիտասարդաց Դաշնակցութեան (ՀԵԴ) շարքերուն մէջ։
ՀԵԴն անփոխարինելի դեր ունի քաղաքականապէս գիտակից, ազգային առաքելութեան նուիրուած եւ հանրային գործուն երիտասարդութեան մը ձեւաւորման մէջ։ Երիտասարդական գործունէութեան, առաջնորդութեան զարգացման եւ գաղափարական կրթութեան մէջ ներդրումը կենսական է՝ Հայ Դատի շարունակականութիւնը եւ Սփիւռքի մէջ մեր ազգային ինքնութեան պահպանումը ապահովելու համար։ Նոյնքան կարեւոր է մեր համայնքային կառոյցներու ամրապնդումը՝ մեր եկեղեցիները, դպրոցները, մշակութային կեդրոնները, լրատուամիջոցները եւ հանրային կազմակերպութիւնները, ինչպէս՝ ՀՕՄը, Համազգայինը, ՀՄԸՄը եւ այլք։ Այս հաստատութիւնները Սփիւռքի մէջ հայկական կեանքի ողնաշարն են։ Ուժեղ եւ միացեալ համայնք մը՝ կենսունակ հայկական դպրոցներով եւ համադրուած ազգային կազմակերպութիւններով՝ անհրաժեշտ են մեր ինքնութիւնը պահպանելու, մեր արժէքները փոխանցելու, մեր հաւաքական ձայնը հզօրացնելու եւ մեր ընդհանուր Դատը յառաջ տանելու համար։
Մենք անսասան կը մնանք մեր առաքելութեան մէջ՝ սկզբունքով եւ նպատակով առաջնորդելու, մեր ժողովուրդը կազմակերպելու եւ մեր հաւաքական ջանքերը համադրելու՝ մեր իրաւունքները պաշտպանելու։ Նպատակի միասնութիւնը, նուիրումը եւ գործը պիտի որոշեն մեր յառաջընթացի ուղին։
Այս Նոր տարին միասին սկսելով՝ թող որ վստահութիւն ունենանք մեր ժողովուրդին հանդէպ, հաւատք՝ մեր Դատին նկատմամբ եւ վճռակամութիւն՝ մեր քայլերուն մէջ։ Միասին պիտի յաղթահարենք օրուան մարտահրաւէրները եւ պիտի շարունակենք մեր կեանքի պայքարը՝ արդարութեան, ազատութեան եւ Հայ Դատին համար։
Վճռականութեամբ եւ Նոր տարուան ու Սուրբ Ծննդեան ջերմ բարեմաղթութիւններով՝
ԿԱՐՕ Ռ. ՄԱՏԷՆԼԵԱՆ, Ներկայացուցիչ ՀՅԴ Արեւմտեան Միացեալ Նահանգներու Կեդրոնական Կոմիտէի
