Այսօր՝ հունվարի 22-ին ԱԺ «Հայաստան» խմբակցության պատգամավոր Գեղամ Մանուկյանը հանդես եկավ մամուլի ասուլիսով:

Նա ամփոփեց խորհրդարանական շաբաթը և պատասխանեց լրագրողների հարցերին:

Որպեսզի պատկերացում կազմեք, թե իշխանությունը ինչպես է աշխատում և արդյունավետությունը, քառօրյան, որ տևում է չորս օր և կառավարությունը պետք է օրենսդրական բազմաթիվ նախագծեր բերեր, ավարտեցինք մեկուկես օրում՝ չհաշված Նիկոլ Փաշինյանի երեկվա ջղաձգումները. հայտարարեց Գեղամ Մանուկյանը։

«Եվ այդպես արդյունավետությունն է չափվում այս կառավարության։ Տարվա վերջում՝ դեկտեմբերի վերջին օրերին մեկ էլ հիշում են, որ տասնյակներով նախագծերի կարիք կա ու արտահերթերով փորձում են իրենց անգործունակությունը հիմնավորել: Դա էլ կառավարության գնահատականն է, թեև իրենք կարծում են, որ իրենք արժանի են բազմամիլիոնանոց պարգևավճարների»,- ասաց նա:

Պատասխանելով հարցին՝ արդյոք հունվարի 27-ին՝ հայրենիքի պաշտպանի հիշատակի օրը, գնալո՞ւ են Եռաբլուր՝ Գեղամ Մանուկյանը պատասխանեց՝ իրենք մեկ օր չեն գնում Եռաբլուր՝ «գալոչկայի» համար։

«Մեր շատերի համար տարին սկսվում է հունվարի 2-ին՝ Եռաբլուր այցելելով․ Շահեն Մեղրյանի ծննդյան օրն է։ Հունվարի 26-ին մերոնցից շատերը լինելու են Եռաբլուրում՝ այցելելու 1992 թվականի Քարին Տակի հերոսամարտում նահատակված Նորիկի, Կարոյի շիրիմներին, և այդպես շարունակ։ Այդպես չէ, որ մեկ օր է՝ «գալոչկա դնելու» համար այցելում ես Եռաբլուր»,– ասաց նա։

Պատգամավորը շեշտեց, որ, ի վերջո, սեպտեմբերի 19-ն «ՀՀ-ի, ՀՀ ԶՈւ-ի կողմից դավաճանված ՊԲ-ի նահատակների» օրն է։

«Ես Եռաբլուրում եղել եմ երիտասարդ տարիներից, առաջին հուղարկավորությունը 1990 թվականին է եղել։ Այսքան տարիների ընթացքում ավելի ահավոր զգացում չի եղել, ինչպիսին 2024 թվականի սեպտեմբերի 19-ն էր, երբ հարյուրավոր մարդիկ այցելել էին մեկ տարի առաջ ադրբեջանական ագրեսիայի հետևանքով և ՀՀ-ի և ՀՀ ԶՈւ-ի կողմից դավաճանված ՊԲ-ի նահատակների հիշատակին։ Դա ուղղակի ահավոր էր»,– ասաց Մանուկյանը։

Ազատ ոճով շարադրությունը ներկայացվում է որպես արտաքին սպառնալիքների զեկույց. ասաց «Գեղամ Մանուկյանը՝ անդրադառնալով Արտաքին հետախուզության վերջին զեկույցին և դրանում տեղ գտած հիբրիդային պատերազմի մասին ձևակերպումներին։

«Ակամա հիշում ես «Մենք ենք մեր սարերը» ֆիլմը, երբ ասում են՝ «տո դո՞ւ ես պետությունը»։ Հիմա ստացվում է՝ «տո իրե՞նք են Արտաքին հետախուզությունը»,– ասաց նա և նշեց, որ որպես արտաքին սպառնալիք զեկույցում ՀՀ-ին 32 տարի բլոկադայի մեջ պահող Թուրքիային անդրադարձ է եղել ընդամենը երեք անգամ, այն էլ՝ ճանապարհների ապաշրջափակման համատեքստում։

«Չնայած Ռուբինյանի սիրուն թիթեռներին, որ իբր այս կամ այն երկրի անձնագիր ունեցողների համար սահմանը կբացվի և այլն, որևէ բան չկա․ սահմանը փակ է։ Ֆիդանի կողմից, բացառությամբ Նիկոլ Փաշինյանին ուղղված վերջին խոսքերի, պարբերաբար հայտարարություններ են հնչեցվում ՀՀ-ի դեմ։ Մի երկիր, որտեղ բոլոր սոցիոլոգիական հարցումներով թշնամի են դիտվում ՀՀ-ն ու հայությունը։ Այս ամբողջ սպառնալիքների համատեքստում զեկույցում Թուրքիա անունը հնչել է երեք անգամ՝ այն էլ ճանապարհների հարցով։ Փոխարենը՝ հոգևոր գործիչներին են դիտարկում որպես սպառնալիք»,– ասաց նա։

«Անցնող տասնամյակներում որևէ մեկը չէր պատկերացնի, որ Մայր Աթոռ Սուրբ Էջմիածնի տարածք կասպատակեն հարյուրավոր ԱԱԾ-ականներ, հարյուրավոր քահանաների մասնակցությամբ ժողովին կարող են ԱԱԾ-ականներ գալ՝ Միքայել Սրբազանին բերման ենթարկելու համար»,- ասաց Գեղամ Մանուկյանը՝ անդրադառնալով Եպիսկոպոսաց ժողովը Ավստրիայում անցկանելուն։

Նա նշեց, որ նորություն չէ, որ եկեղեցական ժողովներ անցկացվում են նաև ոչ Հայաստանի տարածքում։ Ինչ վերաբերում է նրան, որ վերջին անգամ վաղուց է եղել, Գեղամ Մանուկյանն ասաց. «Որևէ մեկի մտքով չի անցել, որ անցնող տասնամյակներին կարող է հարյուրավոր բարձրաստիճան ոստիկանների, ԱԱԾ-ականների ուղեկցությամբ եկեղեցականների տեղաշարժ լինի, որևէ մեկի մտքով չի անցել, որ կարող է ինչ-որ դատավոր մի օրվա մեջ Փաշինյանի հրահանգով, Սահմանադրությունը, օրենքները, բարոյական բոլոր նորմերը խախտելով որոշում կայացնի Ամենայն Հայոց Կաթողիկոսի տնօրինման դեմ»։

Նա ընդգծեց, որ Վեհարանն այնտեղ է, որտեղ Վեհափառն է:

Մանրամասները՝ տեսանյութում