«Մենք չսահմանափակվեցինք այն նեղ օրակարգով, որ իրենք էին մեզ ներկայացնում։ Ասացինք՝ լուրջ հարցեր կան ՀՀ-ում, որոնք ձեր օրակարգում չեն տեղավորվում և սա առիթ է, որ մենք խոսենք այդ թեմաներով։ Մենք ուզել ենք ընդդիմության հետ առանձին հանդիպում, քանի որ կարճ հանդիպման ժամանակ հնարավոր չէ ամենը ասել»,-այսօր, Աժ-ում լրագրողների հետ ճեպազրույցում ասաց ՀՅԴ Բյուրոյի ներկայացուցիչ, «Հայաստան» խմբակցության պատգամավոր Արմեն Ռուստամյանը՝ անդրադառնալով Եվրոպայի խորհրդի մարդու իրավունքների հանձնակատար Մայքլ Օ‘Ֆլահերթիի հետ հանդիպմանը։

Արմեն Ռուստամյանն ասաց, որ չի ստացվել առանձին հանդիպում ունենալ ԵԽ հանձնակատարի հետ, այլ հանդիպել են պատվիրակության կազմում և ինքն ու Հայկ Մամիջանյանը մոտ 15 րոպե են կարողացել խոսել հանձնակատարի հետ։ Հայտնեց, որ չորս հիմնական թեմա են ներկայացրել՝ քաղբանտարկյալներ, եկեղեցու դեմ արշավ, գերիների հարց, Եվրոպայի խորհրդի մոտեցումներն ու մեր մոտեցումները։

Արմեն Ռուստամյանն ասաց, որ հանձնակատարն անդրադարձել է իրենց բարձրացրած խնդիրներին, քանի որ չէր կարող չխոսել այդ մասին։

Նաև հայտնեց, որ ահազանգել են, որ ՀՀ-ում կալանքը դարձել է պատժի միջոց․ «Ունենք դեպքեր, երբ ավելի ծանր են, բայց անձանց չեն կալանավորում։ Սա արդեն խոսում է քաղաքական հետապնդումների մասին»։ Ըստ Արմեն Ռուստամյանի՝ գերիների հարցով ԵԽ-ում ունեն հստակ դիրքորոշում․ «Մեկ այլ հարց ենք բարձրացրել, թե ինչպես է ձեր մոտ ձևավորվում միայն մեկ կարծիք այն բանի մասին, ինչ ՀՀ-ում տեղի է ունենում։ Ինքս Մոնիտորինգի հանձնաժողովի անդամ եմ, բազմիցս այս հարցերը բարձրացրել ենք, ոչ մի համարժեք պատասխան չտրվեց, թե ինչու չեղարկվեց համազեկուցողների այցը ՀՀ։ Իտալացի պատվիրակը հիվանդացել էր, հետո տեսել եմ նրան, կարող էին չչեղարկել, այլ գուցե հետաձգել այցը։ Տպավորություն է, որ իրենք պարզապես չեն ուզում լսել այլ կարծիք, ընդդիմադիր որևէ այլ մոտեցում։ Փաստորեն՝ եթե մարդկանց իրենց թեթև ձեռքով Կրեմլի ագենտներ են դիտարկում, ուրեմն կարելի է նրանց իրավունքները ոտնահարել։ Սա ի վերջո, նույն ԵԽ-ի հեղինակության հարցն է»։

Անդրադառնալով ԵԽԽՎ-ի կողմից ընդունված «Վեհաժողովի մոնիտորինգի ընթացակարգի առաջընթացը» բանաձևին՝ Արմեն Ռուստամյանն ասաց․ «Չեն գալիս, չեն գալիս, հերիք չէ, դեռ միակողմանի էլ հայտարարություններ են անում։ Մոնիտորինգի հանձնաժողովի բանաձևը տեսե՞լ եք։ Եթե չեք եկել, ուրեմն մի խոսեք։ Ասել եմ, որ սա մեզ համար անընդունելի է։ Համազեկուցողներն ինչո՞ւ չպետք է գային»։

Արմեն Ռուստամյանն ասաց, որ ԵԽ հանձնակատարին բոլոր քաղբանտարկյալների մասին գործ առ գործ, փաստարկված տեղեկատվություն են ներկայացնելու։

Մանրամասները՝ տեսանյութում