Համազգային հայ կրթական և մշակութային միության Երևանի գրասենյակի ու Խաչատուր Աբովյանի անվան հայկական պետական մանկավարժական համալսարանի «Սփիւռք» գիտաուսումնական կենտրոնի համատեղ նախաձեռնությամբ մայիսի 25-ին կայացավ Զարեհ Խրախունու «100 բանաստեղծություն» խորագրով ժողովածուի շնորհանդեսը։

Գիրքը լույս է տեսել պոլսահայ անվանի բանաստեղծի ծննդյան հարյուրամյակի կապակցությամբ և ընդգրկում է նրա՝ տարբեր տարիների լույս տեսած ժողովածուներից ընտրված հարյուր բանաստեղծություն։ Ժողովածուն կազմել է բանասիրական գիտությունների դոկտոր, պրոֆեսոր Սուրեն Դանիելյանը։

Շնորհանդեսի առիթով Հայաստան էին ժամանել Զարեհ Խրախունու դուստր Նորա Համբարձումեանը, դստեր ամուսինը՝ Ալէն Համբարձուեանը, որդին՝ Հարօ Ճիւմպիւշեանը, Պոլսո «Մարմարա» թերթի փոխխմբագիր Նաիրա Մկրտչեան Սյուզմէն։

Միջոցառումը վարում էր «Սփիւռք» գիտաուսումնական կենտրոնի տնօրեն, բանասիրական գիտությունների թեկնածու, դոցենտ Քնարիկ Աբրահամյանը։

Բացման խոսքով հանդես եկավ ռեկտորի ժամանակավոր պաշտոնակատար Լիլիթ Մկրտչյանը։ Նա ներկաներին ողջունեց անվանի գրողի հարյուրամյա հոբելյանի առիթով և նշեց, որ համալսարանի մշակութային-գրական կյանքում նշանավոր օր է, քանի որ պատիվ ունեն համալսարանի հարկի տակ հյուրընկալելու Խրախունու ընտանիքին։ Նա նաև շնորհակալություն հայտնեց ու կարևորեց Համազայինի հետ սերտ համագործակցությունը, որը ծնունդ է տվել մի շարք գրքերի ու ձեռնարկների և շարունակվում է նմանօրինակ գրքով ու շնորհանդեսով։

Պրոֆեսոր Սուրեն Դանիելյանն իր խոսքում արժևորեց գրողի անցած ուղին՝ նշելով․ « Շատ ու շատ բանաստեղծներ կերազեին Զարեհ Խրախունու նման ճանապարհ անցնել։ Մի առիթով նա ասել է, որ մարդու կենսագրությունն իր անցյալն է։ Միայն փոքր ու մեծ հավելումներ կարող են լինել, քանի մարդը շարունակում է ապրել։ Եվ այսօր ես կասեմ՝ Խրախունին իր ժողովածուներով շարունակում է ապրել մեր մեջ՝ միաժամանակ մեզ հաջորդող սերնդին ուղղություն տալով։ Ողջ իմացական կյանքի ընթացքում բանաստեղծական ապրումը նա տալիս էր երկունքի խորհուրդով․․․» ։

Համազգայինի Երևանի գրասենյակի տնօրեն Ռուզան Առաքելյանն էլ շեշտեց․ «Խրախունին իր ստեղծագործություններով նոր էջ բացեց հայ գրականության պատմության մեջ։ Նրա յուրաքանչյուր գործ մեզ պատմում է ոչ միայն գրողի անցած ճանապարհի մասին, այլև տանում է մեր ազգային ճակատագրի հետքերով։ «Լեռը» բանաստեղծության մեջ Խրախունին ինքնության արժեք է մեզ փոխանցում, նա մեզ հուշում է, որ լեռը մեր ինքնության խորհրդանիշն է, որ այն ավելի բարձր է, քան մենք, ու մենք մշտապես պետք է բարձրանանք, հասնենք նրա գագաթին․․․» ։

Համազգային հայ կրթական և մշակութային միության Կենտրոնական վարչության անդամ Արտաշես Շահբազյանը, փոխանցելով Կենտրոնական վարչության շնորհավորանքի և ողջույնի խոսքը, կարևորեց․ «Մեր գրական աշխարհի համար Խրախունուն կարելի է համարել երևույթ:

Առհասարակ, պետություններն անմահության երթի մեջ գտնվող իրենց գրողներին պարբերաբար տպագրում են, որովհետև հասարակությանը անընհատ պետք է սնուցել սեփական արժեքներով։ Ես նկատեցի, որ Խրախունին Հայրենիքում 2010թ․էր տպագրվել։ Ու այսօր` 16 տարի անց, Համազգայինը նրա խոսքը՝ նոր հատընտիրի տեսքով, նվիրում է ընթերցողին»։

Շնորհանդեսի ընթացքում խոսք ասացին նաև` գրողի ընկեր, հասարակական գործիչ, Կարօ Աբրահամեանը, Խաչատուր Աբովյանի անվան հայկական պետական մանկավարժական համալսարանի բանասիրական բաժանմունքի դեկան Աշոտ Գալստյանը, Պոլսո «Մարմարա» օրաթերթի փոխխմբագիր Նաիրա Մկրտչեան Սյուզմէն, ինչպես նաև` դերասան Արամ Կոստանյանը, ով կարդաց պատառիկներ Խրախունու ստեղծագործություններից։

Բանաստեղծի դուստրը՝ Նորա Համբարձումեանը, ընտանիքի անունից շնորհակալական խոսք ասաց միջոցառման կազմակերպիչներին և նշեց, որ անչափ հուզված է Հայրենիքում այսպիսի անկեղծ ու ջերմ շնորհանդեսով Խրախունուն արժևորելու համար։

Միջոցառման վերջում բանասիրական գիտությունների դոկտոր, պրոֆեսոր Աելիտա Դոլուխանյանը նշեց, որ հայագետ Ժան Պիեռ Մահեն բարձր գնահատական է տվել Խրախունուն՝ Հայաստանին նվիրված իր հրաշալի գրքում Հովհաննես Թումանյանի և Պարույր Սևակի կողքին դնելով Զարեհ Խրախունուն։

Շնորհանդեսն ավարտվեց հյուրասիրությամբ։

Համազգայինի Երևանի գրասենյակ