Այսօր՝ հունիսի 4-ին «Հայաստան» դաշինքի կենտրոնական շտաբում տեղի է ունեցել ընտրախախտումների վերաբերյալ մամուլի ասուլիս, որին մասնակցում էին ՀՅԴ անդամ, «Հայաստան» դաշինքի անդամ Արծվիկ Մինասյանը և փաստաբան Հովհաննես Խուդոյանը։

«Այն, ինչ այսօր Հայաստանի գործող իշխանությունը՝ ի դեմս ՔՊ-ի և նրա պարագլուխ Նիկոլ Փաշինյանի, իրականացնում է, ոչ միայն մարդկանց հիմնարար իրավունքների ոտնահարում է, այլև հանրային բարոյականության բացահայտ ոչնչացում»,- հայտարարեց Արծվիկ Մինասյանը։

«Այս պահին էլ, ինչպես գիտեք, առավոտվանից տարածված տեղեկատվության համաձայն, քաղաքական իշխանությունը իր հլու-հնազանդ իրավապահ համակարգն օգտագործելով՝ ընդդիմադիր գրեթե բոլոր շտաբներում և տարբեր վայրերում իրականացնում է այսպես կոչված օպերացիաներ։

Այդ օպերացիաներն ակնհայտորեն որևէ լուրջ հետևանք չեն ունենում, որովհետև թե՛ իրենց հրապարակումները, թե՛ այսպես կոչված բացահայտումները խոսում են այն մասին, որ իշխանությունը հասկանում է՝ հողը ոտքերի տակից գնում է, և փորձում է դրանով կեղծ պատկեր ստեղծել հանրության մոտ, ինչպես նաև հիմնավորումներ ներկայացնել միջազգային կազմակերպություններին, թե իբր Հայաստանում ընդդիմությունն իրականացնում է ընտրախախտումներ և այլն։ Մինչդեռ ամենախոշոր ընտրախախտողն իրենք են։ Նախընտրական այն մթնոլորտը, որտեղ Նիկոլ Փաշինյանը ատելություն ու թշնամանք է տարածում՝ անցնելով հանրային բարոյականության բոլոր սահմանները, շարունակվում է նաև այսօր։ Նա շարունակում է իր վարքագծով իջեցնել բոլոր նշաձողերը և քարոզարշավին հաղորդել այնպիսի բնույթ, կարծես թե ունի հանրային լայն աջակցություն», — նշեց Արծվիկ Մինասյանը։

Հովհաննես Խուդոյանն էլ իր հերթին ասաց. «Իրավապահ համակարգը նույն դիալոգի մեջ է. մի կողմում երկրի վարչապետը հնչեցնում է սպառնալիքներ և խուլիգանական վարքագիծ է դրսևորում, իրավապահները դրան չեն արձագանքում, բայց նույն իրավապահները շատ ավելի մեղմ խոսքի կամ կոշտ քննադատության համար կարող են մարդուն կալանավորել»,- ասաց փաստաբանը:

Նա ընդգծեց, որ 2026 թվականի ընտրությունները կեղծված են և դա հակակոռուպցիոն ու քննչական կոմիտեների շնորհն է։

«Այս կառույցները շուրջ 2 ամիս, նաև նախքան նախընտրական շրջանը, ակնհայտորեն լծված են քաղաքական քարոզչությանը։ Չեմ խոսում գործերի որակի, իրենց հրապարակած տվյալների արժանահավատության մասին, հանցագործություններ կան, թե չկան»,- ասաց Խուդոյանը։

Ասուլիսի մանրամասները՝ տեսանյութում