Համազգային հայ կրթական և մշակութային միության Երևանի գրասենյակի նախաձեռնությամբ՝ Օշականի Սուրբ Մեսրոպ Մաշտոց եկեղեցում նշվել է Քրիստոսի Պայծառակերպության տոնը՝ Վարդավառը։

Միջոցառման հյուրերն էին Համազգայինի համահայկական երիտասարդական հավաքի մասնակիցները, ովքեր Հայաստան են ժամանել աշխարհի 10 երկրներից։

Տոնական օրվա մեկնարկին երիտասարդները նախ հարգանքի տուրք են մատուցել մեծն Մեսրոպ Մաշտոցի գերեզմանին՝ խոնարհվելով հայ դպրության հիմնադրի հիշատակի առջև։

Օշականի Սուրբ Մեսրոպ Մաշտոց եկեղեցու հոգևոր հովիվ Տեր Վազգեն քահանա Հովհաննիսյանն իր օրհնության և բարեմաղթանքի խոսքն է հղել երիտասարդներին և միասնական աղոթքով խնդրել, որ Բարձրյալը խաղաղություն ու արևշատություն շնորհի աշխարհասփյուռ հայ ազգին։

Այնուհետև ծրագիրը շարունակվել է եկեղեցուն կից դպրատան սրահում։ Ներկաները մեծ հուզմունքով ունկնդրել են հոգևոր երգերի շարք՝ ՀՀ օպերայի և բալետի ազգային ակադեմիական թատրոնի մեներգիչ Ռոման Խնկոյանի բարձրարվեստ կատարմամբ։

Միջոցառման պաշտոնական մասում ոգեշնչող ելույթներով հանդես են եկել Համազգայինի Երևանի գրասենյակի տնօրեն Ռուզան Առաքելյանը, Համազգայինի Կենտրոնական վարչության անդամ Արտաշես Շահբազյանը, Համազգայինի Բեյրութի ճեմարանի վաստակաշատ տնօրեն Տիգրան Ճինպաշեանը և գրող Արտավազդ Նազարյանը՝ կարևորելով մաշտոցյան արժեքներն ու սփյուռքահայ երիտասարդության ազգային ինքնության պահպանումը։

«Այսօր, երբ աշխարհի 10 երկրներից հավաքվել եք այստեղ՝ մեր մեծ ուսուցչի՝ Մեսրոպ Մաշտոցի շիրիմի մոտ, մենք վերահաստատում ենք մեր միասնությունը։ Մաշտոցյան գրերը պարզապես տառեր չեն, դրանք մեր ինքնության հենասյուներն են, որոնք դարեր շարունակ մեզ հայ են պահել, և այսօր էլ հենց դրանք պիտի դառնան ձեր ուղեցույցը՝ աշխարհի ո՛ր անկյունում էլ լինեք»,- շեշտել է Արտաշես Շահբազյանը։

Իր ծանրակշիռ ու իմաստուն խոսքով երիտասարդներին է դիմել Համազգայինի Բեյրութի ճեմարանի վաստակաշատ տնօրեն Տիգրան Ճինպաշեանը՝ ընդգծելով.

«Մաշտոցի շիրիմի առջև կանգնելը սովորական այցելություն չէ, այլ ինքնության քննություն և պատասխանատվություն: Այսօր Սփյուռքում հայերեն խոսելն ու հայ զգալը հերոսություն է, բայց միևնույն ժամանակ՝ մեր գոյության միակ երաշխիքը: Դուք աշխարհի տարբեր ափերից բերել եք ձեր համայնքների շունչը, բայց ձեր հոգևոր հայրենիքն այստեղ է»:

Համազգայինի Երևանի գրասենյակի տնօրեն Ռուզան Առաքելյանն էլ, իր խոսքն ուղղելով երիտասարդներին, կարևորել է.

«Հայոց գրերի ստեղծումը մեր պատմության ամենամեծ հրաշքն է, և մեր գլխավոր առաքելությունն է, որ դուք՝ նոր սերունդը, ամուր կառչած մնաք այդ արմատներին, պահպանեք մեր լեզուն ու մշակույթը ձեր համայնքներում։ Մաշտոցի հանճարը մեզ տվեց ոչ միայն գիր, այլև հոգևոր զրահ՝ ընդդեմ ուծացման։ Մաշտոցյան այս ժառանգությունն է այն կամուրջը, որ ձեզ միշտ կապելու է հայրենիքին ու ձեր ինքնությանը»։

Գրող Արտավազդ Նազարյանը պատմական էքսկուրսով անդրադարձել է Մաշտոցյան ժամանակներին և հայ ինքնության պահպանման խնդիրներին՝ շեշտելով, որ գրերի գյուտը եղել է հայության առաջին մեծ ռազմավարական հաղթանակը, որը փրկել է ազգը ձուլումից։ Նա հորդորել է երիտասարդներին սեփական համայնքներում դառնալ այդ հաղթանակի կրողներն ու տարածողները։

Միջոցառումն անցել է ջերմ, հայրենաշունչ մթնոլորտում՝ դառնալով հայրենիք-սփյուռք կապի ամրապնդման և մշակութային արժեքների վերարժևորման ևս մեկ գեղեցիկ առիթ։ Վարդավառի տոնը շարունակվել է երիտասարդների կողմից ազգային, հայրենասիրական երգերի կատարմամբ։

Տաղավար օրվա ավարտին ներկաները նաև այցելել են Սուրբ Կարմրավոր եկեղեցի և հարգանքի տուրք մատուցել եկեղեցու բակում ամփոփված հայ մեծանուն գրողի՝ Գևորգ Էմինի հիշատակին։ Գրողի շիրիմի մոտ երիտասարդներին իր սրտի խոսքն է ուղղել Համազգայինի Կենտրոնական վարչության անդամ և Գևորգ Էմինի ազգական Արևիկ Գաբրիելյանը՝ նշելով, որ Էմինը հայ ազգի նվիրյալ էր, և նրա պատգամն է, որ հայ երիտասարդը երբեք չկորցնի իր կապը հայրենի հողի հետ, տիրապետի մայրենիին և իր ամբողջ ներուժով ծառայի ազգային արժեքների հարատևմանը։

Համազգայինի Երևանի գրասենյակ