Խոսելով Արցախի ներքաղաքական զարգացումներից`Դավիթ Իշխանյանն անդրադարձավ վերջին շրջանում այնտեղ տեղի ունեցած կադրային փոփոխություններին: «ՊԲ հրամանատար Լևոն Մնացականյանի պաշտոնից ազատվելը և այս հանգրվանում որոշակի փոփոխություն մտցնելը, չեմ կարծում, թե անհրաժեշտություն էր: Սակայն ՊԲ հրամանատարի փոփոխությունը ներքաղաքական զարգացումների վրա որևէ անդրադարձ չի ունեցել: Լևոն Մնացականյանը բոլորիս կողմից հարգված գեներալ է, իր փառապանծ ուղին է անցել, բայց նա քաղաքական գործընթացների մեջ չի եղել»,- ասաց նա:

Նա իր խոսքում նշեց, որ Հայաստանում տեղի ունեցած իշխանափոխությունից հետո ներքին քաղաքական ցնցումներ են եղել նաև Արցախում: «Հայաստանյան իրադարձությունների ֆոնից` իշխանափոխությունից հետո որոշակի փոփոխությունների պահանջ առաջացավ նաև Արցախում: Սակայն հիմա Արցախի քաղաքական կյանքը շարունակում է իր բնականոն ընթացքը և որևէ առումով խոր ազդեցություն չեղավ: Այնուհանդերձ կան որոշ մտահոգություններ` ղարաբաղյան հիմնահարցի հետ կապված: Հայաստանի նոր իշխանությունների կողմից որդեգրած նոր քաղաքականությունը կարող է իր անդրադարձն ունենալ հիմնախնդրի վրա, բայց դեռ վաղ է դրա մասին խոսելը: Հայաստանում տեղի ունեցած իշխանափոխությունից հետո ներքին քաղաքական ցնցումներ են եղել նաև Արցախում»,- ասաց նա:

Մեր ճշտող հարցին` ի՞նչ մտահոգությունների մասին է խոսքը, նա պատասխանեց, որ խնդիրն այն քաղաքական մեսիջների մեջ է, որ ստանում են տարբեր ձևաչափերի հանդիպումներից, ինչպես նաև որոշակի զարգացումներից:

«Իմ մատնանշած մտահոգություններով է պայմանավորված այն հանգամանքը, որ իմ հարազատ կուսակցությունը` Դաշնակցությունը, Հայաստանի և Արցախի միջև ռազմաքաղաքական դաշինքի` որպես իրավական փաստաթղթի առկայության անհրաժեշտությունը օրակարգ մտցրեց: Եվ թերևս մեր բաց թողած քաղաքական պահերին մենք պետք է կարողանանք նոր իրավիճակ և նոր պահ ստեղծելու հնարավորություն տալ: Արդեն անհրաժեշտ է ռազմաքաղաքական այդ դաշինքը գործնականի վերածել, տրամաբանական ավարտին հասցնել գործընթացը»,- նշեց նա:

Ըստ Դավիթ Իշխանյանի` այդ մտահոգությունները միշտ էլ եղել են, բայց վերջին շրջանում ավելի են խորացել: «Մտահոգությունները նախկինում էլ են եղել` կապված մադրիդյան սկզբունքների, կազանյան փաստաթղթի հետ: Այդ մտահոգություններն ավելի խորացան 2016 թվականի ապրիլյան իրադարձություններից հետո: Ապրիլյան իրադարձությունները մեզ հուշեցին, որ անհրաժեշտ է որոշակի կոնկրետ և գործնական քայլեր ձեռնարկել: Գուցե նոր իշխանությունների հետ հույսեր էինք փայփայում, որ ազգային շահերից բխող գործնական քայլեր կձեռնարկեն, բայց ցավոք սրտի, կարող եմ ասել` այդ քայլերը չենք տեսնում և նաև կան որոշակի մշուշոտ պատկեր և մշուշոտ քաղաքական զարգացումներ»,- եզրափակեց նա: