«Պարզ և բնական է, որ երիտասարդությունն իր պոռթկումն ու ընդվզումը արտահայտում է, և սա կրթության պատասխանատուի կողմից ամենատարբեր բնորոշումներով որակել, նաև կուսակցականացնել նշանակում է մարդը չի տիրապետում իրավիճակին, մարդը չի հասկանում է որտեղ է գտնվում, թե ինչ գործառույթներ ունի»,-նշեց նա։

Մինասյանը ընթերցեց Արայիկ Հարությունյանի՝ օրենքով սահմանված գործառույթները, ապա հավելեց․ «Այն ինչ անում է նա, հակառակն է այդ գործառույթներին, ասինքն՝ ինքը գործում է հակաօրինական ընթացքով»։

ՀՅԴ ԳՄ անդամը վստահ է՝ «երիատասարդների ընդվզումը փորձելով կուսակցականացնել Արայիկ Հարությունյանը նպատակ ունի թույլացնել պայքարը, որտեղ ոչ թե կուսակցականություն է, այլ ազգային գիտակցությունն, ինքնությունն է»․ «Պատահական չէ այս ոլորտի կարևոր դերակատարները՝ մտավորականները, դասախոսները նույնպես իրենց բողոքի ձայնն են բարձարցնում այն քաղաքականության առնչությամբ, որ նախարարի կողմից դրվում է շրջանառության մեջ։ Նա կանխամտածված օտարածին օրակարգին սպասարկում է իրականացնում։ Խելացի իշխանությունն այսպիսի ընդվզումն ընդունում է որպես կարևոր ազդակ, ուստի կարող ենք արձանագրել, որ այս իշխանությունը խելացի էլ չէ»։

Անդրադառնալով ԿԳՄՍ նախարարի հայտարարությանը քրեական գործերի մասին, Մինասյանն ասաց․ «Հրապարակային հայտարարում է, որ Արայիկ Հարությունյանը քրեական օրենսգրքով ենթակա է պատասխանատվության, թող հոդվածն ինքը որոշի։ Երկու հոդվածի այլընտրանք ունի՝ կամ սուտ մատնության հոդվածը, երբ հանցագործության մասին սուտ մատնություն է անում, գիտակցելով որ իր տրամադրած տեղեկությունը կեղծ է կամ հանցագործություն է պարտակում, ծանր կամ առանձնապես ծանր հանցագործության գործիքը, առիթը, թեման կանխամտածված քողարկվում է։ Հակառակ դեպքում Արայիկ Հարությունյանի արտահայտած սպառնալիքներն ունեն մեկ նպատակ՝ քաղաքական շանտաժի միջոցով փորձել իբր իրավական մեղադրանքների տարափ տեղալ։ Այս ամենը ցույց է տալիս, որ մենք գործ ունենք անպատասխանատու անձնավորության հետ, որը, ցավոք, Հայաստանի իշխանության վարկաբեկման, հեղինակազրկման գործընթաց է սկսել։ Ի վերջո, փոփոխությունները, որոնք դրվել են շրջանառության մեջ, ունեն բովանդակային հակասություններ իրենց իսկ հայտարարած նպատակների հետ:

Նա վստահ է՝ երիտասարդների ընդվզումը, բողոքն ու ցասումն աջակցություն է ստանալու Հայաստանի բոլոր բնակավայրերում և հասարակության բոլոր շերտերում․ «Մեր ազգային ինքնագիտակցությունը, ազգային նկարագիրը երբեք ու որևէ արայիկհարությունյաններ և օտարածին օրակարգեր սպասարկելու պատրաստ անձինք չենք կարող կոտրել»:

ՀՅԴ Հայաստանի Գերագույն մարմնի անդամ Տարոն Տոնոյանը միանում է նախարար Արայիկ Հարությունյանի հրաժարականի պահանջին, ով հասարակության մի ստվար զանգվածին անդաստիարակ է անվանել։

«Ես պետք է ավելացնեմ ևս մեկ պահանջ, եթե նա այդքան դաստիարակված է, թող ներողություն խնդրի այն մարդկանցից, չեմ ուզում խոսքս հուզական դարձնել, այն մարդկանցից, ովքեր Եռաբլուրում են թաղված ու իրենց կյանքը չեն խնայել հայրենիքի համար, նրանց հայրերից ու մայրերից, ովքեր դաշնակցական են»,-հայտարարեց հայտնի բժիշկը։

Նա ընդգծեց, որ այս անհանդուրժողականությունը թուլացնում է պետությունը, հայհոյախառը քննադատությունները հասարակությունը կեղեքում են։

«Իսկ դա պատերազմի մեջ գտնվող պետության համար թիվ մեկ վտանգն է, սա սպառնում է մեր պետականությանը»,-ասաց նա։

ՀՅԴ Հայաստանի ԳՄ անդամ Աշոտ Սիմոնյանը անդրադարձավ ՀՅԴ Սփյուռքի կառույցներին Հայաստանի՝ «անդաստիարակ» դաշնակցականներին տեր կանգնելու՝ Արայիկ Հարությունյանի հայտարարությանը. «Վստահաբար կարող եմ ասել՝ եթե Սփյուռքի մեր կառույցի ղեկավարները գան Հայաստան և ավելի մոտիկից ծանոթանան այն ապազգային գործելաոճին, որը պարոն Հարությունյանը կրթության ոլորտում փորձում է իրականացնել, կհորդորեն հայաստանյան կառույցի դաշնակցականներին ավելի վճռական, արմատական լինել իրենց գործողություններում և օր առաջ Հարությունյանին և նման մտածելակերպ ունեցող անձանց դուրս մղել քաղաքականությունից ու պետական կառավարման համակարգից»,- ասաց ՀՅԴ ԳՄ անդամը: