Սիրիայի խորհրդարանի հայազգի պատգամավոր Ժիրայր Ռեիսյանի խոսքով՝ սիրիահայերն արդեն աստիճանաբար վերադառնում են իրենց բնակավայրեր: Նա Tert․am-ի հետ զրույցում, սակայն, նկատեց՝ վիճակագրություն չկա, թվային պատկեր չի կարող ներկայացնել:

«Վերադարձողները տեղյակ չեն պահում իրենց վերադարձի մասին: Պարբերաբար պարզապես լսում ենք այս կամ այն ընտանիքի վերադարձի մասին: Բայց պաշտոնական վիճակագրություն չկա, թե ով վերադարձավ, ոչ չվերադարձավ»,- ասաց նա:

Ժիրայր Ռեիսյանի խոսքով՝ Սիրիայի իշխանությունները միշտ էլ դրական են վերաբերվել հայ համայնքին:

Նա նկատեց՝ միշտ էլ այնտեղ եղել է հայերի նկատմամբ մեծ հարգանք: «Հետևաբար հայերի ներկայությունն ապահովում է պետության ամբողջությունը, պետությունն էլ չի ցանկանում այդ մոզաիկան խաթարել: Սիրիայի հարգարժան նախագահը միշտ էլ արտահայտել է իր հարգանքը հայ ժողովրդի նկատմամբ: Ես գոնե երկու տարի առաջ իրենից անձամբ եմ լսել, որ նախանձախնդիր է, որ այդ մոզաիկան չխախտվի: Նրա ցանկությունն է, որ ինչպես բոլոր սիրիացիները, որոնք դժվար պայմանների հետևանքով դուրս են եկել Սիրիայից, այնպես էլ հայ համայնքի անդամները, վերադառնան Սիրիա»,- ասաց նա՝ նշելով, որ նախագահը միշտ էլ ասել է, որ եթե կարիք կա համայնքին ինչ-որ հարցով օգնելու, իր հնարավորությունների սահմանում կօգնի:

Իսկ թե արդյոք կա՞ անհանգստություն, որ ամերիկյան զորքերի դուրսբերման հետևանքով Սիրիայի հյուսիս Թուրքիայի հնարավոր ներխուժման հետ կապված, Ժիրայր Ռեիսյանը նշեց, որ իրենք՝ որպես Սիրիայի քաղաքացիներ, ունեն մի սկզբունք․ ոչ միայն օտար խմբավորումները, ապօրինի ներկայություն ունեցող ուժերը պետք է դուրս գան Սիրիայից: «Դրանց դուրս գալուց հետո պետության խաղաղությունն ու կայունությունը կտիրեն երկրում: Բայց այնքան ժամանակ, քանի դեռ այդ ուժերը կան երկրում, իրավիճակը կայուն չի լինի»,- ասաց նա:

Հալեպում հիմա, ըստ սիրիահայ պատգամավորի, կյանքը բնականոն հունի մեջ է: Հարցին, թե վերականգվում են հայկական թաղամասերը, նա պատասխանեց․ «Ես չեմ ուզում առանձնացնել հայկական թաղամասերը․ քաղաքը ընդհանուր վերականգնման գործընթացի մեջ է: Արդեն բազմաթիվ շենքեր վերականգնված են»,- ասաց նա։

Ի՞նչ սպասումներ ունեն, հույս ունե՞ն, որ Սիրիայի ամբողջ տարածքով պատերազմը կմարի: Ժիրայր Ռեիսյանի խոսքով՝ այսօր պատերազմում ներգրավված միջազգային բոլոր դերակատարներն էլ հասկացել են, որ պատերազմի ավարտը ի շահ Սիրիայի օրինական իշխանությունների է լինելու:

Իսկ հարցին, թե ինչպես են հայ համայնքում վերաբերվում Հայաստանի իշխանությունների նախաձեռնությանը՝ Ռուսաստանի հետ համագործակցությամբ քաղաքապահ զորքեր տեղակայվեն Հալեպում, Ժիրայր Ռեիսյանը պատասխանեց․

«Սիրիահայը սիրիահայ ժողովրդի մի անբաժանելի մասնիկն է, ոչ տարբեր այլ խմբավորումների։ Հետևաբար, եթե միջպետական համաձայնություններով Հայաստանի քայլը ողջունելի լինի Սիրիայի համար, ողջունելի կլինի նաև մեզ համար: Բայց մեզ համար ապահովության, կայունության առաջին երաշխիքը սիրիական բանակն է, սիրիական պետությունը: Սիրիայում հայության հետ հարաբերությունները բարեկամության, եղբայրության հասնող են, և գուցե հայության ներկայությունը բնական ձևով ընդունվի»:

Հեղինակ Հռիփսիմե Հովհաննիսյան