–Դաշնակցությունն ինչպե՞ս է գնահատում Արցախում կայացած ՏԻՄ ընտրությունները:

-Կենտրոնական կոմիտեն քննարկել է Արցախում կայացած ՏԻՄ ընտրությունների ընթացքն ու արդյունքները եւ դրանք որակել որպես ազատ եւ ժողովրդավարական:

-Դաշնակցության համար գոհացուցի՞չ էին ՏԻՄ ընտրությունների արդյունքները:

-Այո, արդյունքները գոհացուցիչ էին: Կայացած ընտրություններին Դաշնակցությունը հանրապետության համայնքներում առաջադրել կամ պաշտպանել է 34 համայնքի ղեկավարի եւ 48 ավագանու անդամի թեկնածուների: Դաշնակցության կողմից պաշտպանված համայնքի ղեկավարների թեկնածուներից 21-ն են ընտրվել, իսկ ավագանու թեկնածուներից՝ 41-ը: Այսինքն, մեր կողմից առաջադրված եւ պաշտպանված թեկնածուների 2/3-ն այս մրցապայքարում հաջողություն է գրանցել:

Նախքան ընտրությունները Դաշնակցությունն ուներ 14 համայնքի ղեկավար, ընտրությունների արդյունքում մենք ունեցանք 21-ը: Այդ առումով ընտրությունների արդյունքները գոհացուցիչ են Դաշնակցության համար:

-Որոշ քաղաքական ուժերի ներկայացուցիչներ հայտարարել են ընտրապայքարում իրենց «ջախջախիչ» հաղթանակի մասին: Ինչպե՞ս եք վերաբերվում նրանց հայտարարություներին:

-Ուրիշների ասածները չեմ ցանկանում մեկնաբանել, պարզապես ասեմ, որ մեր երկրում ընտրությունների մրցապայքարի արդյունքում որեւէ մեկը չի կարող ջախջախիչ հաղթանակ տանել: Դա չկշռադատված արտահայտություն է, որը հարված է հասցնում բազմաթիվ ներքին եւ արտաքին մարտահրավերներ դիմագրավելու խնդրի առաջ կանգնած մեր հասարակության միասնականությանը։

Մեր երկրում մեկը մյուսի նկատմամբ ջախջախիչ հաղթանակ տանելու անհրաժեշտություն չկա: Ջախջախում են թշնամուն՝ սահմանից այն կողմ: Մեր հայրենիքում չեն կարող լինել «ջախջախված» հայրենակիցներ: Ես կասեի, որ ընտրություններում հաղթանակ է տարել կայացման փուլում գտնվող ՏԻՄ համակարգը: Եթե կայացման եւ զարգացման դիտակետից նայենք ՏԻՄ համակարգին, մեզ մոտ հաղթողներ եւ պարտվողներ չեն եղել: Եղել են մրցապայքարի արդյունքում ընտրված եւ չընտրված թեկնածուներ: Հուսամ, որ այդ հայտարարությունները միտումնավոր չեն արվել:

-Սոցիալական ցանցերում եւ լրատվամիջոցներում խոսվում է մոտ 128-130 համայնքներում տարած հաղթանակի մասին:

-Նմանատիպ հայտարարությունները քարոզչական մանիպուլյացիաներ են: Այդ «հաղթանակները» սխալ վերլուծության եւ ոչ ճիշտ տրամաբանության արդյունք են: Այդ նույն տրամաբանությամբ Ստեփանակերտ քաղաքում մասնակցած ընտրողների թիվը կազմել է հանրապետության ընտրողների մոտ 32 %-ը։ Առաջին հորիզոնականը զբաղեցրել է անկուսակցական թեկնածուն, երկրորդ հորիզոնականում է Դաշնակցության պաշտպանած թեկնածուն, 3-4-5-րդում՝ այլ կուսակցությունների ներկայացուցիչներ։ Հիմա ի՞նչ է ստացվում՝ ընտրություններում հաջողություն գրանցած կուսակցականների դեպքում կուսակցությունը հաղթել է, իսկ ոչ առաջին հորիզոնականը զբաղեցրած կուսակցության անդամների պարագայում՝ կուսակցությունը տվյալ համայնքում չի՞ մասնակցել ընտրապայքարին։

Մյուս հարցը՝ խոսվում է 130 թեկնածուների հաղթանակի մասին: Իսկ ինչքա՞ն են եղել մինչեւ ընտրությունները՝ 160, թե՞ 170. այս մասին ոչինչ չի ասվում։

Կրկնում եմ, սրանք ոչ ճիշտ վերլուծության արդյունքներ են։

Եթե նայենք պաշտոնական վիճակագրությանը, ապա ՏԻՄ ընտրություններում մասնակցել է համայնքի ղեկավարի 413 թեկնածու, որից կուսակցական են եղել ընդամենը 128-ը, իսկ կուսակցությունների կողմից առաջադրվել է ընդամենը 3 թեկնածու: Ավագանու թեկնածուների թիվը կազմել է 1396, որից կուսակցական են եղել ընդամենը 248-ը, իսկ կուսակցությունների կողմից առաջադրվել է ընդամենը 18 թեկնածու:

Կարծում եմ այս առումով Արցախում հաջողություն է գրանցել «անկուսակցականների կուսակցությունը»։

-Լուրեր են տարածվում, ըստ որոնց՝ ՏԻՄ ընտրությունները չքաղաքականացնելու պայմանավորվածություններ են ձեռք բերվել:

-Պետք է տարբերակել խոսակցություններն ու քննարկումները պայմանավորվածություններից: Համայնքի ղեկավարի պաշտոնը մեր օրենսդրությամբ քաղաքական պաշտոն է։ Դաշնակցությունը չի կարող ունենալ մեր օրենսդրությանը հակասող պայմանավորվածություններ։ Այդ է պատճառը, որ Դաշնակցությունն այն եզակի քաղաքական ուժերից է, որը նախօրոք հայտարարել է իր սատարած թեկնածուների մասին՝ մասնավորապես քաղաքային համայնքներում։

-Ինչպես ասացիք՝ 228 համայնքում տեղի ունեցած ընտրություններին Դաշնակցությունը սատարել է 34 համայնքի ղեկավարի թեկնածուի, ինչը կազմում է ընդհանուր համայնքների միայն 15%-ը: Այս ցուցանիշն արդյո՞ք քիչ չէ Դաշնակցության համար:

-Նայած թե որ կողմից ենք նայում: Եթե համայնքների թվի քանակով նայենք, ապա Դաշնակցությունը համայնքների թվի 15%-ում է սատարել որևէ թեկնածուի, բայց չպետք է մոռանալ, որ այդ 34 համայնքները կազմում են մեր ազգաբնակչության առնվազն 70%-ը։

Ասեմ նաեւ, որ Դաշնակցությունն այս ընտրություններին սատարել է ինչպես կուսակցական, այնպես էլ համակիր թեկնածուների:

-Ինչո՞վ էր պայմանավորված Դաշնակցության այդ որոշումը:

-Ամենեւին էլ պարտադիր չէ, որ Դաշնակցության սատարած թեկնածուները պարտադիր կուսակցականներ լինեն: Դաշնակցութունն ավելի շատ ուշադրություն է դարձրել թեկնածուների հմտություններին եւ կարողություններին:

Եթե մեր համակիր թեկնածուները լավ ծրագրերով են հանդես եկել, մենք պաշտպանել ենք այդ թեկնածուներին, որովհետեւ մեզ համար սեփական թեկնածուի բարդույթ գոյություն չունի: Խնդիրը ՏԻՄ համակարգի կայացումն է, համայնքներում ունակ ղեկավարի առկայությունը:

Մենք առաջնորդվել ենք այս սկզբուքներով, եւ ընտրությունների արդյունքները ցույց են տվել, որ բոլոր այն համայնքներում, որտեղ մենք առավելության չենք հասել, գրավել ենք 2-րդ հորիզոնականը, այն էլ՝ շատ տեղերում թեկնածուների միջեւ ձայների տարբերությունը մինչեւ 20 ձայն էր։ Սա խոսում է ճիշտ ընտրված թեկնածուների մասին։

-Դաշնակցությունը սեպտեմբերի 12-ից սկսել է 2020թ. ընտրություններին միասնական օրակարգով եւ համաձայնեցված թեկնածուով առաջադրվելու շուրջ բանակցություններ: Ինչպե՞ս են ընթանում բանակցությունները:

-Կենտրոնական կոմիտեն գործադրում է Դաշնակցության Արցախի արտահերթ Շրջանային ժողովի որոշումը: Արդեն իսկ մեկնարկել է մեր հանդիպումների շարքը: Հանդիպել ենք Արցախի թեմի առաջնորդ Պարգեւ արքեպիսկոպոս Մարտիրոսյանի հետ՝ ստանալու նրա օրհնությունը: Արցախի հոգեւոր առաջնորդը կիսել է միասնական օրակարգ ձեւավորելու՝ Դաշնակցության կողմից արծարծված մտահոգությունները եւ ողջունել միասնական օրակարգ ձեւավորելու ուղղությամբ տարվող ջանքերը: Պարգեւ սրբազանն օրախնդիր է համարել նաեւ հասարակության մեջ ամեն տեսակի պառակտման ու բեւեռացման առաջն առնելու յուրաքանչյուր քայլ:

Այս փուլում հանդիպելու ենք խորհրդարանական եւ արտախորհրդարանական կուսակցությունների հետ։ Գործընթացի ամփոփումը լինելու է հրապարակային, եւ հանրությունը տեղեկացված է լինելու այս ամենի մասին։

Լուսինե Թեւոսյան