Մանոյանը նշեց, որ թեև ՀՀ-ն չդիմեց ՀԱՊԿ-ին օգնությանը, բայց տեղյակ պահեց, և գլխավոր քարտուղարն էլ հայտարարություն արեց, բայց միաժամանակ ՀԱՊԿ-ի անդամ թյուրքական երկրների խորհրդի անդամ պետություններ կան, դա էլ հասկանալի է, թե ինչու ավելի ուժեղ հայտարարություն չեղավ, բայց Հայաստանը օգնության համար չի դիմել ու լավ է արել, պետք չունեինք:

Իսկ, թե ինչ աշխատանքներ տարավ Հայ դատի գրասենյակը, նա նշեց, որ աշխատանքները դեռ չեն վերջացել, արդյունքներ գրանցելը ընթացքի մեջ է: «Օրինակ՝ այսօր ԱՄՆ կոնգրեսի ներկայացուցիչների պալատը քննարկելու է Ադրբեջանի նախատեսված ռազմական օժանդակության հարցը, նաև հանրային կարծիքի համար կազմակերպվեցին բազմաթիվ ցույցեր, որոնք այսօր էլ շարունակվելու են: Այսօր Լոս Անջելեսում ցույց կա նախատեսված` ադրբեջանական հյուպատոսարանի դիմաց, եթե լրատվամիջոցները նույնիսկ չարձագանքեն, առնվազն անդրադառնում են՝ մանավանդ հաշվի առնելով ադրբեջանցիների բռնությունները ցույցերի ժամանակ»,- ասաց նա:

Մանոյանը նշեց, որ սրանք ավելի հրապարակային միջոցառումներն են, կան նաև քաղաքական շրջանակների հետ հարաբերություններ, Ավստրալիայից մինչև Լատինական Ամերիկա, մինչև Կանադա և եվրոպական մի շարք երկրեր: Նրա խոսքով՝ այդտեղ ևս Հայ դատի հանձնախմբերը ունեցել են իրենց կարևոր դերակատարությունը, և Եվրոխորհրդարանի անդամներ հանդես են եկել Ադրբեջանի այս սադրանքները դատապարտելու մոտեցումներով` իրենց իշխանություններից պահանջելով ավելի հստակ կեցվածք որդեգրել այս հարցի ուղղությամբ:

Անդրադառնալով դեսպանատների աշխատանքներին` նա ասաց. «Ես դեռ գրեթե չեմ լսել որևէ դեսպանատան մասին, որ պատշաճ աշխատանք չի տարել, բացառությամբ մեկ-երկուսի, հիմա չեմ բարձրաձայնի, թե որոնք են, բայց մենք մեր մտահոգությունները կփոխանցենք ԱԳ նախարարություն: Իհարկե, թերացումներ կան, բայց քննադատությունների պահը հիմա չէ»: