Վարչապետ Նիկոլ Փաշինյանի հրաժարականը պահանջող քաղաքացիները, այսօր դեկտեմբերի 9-ին Երեւանի տարբեր հատվածներից երթերով շարժվել են դեպի Ազգային ժողովի շենք, որտեղ ժամը 16:00-ին մեկնարկելու էր «Հայրենիքի փրկության շարժում»-ի հանրահավաքը:

Նիկոլ Փաշինյանի հրաժարականը պահանջող քաղաքացիները շրջափակելեն խորհրդարանի շենքը, պահանջելով որ վարչապետը ժամ առաջ հրաժարական տա։ Հանրահավաքին ընդառաջ ոստիկանական մեծաքանակ զորքեր են կուտակվել Դեմիրճյան փողոցում։

ՀՀ քաղաքացիները ցույց էին տալիս դեղին քարտ՝ զգուշացնելով, որ նրանք մոտենում են կարմիր գծերին․ հանրահավաքի ժամանակ հայտարարել է ՀՅԴ անդամ Գեղամ Մանուկյանը:

«Զգուշացնելով, որ նրանք զբաղված են միայն իրենց իշխանությունն ամրապնդելով: Զգուշացնելով, որ նրանք վտանգում են մեր ազգային հարցերը: Զգուշացնելով, որ նրանց գործողություններն ամեն վայրկյան ավելի են վտանգում Արցախի անկախությունը: Նրանք խելքի չեկան»,- շեշտել է նա՝ հիշեցնելով, որ իշխանական պատգամավորները, իրենց ղեկավար Նիկոլ Փաշինյանի հետ ձեռք ձեռքի տված, և իրենց կողմից օժանդակվող հասարակական կազմակերպություններով և օտարերկրյա գործակալներով 2.5 տարվա ընթացքում գողացան մեր հայրենիքը, ուստի արդեն կարմիր քարտ ցույց տալու ժամանակն է:

«Այսօր կարմիր քարտով ԱԺ-ի դիմաց Նիկոլ Փաշինյանին ասում ենք՝ քո ժամկետը լրացած է, քո տեղը պատմության աղբանոցն է: Եվ Հայաստանը պետք է լինի առանց Նիկոլ»,- հայտարարել է Գեղամ Մանուկյանը:

Դաշնակցական գործիչը դիմել է ոստիկաններին՝ հիշեցնելով, որ նրանք սպայի արժանապատվության երդում են տվել և ուշադրություն հրավիրելով այն փաստի վրա, որ իրենց կողքին ոստիկանի համազգեստով քաղաքացիան անձինք կան:

Ինչ վերաբերում է Փաշինյանին, ապա, ըստ Մանուկյանի, նա թաքնվում է զոդված ճաղերի հետևում, ինչպես նաև՝ ոստիկանների և սադրիչների:

«Դու այդպես փախած ես մնալու: Փախած՝ քո երկրից»,- Փաշինյանին զգուշացրել է Մանուկյանը:

Հանրահավաքի ընթացքում Ելույթներով հանդես եկան մի շարք ընդդիմադիր գործիչներ։

ԱԺ-ի դիմաց ընթացող հանրահավաքի ժամանակ մասնակիցները կարմիր քարտ են ցույց տվել 7 շրջանները հանձնելու եռակողմ համաձայնագիրը ստորագրած գործող իշխանությանը։

«Հայրենիքի փրկության շարժման» հանրահավաքի ավարտին հայտարարվեց, որ ըդդիմությունը վաղը՝ դեկտեմբերի 10-ին՝ ժամը 11:00-ին, կհավաքվի Կառավարության շենքի դիմաց` պահանջելու Նիկոլ Փաշինյանի հրաժարականը։