Հայրենիքի փրկության շարժման վարչապետի թեկնածու Վազգեն Մանուկյանը այցելել է Ազատության հրապարակ հանդիպելու քաղաքացիների հետ:

Հայ-ռուսական հարաբերությունները նոր չէ, որ հարվածի տակ են։ Ես կարծում եմ՝ եթե այս տղան մի քիչ էլ երկար մնա, ոչ միայն ՌԴ-ի, աշխարհի բոլոր երկրների հետ մենք վատ հարաբերություններ կունենանք. Ազատության հրապարակում լրագրողների հետ զրույցում ասաց Վազգեն Մանուկյանը՝ անդրադառնալով այն հանգամանքին, որ Հայաստանում ՌԴ դեսպանատան ֆեյսբուքյան էջում Ստեփանակերտի անվան հետ մեկտեղ նշված է եղել ադրբեջանական «Խանքենդի» տարբերակը։

Անդրադառնալով Նիկոլ Փաշինյանի՝ «Իսկանդերի» վերաբերյալ հայտարարությանը, թե ինչո՞ւ կրակած «Իսկանդեր»-ը չի պայթել, կամ պայթել է 10 %-ով, Մանուկյանն ասաց․

«Մարդը կա՛մ պետք է «իդիոտ» լինի, կա՛մ իսկապես թշնամի, որովհետև ինքը կտրուկ վատացրեց մեր հարաբերությունները ՌԴ-ի հետ և ինքն այդ զենքից ոչ մի բան չի հասկանում։ Ես չգիտեմ՝ ինքը դա դիտավորյալ արեց հենց ՌԴ-ի դեմ ուղղված, թե՞ ուղղակի իր սովորական ձևն է, որ ինքը մեղավոր չէ, զենքն է մեղավոր։ Հետո երևի իր համար նշանակություն ունի, որ այդ զենքը գնվել է Սերժ Սարգսյանի ժամանակ, ինքն ուզում է ցույց տալ, որ Սերժ Սարգսյանի գնած զենքը վատն է։ 2,5 տարի ես ու շատերն ասում ենք, որ սա օտարի ծրագիր է, և նա հետևողականորեն այդ օտարի ծրագիրը կատարում է։ Ես զարմանում եմ, որ ինքը դարձավ վարչապետ, և զարմանում եմ, որ մինչև հիմա իրեն չեն քշել»,-ասաց նա։

Անդրադառնալով դիտարկմանը, թե ըստ Փաշինյանի՝ նոյեմբերի 9-ի գիշերը քաղաքացիները մուտք են գործել Կառավարության շենք, որ Արցախի հարցով փաստաթղթեր ոչնչացնեն, Մանուկյանն ասաց, թե շատ բնական էր, որ ժողովուրդը պետք է ըմբոստանար ու ոտքի կանգներ։

«Մեղավորություն եմ տեսնում իմ ու քաղաքական գործիչների, որ չեկանք, տեր չկանգնցինք դրան, այդ երկու օրում կարելի է իրեն քշել ու վերջացնել այդ ամեն ինչը։ Իսկ ինքն ինչու՞ էր բունկերում թաքնվել, որովհետև նույնիսկ ինքն էր հասկանում, թե ինչ պոռթկում կլինի այդ փաստաթղթից հետո»,-ասաց նա՝ նշելով, թե ԱԺ, Կառավարության շենքեր մտնելը նորմալ էր։

Նա նշեց, թե պատերազմի ընթացքում նպատակահարմար է գտել, որ իշխանությունը հանձնվի զինվորականությանը, որովհետև, ըստ Մանուկյանի, այդ ժամանակ հնարավոր է եղել իրավիճակը փրկել, սակայն այժմ նոր իրավիճակ ունենք։ «Ես կարծում եմ՝ հիմա ԳՇ պետը, Պաշտպանության նախարարությունը պարտավոր են գրել ճշմարտությունը և հերքել «Իսկանդերի» մասին այն, ինչ ասաց Նիկոլ Փաշինյանը»,-նշեց նա։

Ըստ Մանուկյանի՝ Փաշինյանի ասածի վերաբերյալ ՌԴ-ն չի սահմանափակվի միայն Պետդումայի կողմից կոշտ հայտարարություններով․ «Սա ամենամեղմ պատասխանն էր, որը կարող էր լինել»,-ասաց Մանուկյանը։

Ամեն օր կատարվում է նվազագույնը երեք դեպք, որոնցից յուրաքանչյուրի համար ցանկացած երկրի իշխանություն հրաժարական կտար․ ասաց Վազգեն Մանուկյանը։

«Նիկոլի մնալու ամեն մի օրը մեզ մոտեցնում է պատերազմի, որովհետև այդ գայթակղությունը, որ իրենց դիմաց մի պետություն է, որը ոչ մի պաշտպանվածություն չունի և փալասի պես ղեկավարությունը կատարում է ուրիշների կամքը, միշտ պատերազմի գայթակղություն է առաջացնում։ Միայն ուժի միջոցով կարելի է զսպել պատերազմը»,-նշեց նա։

Մանուկյանի խոսքով՝ ապստամբության դրդում է իշխանությունը, և Հայրենիքի փրկության շարժումը զբաղված է համազգային շարժումը ձևավորելով․ «Շարժման մասնակիցները տասնյակ հազարավոր են, տներում նստած մարդիկ, որ իրենց մասնակից են զգում, հարյուր հազարավոր են։ Մենք ուզում ենք այդ երկու թիվն էլ մեծացնել»,-նշեց նա՝ հավելելով, որ իշխանությունները ժողովրդի անունից չպետք է խոսեն, քանի որ ժողովրդի հետ կապ չունեն։

Հարցին էլ՝ ինչպես է պատկերացնում ապստամբությունը, Մանուկյանն արձագանքեց․ «Ինձ համար ժողովրդի արյունը մեծ արժեք ունի, և ես չեմ, որ նախաձեռնող կլինեմ դրա, բայց իշխանությունների համար ժողովրդի արյունը նշանակություն չունի, և իրենք կարող է դրդել ժողովրդին տարբեր գործողությունների»։

Անդրադառնալով ընդդիմադիրների հանրահավաքներին ու ցույցերին մասնակիցների քանակին՝ Մանուկյանը նշեց, որ ժամանակ է պետք ՀՀ-ի վրա իջած արհավիրքը հասկանալու համար: «Որոշ մարդիկ միանգամից են հասկանում, որոշ մարդիկ մինչ այդ էին հասկանում, թե ինչ է լինելու, բայց շատ մարդկանց ժամանակ է պետք, որ փաստերին ծանոթանան, «մարսեն», կամաց-կամաց համոզվեն, որ ոչ թե դա ինչ-որ մեկը չարամտորեն հնարել է, այլ հասկանան՝ ինչ է կատարվում»,-ասաց նա։

Մանուկյանը վերահաստատեց իր տեսակետը, թե սա այն իշխանությունը չէ, որ ինքնակամ կգնա, պետք է կոտրել այս իշխանոսւթյան հենարանները․ «Դրանք երեքն են․ մի հենարանը կոտրելու կարիք չունի, այլ համոզելու աշխատանք ունի՝ մեր ժողովրդի այն հատվածն է, որ մինչև վերջ չի գիտակցել, երկրորդը՝ իրենց պատգամավորներն են, որոնցից մեծ մասը, կարծում եմ, ծուղակում է, երրորդ հենարանն էլ Ոստիկանությունն է, մարդիկ ուզում են աշխատանքից չզրկվել, և իրենց խաբում են, թե պետության առջև պարտքն են կատարում, բայց կամաց-կամաց հասկանում են, որ իրենք կատարում են իրենց պարտքը ոչ թե պետության, այլ Ադրբեջանի և Թուրքիայի հանդեպ»,-ասաց նա։

Ըստ Մանուկյանի՝ Փաշինյանը նաև կոմպրոմատներ ունի իշխանական պատգամավորների դեմ։

«Վաղը ավտոշարասյունով գնալու ենք շրջան, ուզում ենք ամբողջ Հայաստանը պտտվել»,- նշեց Վազգեն Մանուկյանը, անդրադառնալով վաղվա ավտոերթին

«Հետո կվերադառնանք Երեւան: Այստեղ երթեր էլ կլինեն, հանրհավաքներ էլ կանենք: Կարող է պերմանենտ հանրհավաք անենք: Մի օր էլ կարող է հանրահավաք լինի, նստենք, մնանք: Կարող է մի քիչ տաք լինի, չնայած, կարծում եմ՝ մինչ էդ կքշենք իրեն»,-ասաց նա:

https://youtu.be/aHzi_BL2aD4

https://youtu.be/WECNDwwiFk0