«Առաջին լրատվական»- ի զրուցակիցն է ՀՅԴ պատգամավորության թեկնածու Արծվիկ Մինասյանը:

-Դուք ռեյտինգային ընտրակարգով առաջադրվել եք Արմավիրի մարզում, ինչո՞ւ․ Դո՞ւք եք որոշել, թե՞ կուսակցությունը:

-Նախ՝ ես Արմավիրից եմ՝ Շենիկ բնակավայրից, բացի դրանից՝ իմ առաջին քաղաքական քայլերը սկսել եմ Արմավիրի մարզի Քարակերտ գյուղից…

-Թույլ տվեք մտերմաբար հարցնել՝ վերջն ի՞նչ է լինելու:

-Վերջը լավ է լինելու, այնքանով լավ, որ արդեն շատերը գիտակցում են, որ պետք է ոչ թե քաղաքական շոուների հետևից գնալ, այլ փորձել համատեղել ուժերը, գտնել այն ծրագրային լուծումները, որոնք մի կողմից կմերձեցնեն քաղաքական տարբեր ուժերի տեսակետները, մյուս կողմից՝ կծնեն այնպիսի փաստաթուղթ կամ ծրագիր, որը ձևավորվող խորհրդարանին և կառավարությանը հնարավորություն կտա ընտրություններից հետո երկիրն առաջ տանել:

-Դուք ձեզ այդ խորհրդարանում տեսնո՞ւմ եք:

-Պատկառելի մասնակցություն ենք տեսնում. նկատի ունեմ ՀՅԴ-ին և մեր ռեյտինգային ցուցակով ընդգրկված անձանց:

-Առայժմ սոցհարցումները ճիշտ հակառակն են փաստում:

-Սոցհարցումների մասին որևէ բացասական բան չեմ ուզում ասել, բայց հասարակության հետ անմիջական շփումները շատ ավելի ճիշտ կարող են ցույց տալ պատկերը: Առաջին հայացքից այդպես է, եթե քաղաքացու հետ չշփվես, գուցե կողքից կարծիք հարցնելով՝ ընդվզում է, բայց շփվելով՝ եթերից հնչող մանիպուլյացիոն հայտարարությունների արդյունքում ձևավորված սխալ պատկերացումները ցրվում են, և մարդիկ հասկանալով մեր ծրագրերը և դիրքորոշումները տարբեր հարցերի վերաբերյալ՝ նորից սկսում են վստահել ու հավատալ մեզ:

-Արմեն Ռուստամյանն ասում է՝ Դաշնակցությունը Հայաստանի ողնաշարն է, եթե չընտրվի, լավ չի լինի: Ո՞վ է ասել, որ Դաշնակցությունը Հայաստանի ողնաշարն է:

-Ես:

-Միայն Դո՞ւք:

-128-ամյա կուսակցության ողջ գործունեության պատմության ընթացքում բազմաթիվ են եղել ժամանակահատվածները, երբ բազմաթիվ կուսակցական գործիչներ և ոչ կուսակցական պետական, ազգային գործիչներ փաստել են սա: Եթե չլիներ այն արժեհամակարգը, որի վրա գործում է Դաշնակցությունը արդեն 128 տարի, և չլիներ այն կազմակերպական ու գաղափարախոսական կուռ կեցվածքը, ապա, ինչպես շատ այլ կուսակցություններ, մենք վաղուց ոչնչացված կլինեինք: Հայ դատի խնդիրը դեռ լուծված չէ, իսկ Հայ դատի խնդիրը հենց ազգի ողնաշարն է, ազգի արժանապատվությունն է և ապագան: Մեզ փորձում են ներկայացնել այնպես, որ մենք տարբեր ուժերի հետ ենք համագործակցել, բայց իրականում այդ ուժերն են համագործակցել Հայաստանի ողնաշարի հետ:

-Ձեզ պետք է հիշեցնեմ, որ հեղափոխության առաջին օրերին Դաշնակցությունը չթաքցրեց իր ոգևորությունը, որ Հայաստանում լավ բան է տեղի ունենում, նկատեց լույս, և հանկարծ այդ լույսից հետ քաշվեց:

-Լավ բան էր տեղի ունենում, որովհետև ժողովրդական շարժումը, հատկապես արդարության հաստատման հարցում, շատ կարևոր է և մշտապես մեր հետապնդած նպատակն է եղել:

-Այսօ՞ր էլ անկեղծորեն մտածում եք, որ մեր երկրին մաքրվել է պետք և դուրս գալ մի զուլալ ճանապարհ:

-Այո՛, մեր երկրին մաքրվել է պետք: Չպետք է տարվել իշխանություն ունենալու մոլուցքով… Անհրաժեշտ է հասկանանք, որ այսօր իմն ու քոնը չէ, մերն է: Համահայկական ռեսուրսը պետք է ճիշտ օգտագործել, ոչ թե այնպես, ինչպես այսօրվա կադրային քաղաքականության մեջ. երիտասարդները, գովելի է, որ ներգրավվեն, բայց չի կարելի, որ մարդը չունենալով փորձ, չհասկանալով համակարգերից՝ կարևոր որոշումներ պետք է կայացնի:

-Դա ավելի հեշտ հարթվող խնդիր է, քան գողության դեմն առնելը:

-Ես լսում եմ այդպիսի բացատրություններ, որ ավելի լավ է լինել երիտասարդ, քան գող, բայց սրանք միմյանց չեն բացառում, կարող է լինել երիտասարդ, բայց գող, և կարող է լինել փորձառու և ոչ գող: Մարդկային որակը ի սկզբանե պիտի հայտնի լինի…

Դաշնակցությանը անհարկի մեղադրում են: Գուցե ինչ-որ անձինք, քաղաքական ուժեր կանխամտածված ուզում են հարվածներ հասցնել ՀՅԴ-ին, բայց, ի վերջո, ճշմարտությունը ջրի երես է դուրս գալու:

-Եվ դա կարտահայտվի ընտրությամբ:

-Կարևոր է, որ ընտրությունը լինի գիտակցված, քարոզարշավի ժամանակահատվածը կարճ է: Մեծ աշխատանք կա իրականացնելու, որպեսզի ընտրողները կարողանան ճիշտ վերլուծության հիման վրա որոշում կայացնեն…

-Երբ ՀՅԴ-ն «Իմ քայլի» հետ հուշագրային հարաբերությունների մեջ էր և իշխանություն էր կիսում, միաժամանակ ՀՀ երկրորդ նախագահին մեղադրանքի առաջադրման փուլն էր, և ՀՅԴ-ից հնչեց, որ եթե Ռ. Քոչարյանը մասնակցի քաղաքականությանը, չի բացառվում նրա հետ համագործակցությունը: Դա շոկային տպավորություն թողեց:

-Դուք ասում եք թերթերից մի քանիսի վերնագրերը, բայց Հրանտ Մարգարյանն այդպիսի արտահայտություն չի արել, նա ասել է, որ մենք չենք բացառում որևէ մեկի հետ համագործակցությունը, եթե մեր օրակարգով՝ պետականության ամրացման օրակարգով է շարժվում: Ընդ որում՝ մենք համագործակցել ենք ոչ թե «Իմ քայլի», այլ Նիկոլ Փաշինյանի հետ, «Իմ քայլը» ծնվեց հետո: Մենք նախկինում խոսում էինք անձ կուսակցությունների մասին, հիմա նույն երևույթն է:

–Փաշինյանը բարձր վարկանիշ ունի, չպետք է մեղադրել այն բանում, որը բնական է:

-Չենք մեղադրում, ավելին՝ ես շատ քաղաքական գործիչների ասում եմ՝ մի՛ խանդեք, մի՛ նախանձեք, Նիկոլ Փաշինյանին հաջողվել է: Հակառակը, անհրաժեշտ է օգնել, որ ժողովրդական այս էներգիան ճիշտ ուղղորդվի:

-Պետք չէ խանգարել:

-Մենք չենք խանգարում դրական գործընթացներին, հակառակը, նույնիսկ առանց իշխանության գիտության, հաճախ օժանդակում ենք: Բայց խնդիրն այն է, որ չեղած տեղը տեսնում են սաբոտաժ, հնարավոր հակահեղափոխություն, ռևանշիզմ, բայց չկա այդպիսի բան: Մենք ասել ենք՝ անցյալի էջը փակված է: