Մեր երկիրը կարեւոր ջրբաժանի առջեւ է
03 Դեկտեմբեր 2018 ՀՅԴ վարկանիշային ցուցակով Քանաքեռ-Զեյթունում վարչական տարածքն ընդգրկող թիվ 1 ընտրատարածքում առաջադրված Գեղամ Մանուկյանը «Սիվիլնեթ»-ի հետ զրույցում խոսել է քաղաքական զարգացումների, ընտրությունների ու քարոզարշավի մասին:Գեղամ Մանուկյանի համոզմամբ` Հայաստանը կարևոր ջրբաժանի առջև է կանգնած. ապրիլ-մայիսի համաժողովրդական շարժումով մի մեծ էջ փակվեց:
Ըստ Գեղամ Մանուկյանի, լավ է, որ այդ էջը փակվեց, բայց այն մաքուր էջը, որը սկսվում է, պետք է կոկիկ ու մաքուր հայերենով գրված լինի:
«Այդպես գրելու համար, պետք է լինի վերահսկողություն, լինի խորհրդատու, դիտողություն անող: Երբ ինքնասիրահարված, ինքնագոհ մթնոլորտ է ձևավորվում, դա լավ տեղ չի տանում: Դրա համար էլ, կարծում եմ, խորհրդարանում շատ անհրաժեշտ են քաղաքական այլընտրանք, քննադատություն ու դիտողություն անող ուժերը»,- ասաց Գեղամ Մանուկյանը:
Նրա խոսքով` այսօրվա իշխանության համար լավագույն ընդդիմությունը, իսկ հայ ժողովրդի համար վատագույն ընդդիմությունը ՀՀԿ-ն է: Եվ շատ հեշտ է լինում բանավեճ կազմակերպել, երբ երկու կողմերում նախկին և ներկա իշխանություններն են: Ավելին` նոր իշխանությունը ցանկանում է, որ ՀՀԿ-ն անցնի խորհրդարան, քանի որ ի պատասխան ՀՀԿ-ի քննադատությունների, կարող է ամեն անգամ հիշացնել իրենց ժամանակները: Բայց երբ որ մեկ այլ ուժ քննադատի, իշխանությունը ստիպված կլինի արդարանալ:
Հարցին, թե ինչու՞ ընտրողը պետք է ընտրի դաշնակցությանը, Գեղամ Մանուկյանը նշեց, որ Դաշնակցության ցուցակում այն մարդիկ են, ովքեր երկար ու դժվարին պայքարի ուղի են անցել: Բացի այդ, ընտրություններին մասնակից կուսակցություների մեծ մասը լիբերալ են, չկա որևէ ուժ, որը սոցիալական հարցերի մասին խոսի իրոք իբրև սոցիալիստ, իբրև սոցիալական արդարության ջատագով, միայն Դաշնակցությունն է:
Զրույցի ընթացքում, խոսելով դաշնակցական նախարարներից մեկի` ԿԳ նախկին նախարար Լևոն Մկրտչյանի մասին, Գեղամ Մանուկյանը կուլիսային փակագծեր բացեց, ասելով, որ ուսուցիչների կրճատման հարցով նախկին վարչապետ Կարեն Կարապետյանը լուրջ վեճ է ունեցել Լևոն Մկրտչյանի հետ, քանի որ վերջինս ամեն կերպ ընդդիմացել է ուսուցիչներին կրճատելու որոշմանը:
«Լավ բացեմ փակագծերը մինչև վերջ: Կարեն Կարապետյանը լիբերալ մոտեցման պատճառով վեճ ունեցավ Լևոն Մկրտչյանի հետ, նրա հետ չէր շփվում: Արծվիկ Մինասյանի հետ կապված լուրջ խնդիր կար: Բայց դաշնակցական նախարարները գործել են սկզբունքով: Լևոն Մկրտչյանը վստահ էր, որ 10 հազար ուսուցիչ չպետք է կրճատվի, ոչ նրա համար, որ հետո հայտարարեր, թե այդ հարցով վիճել է վարչապետի հետ»,- ասաց Գեղամ Մանուկյանը:
Գեղամ Մանուկյանը խոսել է Արցախի խնդրի վերաբերյալ ՀՅԴ դիրքորոշման մասին:
Հարցին` արդյո՞ք քարոզարշավում չի շահարկվում Արցախի հարցը, նա պատասխանել է. «Վստահաբար Արցախի հարցը շահարկվում է, էլ շահարկվելը ո՞նց է լինում, երբ պետության բարձրագույն ղեկավարներից մեկը հայտարարում է` ով էս հարցում հակառակը խոսի, ԱԱԾ-ն ու ռազմական հետախուզությունը կզբաղվի նրանով: Շահարկում է, երբ մարդու բարձրացրած մտահոգություններն ես համարում շահարկում»:
Գեղամ Մանուկյանի խոսքով` անհասկանալի է ձևակերպումը, թե Արցախի խնդրի կարգավորման հարցում ինչպես ժողովուրդը որոշի, այնպես էլ կլինի: «Էդպես չէ, պետք է ունենաս դիրքորոշում, հստակ վերջակետ ու համոզես ժողովրդին, ոչ թե ասես` ժողովուրդը պետք է որոշի»,- ասաց նա:
Հարցին, թե ինչո՞ւ Արցախի խնդրի վերաբերյալ փոթորիկ չեղավ այն ժամանակ, երբ Սերժ Սարգսյանը խոսեց յոթ շրջան տալու մասին, Գեղամ Մանուկյանը պատասխանեց. «Հակառակը` այդ փոթորիկը այն ժամանակ կար բոլորի շուրթերին»:
Իսկ ինչո՞ւ Դաշնակցությունը չշարունակեց համագործակցությունը Նիկոլ Փաշինյանի կառավարության հետ, այս հարցին ի պատասխան` նա նշեց, որ նախ` Նիկոլ Փաշինյանի առաջարկով էր, որ դաշնակցական նախարարները քրտնաջան աշխատեցին կառավարության ծրագրի վրա, սակայն եկավ մի պահ, երբ արտահերթ խորհրդարանական ընտրությունների հարցի շուրջ Նիկոլ Փաշինյանը սկսեց բանակցել ՀՀԿ-ի հետ:
«Հիմնարկ եմ ղեկավարում արդեն 14 տարի: Երբեք թույլ չեմ տվել ինձ իմ նախկին աշխատակցի վերաբերյալ որևէ վատ բան ասել: Արծվիկ Մինասյանն ու Արթուր Խաչատրյանը 5-6 ամիս աշխատել էին Նիկոլ Փաշինյանի ղեկավարած կառավարությունում, մի՞թե կարելի էր այդ մարդկային հարաբերությունները ոտնատակ տալ` հրապարակում նրանց անունները հայտարարելով ու որոշում ստորագրելով»,- ասաց Գեղամ Մանուկյանը:
