–Նշեցիք մի ոլորտ` կրթություն, որը երկար տարիներ ղեկավարել է Դաշնակցությունը:

-Այո, այդ ոլորտը երկար տարիներ ղեկավարել են ՀՅԴ-ականներ, բայց խնդիրներ կան, որոնք դեռևս լուծում չեն ստացել: Կրթությունը բազմաշերտ, բարդ ոլորտ է, դրա հետ առնչվում են գրեթե բոլոր խավերը և բոլոր տարիքային խմբերը, ուստի այն առանձնացնել ու մտածել, որ, առանձին վերցրած, այստեղ կարելի է հրաշքներ գործել, հնարավոր չէ, քանի որ անհրաժեշտ են համակարգային փոփոխություններ: Սա այն ոլորտն է, որին, ցավոք, համախառն ներքին արդյունքի երկու տոկոսից էլ նվազ բյուջետային ֆինանսավորում է հատկացվում: Զարգացած երկրների չափանիշով դա նշանակում է, որ այստեղ կրթություն չկա, որովհետև երեք տոկոսից ցածրի դեպքում միջազգային փորձագետները լուրջ խնդիր են տեսնում: Մենք պետք է շոշափելի ֆինանսական ներդրում կատարենք կրթության ոլորտում, որպեսզի կարողանանք այն աշխուժացնել, ծաղկեցնել, որ հայ աշակերտը, հայ ուսանողը, նախևառաջ որպես Հայաստանի քաղաքացի, որպես հայրենասեր մարդ, թե´ դպրոցից, թե´ ԲՈւՀ-ից, թե´ միջին մասնագիտական ուսումնական հաստատությունից դուրս գա որպես որակյալ մասնագետ:

-Ի՞նչպես հավելյալ միջոցներ հատկացնել, երբ ասվում է, թե պետությունն այդքան հնարավորություններ չունի:

– Միշտ լսել ենք, թե ֆինանսական միջոցներ չկան, այսօր էլ է ասվում` չունենք, չունենք: Բայց, զուգահեռաբար, որոշակի ոլորտներում աշխատավարձեր են բարձրանում: Այսինքն` այնպիսի ոլորտներում են աշխատավարձեր բարձրացնում, որոնք կարևոր են, բայց կրթությունն այն ոլորտն է, որը հեռահար նպատակների համար է: Եթե մենք կրթության ոլորտն աչքաթող ենք անում կամ, ժողովրդական լեզվով ասած, «քրքաշ» քարշ ենք տալիս, սա նշանակում է, որ մենք մեր ապագան մշուշոտ ենք թողնում: Դրա համար է անհրաժեշտ, որ մտածենք ոլորտում ներդրումները կամ ֆինանսավորումը մեծացնելու մասին, որ կարողանանք լավ ապագա կերտել: Գուցե քննադատությունների արժանանա ասածս, սակայն համոզված եմ` կրթության ոլորտն այնքան կարևոր է, որ պետք է այլ ոլորտների ֆինանսավորումը կրճատել և գոյացած միջոցները տրամադրել այս ոլորտին:

-Ասում են` ընտրություններից առաջ քաղաքական ուժերը, քաղաքական գործիչները վատ ծրագրեր չեն ներկայացնում, ինչո՞ւ պետք է ձեզ վստահեն, ձեր ծրագիրն էլ վատ չէ, մնացած 10 ուժերինը՝ նույնպես:

-Դաշնակցությունը տարբերվում է մյուս ուժերից նրանով, որ, բացի ծրագրերը ներկայացնելուց, նաև այդ գործն արել է: Այսինքն` շատ անգամ հաջողել է իր ծրագրերը կյանքի կոչելու գործում: Ես` որպես դաշնակցական, ամենայն պատասխանատվությամբ ասում եմ` վայ այն ուժին, որը փորձում է իր հայրենակիցների հանդեպ անկեղծ չլինել ոչ միայն այսօր` ընտրություններից առաջ, այլեւ ընդհանրապես: Հենց այդ անկեղծությամբ է, որ Դաշնակցությունը տարբերվում է շատ ուժերից: Մենք երբևիցե չենք ձգտել այնպիսի ծրագրային դրույթներով հանդես գալ, որոնք կնմանվեն անիրականանալի հեքիաթի: Մեր ներկայացրած ծրագրերը տարբերվում են մյուս ծրագրերից նաեւ նրանով, որ դրանք քայլերի հերթականություն են ենթադրում, հաջորդականություն: Դրանք իրատեսական են, այլ ծրագրերի պես դեկլարատիվ բնույթ չեն կրում: Ահա սրա համար է, որ Դաշնակցությանը պետք է վստահեն, որովհետև Դաշնակցությունն անկեղծ է իր հայրենակիցների հանդեպ եւ ճանապարհ է ուղենշում: Մենք երբևիցե չենք փորձում սև PR-ով զբաղվել, չենք փորձում քար նետել ուրիշի բոստանը, իսկ այն խնդիրները, որոնք բարձրացնում ենք, ազգային բնույթ ունեն, սոցիալական են, կրթական են, երկրի անվտանգությանն են առնչվում: Մենք չենք փորձում մանր, էժանագին քարոզ իրականացնել:

-Ձեզ վստահում է բնակչության` լավագույն դեպքում 7 տոկոսը:

-Չի կարելի ասել, որ 7 տոկոսն է վստահում, երբեմն եղել է ավելի նվազ, եղել է, որ կրկնակին են քվեարկել: Իհարկե, այդ 7 տոկոսը մտածելու տեղիք տալիս է, բայց երբ վերլուծում ենք, միշտ էլ հանգում ենք այն համոզմանը, որ հայ ընտրողը մեզանից միշտ էլ ավելին է պահանջում, քան տալիս է: Սա էլ հետաքրքիր է որովհետև, անկախ տված քվեից, պահանջում է 100 տոկոսի ծառայություն: Սակայն ընտրողը պետք է գիտակցի, որ եթե վստահության քվեն սահմանափակ է, չի կարելի ծրագրերի ու ակնկալիքների ամբողջական իրականացում պահանջել:

-Ինչպե՞ս եք գնահատում քարոզարշավի ընթացքը, հասցնո՞ւմ եք ձեր ծրագրերը ներկայացնել ընտրողին:

-Որպես ռեյտինգային թեկնածու` այո: Տարբեր մեթոդներով փորձում ենք մեր ծրագրերը տեղ հասցնել, բայց 21-րդ դարին ոչ հարիր արարքները, ինչպիսիք են, օրինակ, մյուս ուժերի, թեկնածուների պաստառները պոկելը կամ մյուս ուժերի ներկայացուցիչներին սևացնելը և այլն, պետք է բացառվեին գոնե այս ընտրությունների ժամանակ, որովհետև իշխանությունը խոստանում էր, որ ընտրությունը լինելու է աննախադեպ: Սակայն ընտրությունը միայն բուն քվեարկությունը չէ: Ընտրությունը նաև նախընտրական քարոզչությունն է, և ընտրության հետ դրան էլ պետք է հավաքական գնահատական տանք: Ցավոք, տեսնում ենք, որ շատ բան չփոխվեց` Երևանի ավագանու ընտրությունների համեմատ: Փաստորեն, ուժերը, այստեղ խոսքը ոչ միայն իշխող ուժի մասին է, շարունակում են սև PR-ի մեթոդները, անհարկի մեղադրանքները, անհատներին թիրախավորելը: Այս պայմաններում նաև ընտրազանգվածի ուշադրությունն են շեղում, ավելի ենթակայական կարծիք է նրանց մոտ ձևավորում: Սա է, որ պետք է բացառեինք, ինչը, ցավոք, տեղի չունեցավ: Այս առումով մենք կաղացինք և կարող ենք արձանագրել, որ ցանկությունները չիրականացան`ժողովրդավարական աննախադեպ ընտրություն չի լինի:

-Դուք ՀՅԴ ԳՄ անդամ եք, ի՞նչ կասեք վարչապետի պաշտոնակատար Նիկոլ Փաշինյանին, որը սպառնաց ՀՅԴ-ին ԱԱԾ-ով:

-Շատ են փորձել և ոչ միայն փորձել են, այլև սպառնալիքները դարձրել են իրենց համար գործողության ծրագիր, բայց Դաշնակցությունը կա, եղել է և մնալու է` մինչև ազատ, անկախ, միացյալ Հայաստան չունենանք, մինչև հայահավաք տեղի չունենա, մինչև հայը Միացյալ Հայաստանում իրեն մարդավայել չզգա, չապրի, այն նոր Հայաստանում, որտեղ հաստատված կլինեն սոցիալական արդարությունը, ժողովրդավարական արժեքները՝ մարդկանց իրավունքներն ու ազատությունները կլինեն գերակա արժեք: Անհարկի հերթական քայլերն են կատարվել, որոնք ոչինչ չեն տալու, և ինչպես նշել է ՀՅԴ Բյուրոյի ներկայացուցիչը, մենք մեր քարոզարշավը շարունակելու ենք նույն ոգևորությամբ, նույն բնականոն ընթացքով և չենք իջնելու այն մակարդակին, որ էժանացնենք մեր քարոզչությունը:

Ա.Ա.