Համազգային հայ կրթական եւ մշակութային միության Կենտրոնական վարչության հովանավորությամբ Համազգայինի Երևանի գրասենյակը հուլիսի 25-ին կազմակերպեց «Ջավախքյան մեղեդիներ» խորագրով համերգ։ Համերգը նվիրված էր Համազգայինի կարևորագույն հայրենաճանաչողական ծրագրերից մեկի` ուսանողական հավաքի 30 ամյակին և հայ մեծանուն բանաստեղծ Վահան Տերյանի ծննդյան 140 ամյակին։

Համերգային երեկոյի ընթացքում հնչեցին հայոց Ջավախք աշխարհի գուսանների` Ջիվանու և Հավասու, ինչպես նաև Վահան Տերյանի մի շարք բանաստեղծությունների հիմամբ գրված երգեր` սիրված երգիչներ Մավր Մկրտչյանի, Վարդան Բադալյանի, Գուրգեն Դաբաղյանի, Աբել Աբելյանի, Արեգնազ Մկրտչյանի կատարմամբ և «Նովա» ազգային նվագարանների համույթի ուղեկցությամբ։

Համերգային ծրագիրը բացվեց Համազգայինի Կենտրոնական վարչության անդամ Արտաշես Շահբազյանի խոսքով։

«Մեզ վիճակված է ապրել հայոց պատմության ճակատագրական ժամանակահատվածում, երբ կռիվը մղվում է մեր ազգային արժեքների և ինքնության պահպանման դեմ։ Այս առումով սեփական մշակույթին կառչելն ու պահպանելը ձեռք է բերել քաղաքական իմաստ։ Եւ եթե մենք այս անդունդից պետք է վեր բարձրանանք դեպի ազգային նոր վերածննդի բարձունքները, ապա այդ վերելքը, առաջին հերթին, մշակույթի ու կրթության հունով է ընթանալու»,- շեշտեց Արտաշես Շահբազյանը։

Ջավախքի գուսանների մասին խոսք ասաց «Արեւմտահայոց հարցերի ուսումնասիրության կենտրոնի» տնօրեն, հայագետ Հայկազուն Ալվրցյանը` անդրադառնալով ջավախքյան գուսանական արվեստի ստեղծման պատմությանն ու ակունքներին։

Վահան Տերյանի թոռ, գրականագետ Գևորգ Էմին Տերյանն էլ անդրադարձավ Վահան Տերյան բանաստեղծի գործունեությանը, ինչպես գրականության, այնպես էլ ` հասարակական-քաղաքական կյանքում։

Գրական-երաժշտական երեկոն հանդիսատեսն ընդունեց բուռն ծափերով և ջերմ ոգևորությամբ։

Համազգայինի Երևանի գրասենյակ