Հայ դատը շարունակում է աջակցել ԱՄՆ-ի իշխանությունների կողմից այնպիսի բանաձեւերի ընդունմանը, որոնք ուղղված են Հայաստանի անվտանգության պաշտպանությանը և Ադրբեջանից հաշվետվություն պահանջելուն՝ իրականացված ցեղասպանական գործողությունների համար։

«Հայաստանում խաղաղությունը կարող է լինել միայն արդարության վրա։ Եթե դիմացդ երկիր է, որը շարունակում է ցեղասպանական գործողությունները, շարունակում է Երևանը ադրբեջանական հայտարարել, շարունակում է զորք պահել Հայաստանի տարածքներում, ապա երկարատև խաղաղությունն անկարելի է»,- «Փաստինֆո»-ի հետ զրույցում նշել է ԱՄՆ Հայ դատի հանձնախմբի մամուլի խոսնակ Եղիսաբեթ Չուլջյանը։

Նրա փոխանցմամբ՝ մեծ աշխատանք է տարվում ռազմագերիների ազատ արձակման ուղղությամբ, ինչպես նաև Արցախի ժողովրդի վերադարձի իրավունքի պաշտպանության համար։

ԱՄՆ-ի իշխանությունների քննարկմանը ներկայացվող բանաձևերը նպատակ ունեն՝ կանխել ամերիկյան ռազմական օժանդակությունը Ադրբեջանին, կենտրոնանալ ռազմագերիների վերադարձի վրա, պաշտպանել Արցախի ժողովրդի վերադարձի իրավունքը, բարձրացնել Ադրբեջանի նկատմամբ պատժամիջոցների հարցը։

«Այս բանաձևերը զորակցություն ունեն թե՛ դեմոկրատ, թե՛ հանրապետական կոնգրեսականների կողմից»,- ասել է խոսնակը։

Մասնավորապես՝ անցյալ տարվա օգոստոսին ավելի քան 80 կոնգրեսականներ նամակ են հղել Սպիտակ տանը՝ նշելով, որ ռազմագերիների հարցը պետք է առանցքային դեր խաղա ԱՄՆ-Ադրբեջան հարաբերություններում։

«Սպիտակ տունը պատասխան նամակով հանմաձայնել է, որ հայ ռազմագերիների ազատման հարցը առաջնահերթություն է, ինչպես նաև Արցախի ժողովրդի վերադարձի հարցը շարունակվող բանակցությունների շրջանակում իրենք անհրաժեշտաբար առաջ են մղելու։ Մենք դա համարում ենք դրական քայլ, բայց աշխատանքը շարունակվում է»,- ընդգծել է Չուլջյանը։

Նրա խոսքով՝ այս պահին Կոնգրեսում շրջանառության մեջ գտնվող հիմնական աշխատանքը կենտրոնացած է երեք բանաձևերի շուրջ՝ Հայաստանի անվտանգության ապահովում և Ադրբեջանի ագրեսիայի կանխում Արցախի ժողովրդի վերադարձի իրավունքի պաշտպանություն 907-րդ բանաձևի ուժեղացում՝ Ադրբեջանին ռազմական օգնությունը սահմանափակելու համար:

Բացի այդ, քննարկվում է նաև մեկ այլ նախաձեռնություն՝ կապված Հայոց ցեղասպանության թեմայի դասավանդման հետ։

«Հաջորդ շաբաթների ընթացքում մեր աշխատանքը էլ ավելի կընդլայնվի»,- եզրափակել է Հայ դատի հանձնախմբի մամուլի խոսնակը։

«Փաստինֆո»- ի հարցին, թե որքանով է բարդացել վերջին տարիներին Հայ դատի հաձնախմբի աշխատանքը և արդյոք ճիշտ է, որ կա ծավալված արշավ Հայ դատի հանձնախմբի դեմ, Չոուլջյանն ասաց, որ արշավ միշտ էլ եղել է, վերջին տարիներին առավել շատ՝ ընդգծելով, որ առաջիկա ամիսներին սպասվում է Հայ դատի դեմ հարձակումների և քարոզչական արշավների ակտիվացում։

«Հայաստանում ընտրությունները մոտենում են, կփորձեն հարվածել Դաշնակցությանը, և դրա հետ մեկտեղ՝ Հայ դատի հանձնախմբի դեմ արշավը կուժեղանա։ Բայց մենք շատ հստակ բացատրում ենք, թե ինչ խնդիրներ ենք տեսնում Հայաստանի ու Ադրբեջանի շուրջ ծավալված այդ խաղաղության օրակարգի շուրջ և, թե ինչու ենք մտահոգված ու որքան էլ դժվարացած լինի գործելն աշխատանքները շարունակվում են »,- նշել է նա։