Այսօր ապրիլյան քառօրյա պատերազմի 10-րդ տարելիցն է: Այդ կապակցությամբ՝ ՀՅԴ Հայաստանի ԳՄ անդամները, «Հայաստան» խմբակցության պատգամավորները, Արցախի իշխանության եւ քաղաքական ուժերի ներկայացուցիչներ, բազմաթիվ հայրենակիցներ այցելել են Եռաբլուր զինվորական պանթեոն` ծաղիկներ խոնարհել Հայրենիքի պաշտպանության համար նահատակված հայորդիների հիշատակին։

ՀՅԴ Հայաստանի ԳՄ անդամ, ՀՀ ԱԺ «Հայաստան» խմբակցության պատգամավոր Գեղամ Մանուկյանը լրագրողների հետ զրույցում խոսելով Փաշինյան-Պուտին հանդիպումից, ասաց. «Եթե վաղը Պուտինն ասի՝ Զանգեզուրը, Սյունիքն Ադրբեջանի տարածք է, ինքը պետք է այդպես ճանաչի՞: Ինքն իր ամպուլայի մեջ է, բոլորը մեղավոր են, բացի իրենցից»

«Իրականում և՛ հպարտության, և՛ նաև դավաճանվածության զգացում կա, որովհետև այսօր կնկատեք, որ գրեթե որևէ բան պետական մակարդակով չի լինելու, բայց ապրիլյան քառօրյայի նահատակներն իրենց ինքնազոհաբերությամբ, և ընդհանրապես հայ ժողովուրդն այդ օրերին իր կազմակերպվածությամբ մի հերոսական էջ գրեց և նաև կանխեց Ադրբեջանի լայնածավալ օկուպացիայի փորձը»,-նշեց ընդդիմադիր պատգամավորը:

Արցախի նախագահ Սամվել Շահրամանյանը լրագրողների հետ զրույցում անդարադառնալով Նիկոլ Փաշինյանի այն հայտարարությանը, թե «արցախցիները փախել» են, հայտարարեց. «Կոչ եմ անում մեր հասարակությանը, մեր զոհված նվիրյալների հարազատներին, այն անձանց, ովքեր ներդրում ունեն արցախյան գոյամարտի մեջ՝ չտրվել նման սադրանքների, որովհետև նման խոսույթներն ունեն մեկ նպատակ՝ պառակտել ու սերմանել մեր հասարակության մեջ անհանդուրժողականություն»:

Շահրամանյանի խոսքով՝ հենց այս իշխանության գործողությունների հետևանքով է, որ արցախցիներն այսօր հայտնվել են նման իրավիճակում։ «Արցախցիները փորձում են իրենց վերադարձի իրավունքն օրակարգում պահել»,- ասաց նա:

ՀՅԴ անդամ, ԱԺ «Հայաստան» խմբակցության պատգամավոր Արթուր Խաչատրյանը իր հերթին, լրագրողների հետ զրույցում նշեց. «Այս իշխանություններն այդպես էլ չհրապարակեցին Ապրիլյան և 44-օրյա պատերազմների զեկույցները՝ թեկուզ այն, ինչը գաղտնիք չէ, որպեսզի հանրությունը չկարողանա կարդալ և համեմատել, տեսնել թե ինչ եղավ 2016 թվականին, և ինչ եղավ 2020-ին։ Այն քաղաքական ուժը, որն ասում էր՝ պետք է բացառենք փոխզիջումները, այսօր ասում է՝ Արցախյան շարժում այլևս չկա, այն պարտություն էր Հայաստանի համար և թոկ էր, որը պետք էր կտրել, որ մենք ունենաք անկախություն։ Իրենց օրոք Արցախն Ադրբեջանի ներքո է, բայց անկախություն մենք չունենք»:

«Արցախի մեր հայրենակիցներրը ենթարկվել են էթնիկ զտման, որը ցեղասպանության դրսևորում է, և հիմա պայքարել ցեղասպանության հետևանքների վերացման, արցախցիների վերադարձի իրավունքի դեմ՝ նշանակում է արդարացնել ադրբեջանցիների գործած ցեղասպանությունը։ Եվ այստեղ Ալիևի և Փաշինյանի շահերը հերթական անգամ համընկնում են»,- ասաց Արթուր Խաչատրյանը։

Նա քննադատեց Պուտինի հետ հանդիպմանը Փաշինյանի հնչեցրած այն միտքը, թե իբր Արցախը Ադրբեջանի կազմում ճանաչվել է այն բանից հետո, երբ ՌԴ բարձրագույն ղեկավարությունը երկու անգամ հրապարակայնորեն նման հայտարարություն է արել։

Փաշինյանը պարտություն կրելով, ոչ միայն այդ պարտության մեղքը ուրիշներին է վերագրում, այլ նաև անամոթաբար աղճատում է պատմական իրականությունը, բանակցային ողջ գործընթացը»,–ասաց Արթուր Խաչատրյանը: