Նախկին նախարարը նշեց, որ հիմա արդեն շատ մարդ հետաքրքրված է ոչխարաբուծությամբ, բայց նշեց, որ դեռ մարզպետ եղած ժամանակ ասում էր, որ սովորական հովիվ գտնելը խնդիր է: «Եթե մենք ուզում ենք էականորեն խթանել գյուղատնտեսությունը, պետք է հասկանանք, թե ինչ ուղղությամբ ենք գնում, ինչպես ենք տրամադրում պետական աջակցությունը, հետո արդեն հասկանանք, թե որքան գումար է պետք ռեալ փոփոխություն առաջացնելու համար»,- ասաց նա:

Արթուր Խաչատրյանը նշեց, որ գյուղատնտեսության նախարարության գործելաոճի մեջ փոփոխություն կառաջարկեր, և ասաց, որ ավելի ակտիվ քաղաքականության անցնելու անհրաժեշտություն է տեսնում: «Անհրաժեշտ է պարզ սուբսիդավորումից հրաժարում և քաղաքականության մշակում, որ մենք պատրաստ ենք աջակցել այն հողօգտագործողներին, ովքեր վարում են այն քաղաքականությունը, որն առաջարկում է նախարարությունը, և որը արդյունավետ է՝ բարձրարժեք մշակաբույսերի անցում, ճիշտ խորհրդատվություն: Այսինքն՝ ուղղորդել գյուղացուն, տալ այն սերմացուն, որ նախարարությունն ավելի ճիշտ է համարում»,- ասաց նա:

Ինչ վերաբերում է ԾԻԳ-երի գործունեությանը, ապա նախկին նախարարն ասաց, որ ձեռնպահ կմնա գնահատական տալ դրանց գործունեության վերաբերյալ: Նա ասաց, որ Կառավարության մոտեցումն այնպիսինն էր, որ այդ կառույցները միավորվեն Կառավարության մեջ և դառնան նախարարության աշխատող:

Հեղինակ Լիանա Առաքելյան