ՀՅԴ Բյուրոյի նորընտիր ներկայացուցիչ Հակոբ Տեր-Խաչատուրյանը և ՀՅԴ Բյուրոյի նախագահ Արմեն Ռուստամյանը հանդես են գալիս ասուլիսով:

Հակոբ Տեր-Խաչատուրյանն իր խոսքում նշեց, որ ՀՅԴ 33-րդ Ընդհանուր ժողովն ավարտեց իր աշխատանքները Ստեփանակերտում: «Նորընտիր Բյուրոն ունեցավ ամենաբարձր մակարդակի հանդիպումներ Արցախի ղեկավարության հետ և, վերադառնալով Հայաստան, անմիջապես նույն տեսակի հանդիպումներ ունեցավ ՀՀ նախագահի և վարչապետի հետ»,- ասաց նա:

Տեր-Խաչատուրյանը նշեց, որ հանդիպումների ժամանակ հայտնել են գործակցության պատրաստակամություն` ի շահ մեր հայրենիքի, երկու պետությունների և ի խնդիր Հայ Դատի:

Արմեն Ռուստամյանը, անդրադառնալով ՀՅԴ 33-րդ Ընդհանուր ժողովին, նշեց, որ ինչպես ՀՅԴ բոլոր ժողովները, այնպես էլ այս մեկը եղավ բուռն ու բովանդակային: «Այս Ընդհանուր ժողովը ՀՅԴ-ն որոշեց անցկացնել Արցախում, որն ունի լուրջ խորհուրդ: Մենք համարում ենք, որ հիմնական օրակարգային հարցը եղել և մնում է Արցախի հիմնախնդրի հայանպաստ լուծումը»,- նշեց նա և շեշտեց, որ հայկական երկրորդ պետությունում Ընդհանուր ժողով գումարվում էր առաջին անգամ, և դա խորհրդանշական էր:

«Դաշնակցությունն իր համասփյուռ կառույցով ներկա է Արցախում, կանգնած է Արցախի կողքին` ի պաշտպանություն Հայ դատի հանգրվանի: Բացի այդ` այս ժողովը եկավ փարատելու բոլոր կասկածները, թե իբր Դաշնակցությունը տարբեր շերտեր ունի, թե իբր շարքերի և ղեկավարության միջև կան տարաձայնություններ: Բյուրոյի կազմի ընտրությունն էլ, որ տեղի ունեցավ մեկ քվեարկությամբ` 2/3-ից ավելի ձայներով, եկավ փաստելու, որ ՀՅԴ-ն միակամ է և պատրաստ ստանձնել մարտահրավերները, և այդ առաքելությունն ունի մեր կուսակցությունը»,- ասաց Ռուստամյանը:

Նշենք, որ ՀՅԴ-ն 33-րդ Ընդհանուր ժողովից հետո հայտարարություն էր տարածել, որում նշվում էր նաև, որ Հայաստանի և Արցախի միջև ռազմաքաղաքական դաշինքի մասին համաձայնագրի` սեղմ ժամկետներում կնքումը հրատապ անհրաժեշտություն է:

Հարցին, թե ի՞նչ է իրենից ենթադրում այդ ռազմաքաղաքական դաշինքը և ինչո՞ւ է հենց այսօր Դաշնակցությունը խոսում այդ մասին` ՀՅԴ Բյուրոյի նախագահ Արմեն Ռուսատմյանը պատասխանեց, որ Դաշնակցությունն այդ հարցը բարձրացրել էր վաղուց:

Ռուստամյանի խոսքով` առնվազն նրանք, ովքեր մի քիչ երկար կենսագրություն ունեն քաղաքական կյանքում, կփաստեն, որ ռազմաքաղաքական դաշինքի հարցը Դաշնակցությունը վաղուց է բարձրացրել, դրա մասին խոսել են երևի 10 տարուց ավել:

«Միշտ դրա անհրաժեշտությունը կարևորել ենք: Ռազմաքաղաքական դաշինքն, ըստ էության, մի կողմից` չի թուլացնի մեր դիրքերը բանակցային գործընթացում, մյուս կողմից` կարձանագրի Հայաստանի և Արցախի անմիջական կապը: Այսինքն` այն ամենն ինչ դե ֆակտո ունենք, դե յուրե իրավական դաշտ բերելու իրավական հարցն է լուծելու ռազմաքաղաքական դաշինքը: Այս խնդիրների հետապնդման հետ կապված կոնկրետ քայլեր ենք արել: Եթե հիշեք, ժամանակին դեռ նախագահական ընտրություններին, երբ Վահան Հովհաննիսյանն առաջադրել էր իր թեկնածությունը, խոսել էինք չհարձակվելու մասին Ադրբեջանի հետ ակտ կնքելու վերաբերյալ: Իսկ ապրիլյան պատերազմի հետևանքներով մեր առաջարկությունն ընդունեց իշխանությունը, հանձնարարություն տվեց ԱԳՆ-ին, որ պատրաստի փաստաթուղթ»,-ասաց Ռուստամյանը` հավելելով, որ այդ ամբողջ աշխատանքների մեջ Դաշնակցությունը միշտ ներգրավված է եղել:

Ռուստամյանի հավաստմամբ` ՀՅԴ-ն ունի իր պատկերացումները, թե ինչպես պետք է լինի այդ ռազմաքաղաքական դաշինքը, և կարծում են, որ այսօր էլ իսկապես ռազմաքաղաքական դաշինքի կնքումն անհրաժեշտություն է, ավելին` այդ անհրաժեշտությւոնը վաղուց էր հասունացել: «Այսօր ունենք լուրջ սպառնալիքներ Արցախի անվտանգության հետ կապված` նոր պատերազմ հրահրելու Ադրբեջանի մտադրությունների առումով: Պետք է հստակ արձանագրենք, որ հարձակում Արցախի վրա, նշանակում է` հարձակում Հայաստանի վրա: Մեր միասնական անվտանգության համակարգի վերաբերյալ մենք մատնանշումներ արել ենք նախորդ բոլոր համագործակցության պայմանագրերում: Այսինքն` բացարձակապես անհիմն են, և ես բացատրություն չեմ տեսնում այն հայտարարությունների մեջ, թե Դաշնակցությունը նոր է հիշում սրա մասին: Գուցե ուղղակի ոմանց պետք է այդպես ներկայացնել»,-ասաց Արմեն Ռուստամյանը:

Նա նշեց նաև, որ ռազմաքաղաքական դաշինքի կնքումը ՀՅԴ-ի հետևողական մոտեցումն է եղել և այսօր էլ դրա մասին խոսում են` այն գործնական դարձնելու համար: ՀՅԴ Բյուրոյի նախագահի խոսքով` ռազմաքաղաքական դաշինքի կնքման վերաբերյալ Դաշնակցությունն արդեն իսկ հանդիպել ու զրուցել է ինչպես Արցախի նախագահի, այնպես էլ ՀՀ վարչապետի հետ. «Գտնում ենք, որ պետք է այդ դաշինքի կնքման` ճիշտ համաձայնեցված քայլերը պայմանավորվենք, ճանապարհային քարտեզ մշակենք ու գնանք դրա կնքմանը: Կարծում եմ` սա պետք է դառնա մեր համաժողովրդական պահանջը` արցախահայության, Հայաստանի և Սփյուռքի, որպեսզի մենք միասին արձանագրենք մեր միակամությունը` պաշտպանել մեր համահայկական շահերը` Արցախն ու Հայաստանը միասին վերցրած»:

ՀՅԴ Բյուրոյի նորընտիր ներկայացուցիչ Հակոբ Տեր-Խաչատուրյանն էլ նշեց, որ Հայաստանի և Արցախի միջև ռազմաքաղաքական դաշինքի կնքման մասին Դաշնակցության համաժողովն էլ հստակորեն արտահայտվեց` որդեգրելով նախկին մոտեցումները:

«Համաժողովն անհրաժեշտ գտավ, որ ապրիլյան քառօրյայից հետո և ներկա իրավիճակից ելնելով` մենք պետք է պատրաստ լինենք պատերազմական գործողությունների` որևէ ժամանակ սկսվելուն: Ռազմաքաղաքական դաշինքն իրավական հարթության վրա է բերում Արցախի անվտանգության հարցում Հայաստանի դերակատարությւոնը»,-ասաց Տեր-Խաչատուրյանը:

Ի՞նչ գործիքակազմով է պատրաստվում Դաշնակցությունն իր գործունեությունը շարունակել և արդյո՞ք առաջիկայում ՀՅԴ-ն կհամագործակցի ՀՀԿ-ի հետ. հանդիպման ժամանակ նման հարց ուղղվեց ՀՅԴ Բյուրոյի նախագահ Արմեն Ռուստամյանին:

Ի պատասխան Ռուստամյանը հիշեցրեց, որ իրենք, երբ մասնակցում էին այս ընտրություններին, բազմիցս կրկնել են, որ Դաշնակցության հետագա գործունեությունը բացարձակապես կապված չի լինելու ընտրությունների արդյունքների հետ:

Ռուստամյանի խոսքով` Դաշնակցությունը լինի Ազգային ժողովում, թե ոչ, իր գործունեությունը շարունակվելու է: «Մենք հայ իրականության մեջ իսկապես կայացած` եթե չասեմ միակ, ապա ամենակայացած կուսակցությունն ենք: Ոչ միայն կուսակցություն ենք իր ներկայությամբ Հայաստանում, այլ չկա մեկ այլ կուսակցություն, որ ներկայություն ունենա բոլոր այն տեղերում, որտեղ հայությունն իր ներկայությունն արձանագրել է` Արցախ և Սփյուռքի բոլոր մասերում: Մեր գործիքակազմը մեր ծրագրից է բխում, մեր ուժի աղբյուրը մեր ժողովուրդն է, համասփյուռ հայությունը, և պայմանավորված չէ մանդատներ ունենալ-չունենալով»,-ասաց նա:

ՀՅԴ Բյուրոյի նախագահի խոսքով` Դաշնակցությունը 70 տարի անգամ Հայաստանում էլ չի եղել, վերընձյուղվել է 90-ականներին` հայտարարելով իր ներկայությունը Հայաստանում և չլինելով անգամ Հայաստանում` շարունակել է իր գոյությունը: Ռուստամյանը հիշեցրեց, որ եղել է ժամանակ, որ ՀՅԴ-ն խորհրդարանում էլ չի եղել, մասնավորապես 90-ականներին. «Մենք հետո այնտեղ ունեցանք խումբ, երբ բոլորը տեսան, որ կա ֆորսմաժորային իրավիճակ, ազգային խնդիրներին հետամուտ լինելու անհաժեշտություն, և խորհրդարանում ձևավորվեց մեծաքանակ պատգամավորական խումբ: Մենք այդ բոլոր փուլերն անցել ենք և վստահ ենք` եթե մեր գաղափարները կենսունակ են, մեր ասելիքը հստակ է և բխում է ժողովրդի շահերից, Դաշնակցությունն անելիք և ուժի աղբյուր ունի»:

Ինչ վերաբերում է ՀՀԿ-ի հետ համագործակցելուն, ապա Ռուստամյանը նշեց, որ իրենք ժամանակին հրապարակել էին հայտնի 7 կետերն ու ասել, որ Դաշնակցությունը կհամագործակցի բոլորի հետ, ովքեր կընդունեն այդ 7 կետերը:

«Այս փուլում հստակ արձանագրել ենք` Հայաստանը կանգնած է լուրջ մի ջրբաժանի առաջ. մենք պետք է համախմբենք մեր ուժերը և գիտենք, որ ունենք առնվազն երկու պետություն, որ թշնամական վերաբերմունք ունի Հայաստանի նկատմամբ` թուրք-ադրբեջանական տանդեմի մասին է խոսքը: Մեր կարծիքով` Հայաստանն ինչպիսի իշխանություն էլ ունենա, այդ օբյեկտիվ պայմաններում պետք է գործի` կա պատերազմական վիճակ և կա շրջափակման վիճակ: Հայաստանը պետք է զարգանա` չզիջելով, այսինքն` մենք պետք է հստակ հասկանանք այն, որ Հայաստանի զարգացումը պետք է ապահովվի այն, որ մենք չզիջենք մեր ազգային նպատակները, սերունդների շահերը` Արցախում և հայ-թուրքական հարաբերություններում»,-ասաց Ռուստամյանը:

Նա հավաստիացրեց, որ ով կընդունի հայեցակարգային այդ մոտեցումը` զարգանալ չզիջելով, պատրաստ են ամենասերտ համագործակցության, իսկ ով չի ընդունի, կլինեն ամենաառճակատվող ընդդիմությունն այդ քաղաքական ուժին:

Ռուստամյանը հիշեցրեց 1990-ականները, երբ որոշում կայացվեց, որ եթե Հայաստանն ուզում է զարգանա, պետք է զիջի:

«Հայտնի խոսքը Լևոն Տեր-Պետրոսյանի հիշում եք` Սերգո ջան, լավ չես ապրի, քանի Ղարաբաղի խնդիրը չի լուծվել: Մենք էլ ասում ենք` Ղարաբաղի խնդիրը լուծելը մեր ազգային արժանապատվության հարցն է: Մեր ձեռքբերած նվաճումը` Արցախի ազատագրած տարածքներն ու հաղթանակը, մեր գլխավոր նվաճումն է և սրանից զիջում չի կարելի թույլ տալ: Սա նշանակում է` համապատասխան ներքին և արտաքին քաղաքականություն մշակել: Արտաքին քաղաքականության մեջ պաշտպանել Արցախի ինքնորոշման իրավունքը, գնալ Արցախի հիմնահարցի լուծման այն ճանապարհով, որն Արցախի ժողովուրդը հանրաքվեով ու Սահմանադրությամբ հռչակել է: Իսկ ներքին տրամադրության մեջ սա ենթադրում է, որ մենք պետք է ունենանք այնպիսի մոտեցում, որ այդ 42 000 քկմ-ն` Հայաստան և Արցախ, ոչ թե բեռ է, որից պետք է ազատվել, այլ ռեսուրս է զարգացման, ինչը մեզ բավարար է, որ մենք ինքնուրույն զարգանանք»,-ասաց Ռուստամյանը` հավելելով, որ բանակն էլ ոչ թե ծանրաքաշ վագոն է մեր գնացքի մեջ, այլ լոկոմոտիվ պետք է դառնա.«Դրա համար ռազմաարդյունաբերական համալիրը պետք է զարգացվի, բանակը դառնա ոչ թե սպառող, այլ նպաստի տնտեսության զարգացմանը և, ամենակարևորը, ինքնաբավությունը պետք է մեծացվի: Պետք է հասնենք նրան, որ ինքնաբավ լինենք հնարավորինս շատ ապրանքատեսակների հետ կապված»:

Նա տեղեկացրեց, որ վերահիշյալ հարցերի վերաբերյալ իրենք խոսել են նաև վարչապետ Նիկոլ փաշինյանի հետ հանդիպման ժամանակ:

Ըստ ՀՅԴ Բյուրոյի նախագահի` եթե այս մոտեցումները կդառնան պետական ծրագիր, կառավարության ծրագիր, պատրաստ են ամբողջությամբ համագործակցել:

Եթե Հրանտ Մարգարյանն իր թեկնածությունը բացառած չլիներ, այս ընդհանուր ժողովը որպես Բյուրոյի անդամ կընտրեր նաև նրան. հայտարարեց ՀՅԴ Բյուրոյի նորընտիր ներկայացուցիչ Հակոբ Տեր-Խաչատուրյանը:

Հարցին` ՀՅԴ սխալներն արդյո՞ք պայմանավորված էր Հրանտ Մարգարյանի գործունեությամբ, նա պատասխանեց. «Հրանտ Մարգարյանը ՀՅԴ Բյուրոյի ներկայացուցիչն էր վերջին 19-20 տարիների ընթացքում: ՀՅԴ-ն չունի սկզբունք միանձնյա ղեկավարության շուրջ համախմբվելու»:

Հակադարձմանը, թե Հրանտ Մարգարյանն իր ելույթում հայտարարեց, որ իր դեմ կային խմորումներ, Խաչատուրյանը նշեց, որ կցանկանար մի քանի բան հստակեցնել: «ՀՅԴ-ը միշտ գործել է հավաքական ղեկավարության սկզբունքով իր բոլոր մարմինների մեջ: Անշուշտ, անձնական խառնվածքի իմաստով կարող են տպավորություններն այլ լինեն, բայց իրականությունն այն է, որ որոշումները կայացված են եղել հավաքականորեն, զետեղված են ընդհանուր ժողովների, ընդհանուր ռազմավարության մեջ: Ընդհանուր ժողովի որոշումներն էլ պատրտադիր են բոլոր շարքային անդամենրի և մարմինների համար: Պետք է ասեմ, որ Հրանտ Մարգարյանը վայելում էր հարգանքը ոչ միայն Բյուրոյի կամզում իր գործունեությամբ: Դրանից առաջ նա եղել է Հայաստանի ԳՄ անդամ և ղեկավար, Արցախի ազատամարտի մասնակից և Իրանի ու Լիբանանի մեջ քաղաքաիցական պատերազմների ժամանակ այդ համայնքների հայության պաշտպան»,- ասաց նա և ընդծեց. «Ուստի չպետք է կասկած լինի, թե սա աշխատանք էր որպեսզի Ընկեր Հրանտը մնա հեռու: Նա ցանկացավ չառաջադրել իր թեկնածությունը, և որպեսզի կանխի որևէ կասկած այդ հայտարարությունը կատարեց ժողովի բացման խոսքի մեջ»:

Ֆիլմերով չէ, որ պետք է տեղեկանանք, թե ինչ է կատարվել 2008-ի մարտի 1-ին. մենք մարտի 1-ին եղել ենք, տեսել ենք` ինչ է կատարվել, երևույթը գնահատել ենք շատ հստակ: ասուլիսի ժամանակ ասաց ՀՅԴ Բյուրոյի նախագահ Արմեն Ռուստամյանը:

«Մենք պաշտպանել ենք ոչ թե Ռոբերտ Քոչարյանին՝ որպես անձի, այլ՝ արդարադատությունը, և մենք այդտեղ խնդիր ենք տեսնում: Այն ձևով, որ մեղադրանք է ներկայացվել Ռոբերտ Քոչարյանին, հիմա էլ մյուսներն են ընդգրկվում այդ պրոցեսի մեջ, այսպես ասած՝ մայր գործի մեջ, սա մեզ մոտ մեծ մտահոգություններ է առաջացնում` մեր երկրում արդարադատության իրականացման մասով: Արդարադատությունը չպետք է ընտրովի լինի, արդարադատությունը չպետք է տպավորություն ստեղծի, թե հաշվեհարդարի կամ վենդետայի նպատակ է հետապնդում: Արդարադատությունն առաջին հերթին պետք է վերաբերի նրան, որ բացահայտվեն տասը զոհերի մեղավորները: Երբ այս ձևով է դրվում մեղադրանքը, փորձ է արվում այդ խնդիրը երկրորդական դարձնել: Դրվում է մի մեղադրանք, որը պետք է ապացուցվի, և հետո միայն գտնենք մեղավորին, այսինքն` տվել ենք մի ձևակերպում՝ սահմանադրական կարգի տապալում, որը դեռ պիտի ապացուցվի՝ եղե՞լ է, թե՞ ոչ, և նոր գտնենք տապալողին: Մինչդեռ` կար շատ ակնհայտ փաստ՝ 10 զոհ: Այդ մարդկանց զոհվելու մեղավորներին գտնեինք, և երբ այդպես գտնենք, կարկինը շատ ավելի լայն կբացվի, և ովքեր առնչություն են ունեցել այդ մարդկանց զոհվելուն, որևէ կերպ նպաստել են, ինչ-որ ձևով մթնոլորտ են ստեղծել, որ այդ զոհերը լինեն, նրանք էլ պիտի ընդգրկվեն և իրենց ցուցմունքներով նպաստեն բացահայտմանը: Չպետք է ասել՝ մի մասը մեղավոր է, մյուս մասը՝ ոչ: Մեր խորին համոզմամբ` երկու կողմում էլ կան մեղավորներ»,- նշեց Ռուստամյանը՝ շեշտելով, որ այս գործը մինչև հիմա քաղաքական ենթատեքստով էր ներկայացվում:

«Մենք ամեն ինչ արեցինք, որ ՀՀ-ում հստակություն մտնի, և այն ժամանակ, երբ դատվում էին Մարտի 1-ի գործով, յոթ հոգու դատ կար, այդ ժամանակ մենք էինք, որ առաջին քայլերը կատարեցինք՝ այն հոդվածը, որի տակ ամեն ինչ մտնում էր, տարանջատեցինք, հստակեցրեցինք մեղադրանքը, դրա պատճառով էլ համաներումը եղավ, այդ մարդիկ ազատվեցին: Սա ոչ մեկ չի հիշում: Դաշնակցությունն այն ժամանակ էլ հստակ հատուկ կարծիք ներկայացրեց, երբ հանձնաժողով էր ստեղծված, ասել ենք, որ բավարարված չենք այս հանձնաժողովի աշխատանքներով, որովհետև չբացահայտվեց, թե ովքեր են մեղավոր 10 զոհերի հարցում»,-ընդգծեց Ռուստամյանը՝ հավելելով, որ սահմանդրական կարգի մեղադրանքը սխալ տեղ է տանելու մեզ, մոռացվել է՝ ովքեր են կրակել, ում հրահանգով.

«10 զոհերի հարազատներին չպետք է մոլորեցնել, թե իբր այսպես բացահայտում ենք՝ ովքեր են կանգնած այդ զոհերի հետևում»,-շեշտեց Ռուստամյանը:

Անդրադառնալով Հայաստանում մի շարք քրեական գործերի, այդ թվում՝ Սամվել Մայրապետյանի գործի առնչությամբ ՄԻԵԴ-ի արձագանքներին՝ դաշնակցական գործիչը տեսակետ հնչեցրեց, որ մի ընթացք է սկսվում, երբ Հայաստանի հեղինակությունը կարող է տուժել:

Հրանտ Մարգարյանն իր ելույթով արտահայտել է այն, ինչ մենք ամբողջ նախընտրական քարոզարշավի ընթացքում հրապարակի վրա ասել ենք. հայտարարեց ՀՅԴ Բյուրոյի նորընտիր նախագահ Արմեն Ռուստամյանը` անդրադառնալով ՀՅԴ Բյուրոյի նախկին ներկայացուցիչ Հրանտ Մարգարյանի կոշտ քննադատություններին իշխանության հասցեին:

«Մենք շատ հստակ ասել ենք, թե ինչու ենք մտել այս ընտրական պայքարի մեջ և ասել ենք, որ մտել ենք որպես ընդդիմություն, ձևակերպել ենք, որ մեր ընդդիմադիր կեցվածքը` թե արտաքին թե ներքին, հարցերի մասով»,- նշեց նա:

Ըստ Ռուստամյանի` գլխավոր վտանգը, որ արձանագրել են, այն է, որ անցյալի` 90-ականների դասերը բերում են այն եզրակացության, որ կա շատ մեծ վտանգ, որ նույն սխալը կրկնենք:«Դրա համար ես միշտ ասել եմ, որ սա դեժավյու է հիշեցնում: Անհանգստությունը շատ հստակ է` այս նորը չլինի լավ մոռացված հնի կրկնություն: Այսինքն, մենք չպետք է բերենք նրան, որ հին մենաշնորհը փոխարինվի նոր մենաշնորհով: Մենք 5 խնդիր էինք դրել, որով էլ պայմանավորել էինք հետագա համագործակցությունը Նիկոլ Փաշինյանի հետ: Այդ խնդիրներից մեկն այն էր, որ մենք պետք է ամրապնդեք խորհրդարանական համակարգը և լուծենք իրենց իսկ կողմից ձևակերպված, սուպերվարչապետական համակարգի խնդիրը: Սուպերվարչապետական համակագրից հրաժարում մենք այսօր չենք տեսնում: Նախարարությունների հետ կապված փոփոխությունները որ բերել էին, դրանով ակինկալում էինք տեսնել ներքին գործերի նախարարության ամրագրում, այդ կերպ Ոստիկանությունը և մի շարք այլ կառույցների վերահսկողությունը կփոխանցվեր ԱԺ-ին»,- ասաց նա:

Նա նշեց, որ ունեն խորքային հարցեր: «Մենք ակնկալում ենք, որ նոր իրավիճակում, երբ պատասխանատվությունն ամբողջապես մեկ քաղաքական ուժին է պատկանում այդ հարցերին պետք է շատ ուշադիր հետամուտ լինեն: Մենք դեռ ունենք հույս, որ ինչպես ես ասացի` կզարգանանք չզիջելով: Այսինքն իր սեփական ռեսուրսի վրա կենտրոնանալով կզարգանանք այնպես, ինչպես կպահանջի մեր շահերը: Մենք առայժմ դա չենք տեսնում, կգա ծրագիր, կկատարվեն քյալեր կտեսնենք, բայց հույս ունենք, որ կգնա այդ ուղղությամբ: Եթե այդ քայլերը կատարվեն, մենք որևէ խնդիր չունենք համագործակցելու»,- ասաց նա:

Հարցին` ժողովրդին չե՞ն համախմբի իշխանության դեմ, Ռուստամյանը պատասխանեց. «Կհամախմբենք, եթե լինի հակառակ ծրագիրը` զիջենք, որ զարգանանք, եթե այդպիսի վիճակ եղավ, կհամախմբենք: Դա արել ենք Լևոն Տեր-Պետրոսյանի ժամանակ, դա արել ենք Սերժ Սարգսյանի ժամանակ` Ոչ-ի շարժումով և եթե հիմա նոր իշխանությունները նման զիջումների չպետք է գնան և ռեսուրսը մեր մեջ ամրացնելու քաղաքականություն տանեն, մենք ամբողջույթմաբ կստարանեք այդ իշխանությանը»,- եզրափակեց նա:

Մենք Փաշինյանի հետ որևէ խոչընդոտ, պրոբլեմ չենք տեսնում` մեր առջև դրված կարևորագույն ազգային, պետական խնդիրները լուծելու առումով. հայտարարեց ՀՅԴ Բյուրոյի նախագահ Արմեն Ռուստամյանը:

«Մենք հարաբերվելու ենք` լինի Փաշինյանը, թե` որևէ այլ մեկը, ըստ մեր ունեցած գաղափարա-քաղաքական սկզբունքների: Այդ դաշտն այսօր կա, դա մեր հանդիպումներն են ցույց տալիս: Պարոն Փաշինյանի հետ մենք խոսում ենք շատ կառուցողական մթնոլորտում, հասկանալի ենք դարձնում միմյանց տեսակետները, ուստի ես լավատեսորեն եմ տրամադրված մեր հետագա համագործակցության հարցում: Ի վերջո, ինչ էլ լինի, այսօր Հայաստանի գլխավոր առաջին դեմքը, որ վարում է թե’ արտաքին, թե’ ներքին քաղաքականությունը, ՀՀ վարչապետն է: Սխալ կլինի, եթե չասեմ` ապազգային ու հակապետական է այն մոտեցումը, որ ուզենաս` օր առաջ ձախողվի այդ իշխանությունը, քանի որ դու իշխանության մեջ չես, որ քո տեսակետներն ավելի առաջ գնան: Մենք չենք ընթանում այն տրամաբանությամբ` ինչքան վատ եք, այնքան լավ: Մենք ուզում ենք, որ լինի լավ, և վստահ ենք, որ այդ ժամանակ բոլորի համար էլ լավ կլինի, Դաշնակցության համար էլ լավ կլինի»,- ասաց նա:

Ռուստամյանն ընդգծեց, որ այս տրամադրվածությամբ են պատրաստ համագործակցել: «Նոր ձևավորված Բյուրոն էլ իր հանձնառությունն այդ առումով տեսնում է, իր պատրաստակամությունը հայտնել է այն ծրագրերի շուրջ համագործակցել, որոնք, մեր կարծիքով, այսօր ակտուալ են մեր երկրի և պետության համար, և առայժմ այդ փոխըմբռնումը պարոն Փաշինյանի հետ ունեցել ենք, և դա ավելի կխորանա»,- ասաց նա:

Լրագրողները հետաքրքրվեցին` դուք ասում եք, որ ձեզ պաշտոններ, պորտֆելներ պետք չեն, միաժամանակ ասում եք` պատրաստ եք համագործակցել այս իշխանության հետ, ասում եք նաև, որ այս իշխանությունը հնարավոր է տարածքներ հանձնի, խաղերի մեջ է, դուք համագործակցությունն ի՞նչ ձևաչափի մեջ եք պատկերացնում: Ռուստամյանը պատասխանեց. «Ոչ կուրորեն: Դուք շատ լավ նկարագրեցիք: Պատրաստ ենք համագործակցել` աչքերներս բաց, ըստ մեր նախանշած ծրագրերի, նպատակների: Ինքնանպատակ որևէ համագործակցություն մեզ համար անընդունելի է, չի ընդունվում նաև այնպիսի համագործակցությունը, երբ մեր ձայնը կարող է անտեսվել»:

Ըստ նրա` իրենք շատ պարզ բաներ են ասում: «Դաշնակցությունն այն կուսակցությունը չէ, որ պորտֆելների համար, այժմեական ինչ-որ հարց լուծելու համար լծակ ստանա, այսպիսի ձևերով Դաշնակցությունը երբեք չի առաջնորդվել: Դաշնակցությունն առաջնորդվել է իր հստակ ծրագրով և գաղափարներով: Եթե այդպես վարվեր որևէ մարմին, մեկ օրվա կյանք չէր ունենա: Այս Ընդհանուր ժողովը, որը 10 օր է տևել, ի՞նչ է քննարկել: Ամենամանրամասնություններով է քննարկել մեր ցանկացած հայտարարությունը, իշխանության կողմից կատարված հայտարարությանը մեր արձագանքը, մեր պահվածքը և այս ամեն ինչի ամփոփումից եկել է այն եզրակացության, թե ինչպես մենք պետք է շարունակենք մեր ընթացքը»,- նշեց ՀՅԴ Բյուրոյի նախագահը:

Ռուստամյանը շեշտեց, որ բոլորը պետք է ընկալեն, որ ՀՅԴ-ն այն բացառիկ ազգային կառույցներից մեկն է, որը միայն դաշնակցականների կառույցը չէ: «Մեր ժողովրդի ստեղծած բացառիկ կառույցն է , որ 30-ից ավելի երկրում գործում է: Իրարից անկախ` մարդիկ հավաքվում են, բայց նույն գաղափարների ու նպատակների շուրջ են համախմբված: Որևէ մեկին թույլ չենք տա, որ այդ գաղափարներից ու ծրագրերից շեղվի, որևէ համագործակցությամբ դա դրվի հարցականի տակ, որևէ հայտարարությամբ մենք մեր նախորդ հայտարարությունները հերքենք: Մենք պատասխան ենք տալիս 129 տարվա համար, չկա այդպիսի մի քաղաքական ուժ, որ 129 ամսվա համար պատասխան տա: Մենք այդ կուսակցությունն ենք, իսկ դա պատահական չի լինում: Այդպիսի կուսակցության կենսունակությունը պահպանվում է միայն նրանով, որ դու քո սկզբունքներին հավատարիմ մնաս: Այդ ձևով մենք պետք է համագործակցենք ցանկացած քաղաքական ուժի հետ: Կարծում եմ, որ որևէ իշխանություն, ինչպիսի մեծամսնություն էլ ունենա, անցած մեր անկախության փորձը և պատմությունը դա է ցույց տվել, որ պետք է հաշվի նստի Դաշնակցության հետ, որովհետև դա միայն կուսակցության հետ հաշվի նստել չի նշանակում: Դա նշանակում է այդ գաղափարը կրող, այդ գաղափարին նվիրված հայության հետ հաշվի նստել: Սա է խնդիրը, և պատահական չէ, որ ասում եմ` կապ չունի, Դաշնակցությունը խորհրդարանում է, թե` խորհրդարանից դուրս: Սա բացարձակապես Դաշնակցության նսեմացում կամ իրավիճակի փոփոխություն չի կարող առաջացնել, այնպես որ` Դաշնակցությունը պե՞տք է գործի, թե՞ չգործի: Պարզապես այդ մի գործիքը` ԱԺ ամբիոնը, չենք ունենա, բայց կունենանք բազմաթիվ այլ ամբիոններ, որոնցից ոչ ոք մեզ չի կարող զրկել»,- եզրափակեց ՀՅԴ Բյուրոյի նախագահը:

Վստահ եմ, որ նկատել եք` վերջին շրջանում` ժողովրդական շարժումից հետո, մի քանի առիթներով վարչապետի հետ շարունակական հանդիպում ենք ունեցել թե’ Հայաստանում և թե’ դրսում. նշեց ՀՅԴ Բյուրոյի ներկայացուցիչ Հակոբ Տեր-Խաչատուրյանը:

«Ես անձամբ Վաշինգտոնում, երբ Արմեն Գարոյի արձանն էր բացվում, նշել եմ, որ այս կառավարության հաջողությունը բոլորիս հաջողությունն է, և ձախողությունը` բոլորիս ձախողությունը: Բացի այդ` հանդիպումներ են տեղի ունեցել Փարիզում, Լիբանանի մեր Կենտրոնական կոմիտեի հետ, Նյու Յորքում` Ամերիկայի երկու Կենտրոնական կոմիտեների հետ, և մենք նաև այլազան հանդիպումներ ենք ունեցել` նախարարների, դեսպանների ու այլ մակարդակներով, և միշտ կրկնել ենք հետևյալը` ողջունում ենք այս փոփոխությունները Հայաստանում, մանավանդ այն, որը կվերաբերի ժողովրդավարության ամրապնդմանը, կաշառակերության դեմ պայքարին և, հուսամ, նաև մոնոպոլիաների վերացմանը»,- ասաց նա:

Ըստ Տեր-Խաչատուրյանի` սակայն կան որոշ մտահոգություններ, որոնց ուղղությամբ պետք է միասին աշխատել: Նրա խոսքով` մտահոգություններից առաջինը կապված է Արցախյանի հիմնահարցի հետ: «Արցախյան հիմնահարցի վեաբերյալ ունենք մտահոգություններ: Նաև մենք ավելի զգույշ ենք, որովհետև օտար պետություններ հասած տեղեկությունները մտահոգիչ են, մտահոգիչ այն իմաստով, որ ծայրահեղ լավատեսությունն ինքնին արդեն հոռետեսության է առաջնորդում մեզ, որովհետև նշանակում է, որ ընդհանուր մեղսակցություն գոյություն ունի արտաքին ուժերի կողմից, որպեսզի լուծում պարտադրվի, իսկ թե որքանո՞վ կհաջողվի կամ ոչ, կազմված է բոլորիցս` մեր ժողովրդից, իշխանության հետ համագործակցությունից, որ Արցախը մնա ամուր և անզիջող»,- ասաց ՀՅԴ Բյուրոյի ներկայացուցիչը:

Ըստ նրա` երկրորդ մտահոգությունը կապված է այն բանի հետ, որ հայտարարվեց, թե Դաշնակցությունը բազմաշերտ է, ապա տարվեց սև ու սպիտակի քաղաքականություն: «Այդ հարցն իրապես մտահոգում է մեզ: Եթե դա հատուկ միայն ընտրական պայքարի ժամանակ արտահայտված ծայրահեղություններ էին, այդ դեպքում ակնկալում ենք պարոն վարչապետից, որ իր շրջապատին էլ փոխանցի այդ ընդհանուր հասկացողությունը, որ սա վնասակար երևույթ է: Ես ձեզ տառացիորեն և աներկբայորեն հաստատում եմ, որ Դաշնակցության մեջ բաժանում գոյություն չունի, և այն արտահայտությունները, թե ներսինները վատն են, դրսինները լավն են, ոչ մի լավ տեղ չի տանելու մեզ: Ուզում եմ ասել, որ Դաշնակցությունը միշտ կողմնակից է եղել համախմբելուն և ոչ թե բաժանարար գծեր ստեղծելուն»,- ասաց Տեր-Խաչատուրյանը:

Դաշնակցության մտահոգությունը, ըստ նրա, անշուշտ, նաև ազգային գաղափարախոսությունն է: «Մեկ ժողովուրդ լինելու գաղափարն այսօր Սփյուռքում, բարեբախտաբար, Դաշնակցությունը կարողացել է պահել հակառակ ամեն դժվար պայմանների, և դա պետք չէ խախտել: Մեկ ժողովուրդ լինելու հասկացողությունը նրա համար է, որ դու ունենաս գաղափարական որոշ տարակարծություններ, օրինակ` մեկն ունի ավելի ձախ դիրքորոշում, Դաշնակցությունը ժողովրդավար է, բայց նաև ընկերվարական կուսակցություն է, կան նաև տնտեսական զարգացման և այլ ոլորտներում տարբեր մոտեցումներ, բայց սրա համար պետք է խոսակցություն և գործակցություն: Եվ մենք վարչապետի հետ հանդիպման ժամանակ ասել ենք, որ պատրաստ ենք այդ գործակցությանը, մինչև այն ժամանակը, որ այս որոշ մտահոգությունները փարատվեն: Այս` բաժանարար գծերի քաղաքականությունը վարչապետի և նրա շրջապատի կողմից պետք է վերացվի, որովհետև դրա ականատեսը եղել ենք նաև Սփյուռքում»,- եզրափակեց Տեր-Խաչատուրյանը: