«Արցախում մարդու հիմնարար իրավունքներն ու ազատությունները երաշխավորված են Սահմանադրությամբ: Եվ այդ իրավունքների իրացման ու ազատությունների ապահովման համար Արցախի իշխանությունները հետևողական քաղաքականություն են իրականացրել բոլոր այս տարիներին: Ու թեև Արցախի միջազգային ինտեգրման որոշ նախաձեռնություններ համարժեք պատասխան չեն ստացել, մենք չենք հրաժարվել աշխարհի հետ համընթաց քայլելու և աշխարհի հետ մերձենալու մեր նպատակներից: Վերջին տարիներին կրթության ոլորտում համագործակցության ծրագրեր են իրականացվել Ֆրանսիայի, Շվեյցարիայի, Ռուսաստանի, Ամերիկայի Միացյալ Նահանգների, Իտալիայի, Լիբանանի, Հունաստանի և մի շարք այլ երկրների հետ: Ուրախ կլինենք մեր բարեկամ երկրներից ներմուծելու լավագույն փորձը` փոխշփումների և համատեղ գիտակրթական ծրագրերի միջոցով նպաստելով նաև մեր ժողովուրդների փոխճանաչմանն ու մերձեցմանը: Հուսով եմ` համաժողովը նոր թափ կհաղորդի մեր ժողովուրդների միջև համագործակցությանը, հանուն վեհ արժեքների, հանուն արդարության և խաղաղության»,- նշել է Ն. Աղաբալյանը: