Մարմինը նշեց, որ Ծերակոյտին առած պատմական քայլը կը յաջորդէ 29 հոկտեմբերին Ներկայացուցիչներու տան կողմէ Հայոց ցեղասպանութիւնը ճանչցող թիւ 296 բանաձեւի որդեգրման, եւ այսպիսով Միացեալ Նահանգներու օրէնսդիր մարմինը` Քոնկրեսը իր ամբողջութեամբ` իր վերին ու ստորին պալատներով ճանչցած կ՛ըլլայ Հայոց ցեղասպանութիւնը, ինչ որ մեծ յաղթանակ մըն է արդարութեան, ճշմարտութեան եւ մարդկութեան համար:

Ծերակոյտը Հայոց ցեղասպանութիւնը ճանչցող թիւ 150 բանաձեւի որդեգրումով եկաւ հաստատելու իր եւ ընդհանրապէս Միացեալ Նահանգներու օրէնսդիր մարմինի յանձնառութիւնը ցեղասպանութիւններու կանխարգիլման, արդարութեան եւ ճշմարտութեան նկատմամբ:

ՀՅԴ Լիբանանի Հայ դատի մարմինը ընդգծեց, որ այժմ հերթը Միացեալ Նահանգներու գործադիր իշխանութեանն է: Անիկա պէտք է հետեւի օրէնսդիր մարմինին եւ նախագահ Ռանըլտ Ռիկընի 1981¬ին առած քաջարի քայլի օրինակին:

ՀՅԴ ԼԻԲԱՆԱՆԻ ՀԱՅ ԴԱՏԻ ՄԱՐՄԻՆ