ՀՅԴ Լիբանանի Հայ դատի մարմինը երէկ Լիբանանի մէջ Զուիցերիոյ դեսպան Մարիոն Վիխելթին յղեց Զուիցերիոյ ազգային տօնին առիթով շնորհաւորական նամակ մը:

Հայ դատի մարմինը իր նամակին մէջ անդրադարձաւ Զուիցերիոյ դաշնակցային կառավարութեան կողմէ արցախահայութեան տունդարձը դիւրացնելու եւ ջատագովելու նպատակով միջազգային խորհրդաժողով մը կազմակերպելու փորձին, որ հիմնուած է Զուիցերիոյ խորհրդարանին կողմէ «պատմական բանաձեւի վրայ»:

«Դժբախտաբար ազրպէյճանական բռնատիրութիւնը մերժեց մասնակցիլ խորհրդաժողովի մը, որ խորապէս արմատաւորուած է մարդկային իրաւունքներ եւ տագնապներու խաղաղ լուծում ջատագովող զուիցերիական դիւանագիտական աւանդութեան մէջ», նշեց Հայ դատի մարմինը:

ՀՅԴ Լիբանանի Հայ դատի մարմինը իր նամակը եզրափակելով շեշտեց. «Կը հաւատանք, թէ զուիցերիական կառավարութեան վճռականութիւնն ու միջազգային ընտանիքին կողմէ լուրջ ճնշումը ի վերջոյ պիտի յաղթեն Ազրպէյճանի ամբարտաւանութեան եւ ռազմատենչութեան»: