Հայաստանի ԱԳ նախարարը նախանձելի երեսպաշտությամբ խոսում էր ինձ համար և շատ շատերի համար, հազարների համար թվացյալ կամ չակերտավոր խաղաղության մասին, որը իրականության հետ որևէ առնչություն չունի։ Այս մասին NEWS.am–ի հետ զրույցում հայտնեց ՀՅԴ Բյուրոյի անդամ, ՀՀ ԱԺ «Հայաստան» խմբակցության պատգամավոր Լիլիթ Գալստյանը։

«Այն թուղթը, որի վերնագրի բովանդակության մեջ խաղաղություն բառի գործածումը կա, դա իրական խաղաղության հետ որևէ առնչություն չունի։ ԱԳ նախարարի խոսքում ոչ միայն խոցելի, այլ պարզապես ստեր կային, որոնք որևէ քննադատության չեն դիմանում։ Սա ոչ թե խաղաղության մասին համապարփակ մի փաստաթուղթ կամ համաձայնագիր է, այլ ինչպես 2 օր առաջ հայտարարեց Ալիևը լրատվամիջոցների հետ հանդիպմանը, որ այդ համաձայնագիրը արտահայտում է և արտացոլում է Հայաստանի և Ադրբեջանի միջև հարաբերությունների կառուցման Ադրբեջանի տեսլականը։ Ավելի խոսուն, քան Ալիևի գնահատականը այս փաստաթղթին, դժվար է ձևակերպել, որովհետև այն ամբողջությամբ արտահայտում է ադրբեջանական կողմի պատկերացումները, մտածումները, զիջումները, պարտադրանքը։ Սա փափուկ ուժի գործադրմամբ, առանց պատերազմական գործողությունների հերթական կապիտուլյացիոն փաստաթուղթն է»,–ասաց նա։

Գալստյանը համոզմունք հայտնեց, որ սրանով Նիկոլ Փաշինյանի և ՔՊ-ական քաղաքական մեծամասնության թեթև ձեռքով լեգիտիմացվեց ցեղասպանությունը, որովհետև չի կարող խաղաղություն, այն էլ համապարփակ և կայուն խաղաղություն կառուցվել կամ կոնֆլիկտը հանգուցալուծված համարել, երբ որեւէ անդրադարձ չկա այդ հանցագործություններին, որոնք միջազգային իրավունքի նորմերով միջազգային հանցագործություններ են և ենթակա են պատժման։

«Խոսում են փոխադարձության մասին. Դուք պատկերացնու՞մ եք որևէ խաղաղություն այն պարագայում, երբ Բաքվի բանտերում այս պահին մենք ունենք հրապարակված 23 բանտարկյալներ, ներառյալ Արցախի ռազմաքաղաքական ղեկավարությունը։

Սուտ է, թե այդ հարցը միջազգային բոլոր հարթակներում բարձրացնում են։ ՔՊ-ի և նրանց առաջնորդի վարքագիծը ստերի հաջորդական մի մեծ ձնագունդ է։ Հիշո՞ւմ եք՝ կուրծք ծեծելով ասում էին՝ ի՞նչ միջանցք, չկա, մոռացեք, և այն, ինչ այսօր կատարվում է Մեղրիի հետ, ըստ էության Մեղրիի միջանցք է, Հայաստանի սուվերեն տարածքների հանձնում է բազմաթիվ անորոշություններով»,–ասաց ընդդիմադիր պատգամավորը։

Նա հարց բարձրացրեց, թե ինչու պիտի ինքը հավատա Արարատ Միրզոյանի բանավոր խոստումներին, որ մենք ունենք վավերացված որևէ հստակ փաստաթուղթ, որը հիմք կտա մեզ գնահատելու, որ Մեղրիի ստրատեգիական նշանակություն ունեցող ճանապարհը ապաշրջափակվում է և հարևանների միջև հաստատվում է տրանսպորտային նոր հաղորդակցություն, որից մենք պիտի բարգավաճենք. «Դուք պարտավորություն ունեիք սեփական ժողովրդին հրապարակելու, թե ինչ գործողություններ են կատարվելու Հայաստանի սուվերեն տարածքի նկատմամբ։ Միջազգային աղբյուրներից ստացված այն լուրերը, որ մենք ստանում ենք, վկայում են այն մասին, որ 6 կմ խորությամբ և 42 երկարությամբ մի տարածք է, որը ավելին է Երևանի վարչական շրջանից կամ Մեղրիի համայնքի մոտավորապես 38%–ն է։ Իսկ մենք գիտակցո՞ւմ ենք, թե դա բնապահպանական, դեմոգրաֆիական, անվտանգային ինչ լրջագույն մարտահրավերներ է ներկայացնում։

Միգուցե, կա լսարան, որը կարող է այդ սուտը կուլ տալ, բայց Հայաստանի մտածող քաղաքացիները և ընդդիմադիր քաղաքական ուժերը, իրավունք ունեն չհավատալու դրան։ Այդ փաստաթղթի վերնագրում օգտագործված խաղաղության բառը ընդամենը խայծ է։ Դա ոչ միայն խաղաղություն չէ, այլ Հայաստանը ներքաշում է աշխարհաքաղաքական նոր բախման մեջ և այս նոր բախումը, որը տարածաշրջանում նոր խաղացողների ներկայություն է ապահովելու»,– հայտարարեց Լիլիթ Գալստյանը։

Մանրամասները՝ տեսանյութում