Երեկ տեղի ունեցած հավաքում քննարկվել է ընդհանուր ստեղծված իրավիճակը, բռնաճնշումները և ալիևյան սահմանադրությունը Հայաստանում թույլ չտալու քայլերը. այսօր՝ նոյեմբերի 5–ին, ԱԺ–ում լրագրողների հետ զրույցում նշեց ՀՅԴ անդամ, ԱԺ «Հայաստան» խմբակցության քարտուղար Արթուր Խաչատրյանը։

«Նիկոլ Փաշինյանն ԱԺ–ում հայտարարեց, որ սահմանադրությունը արտաքին պերիմետրերի վրա և դրանցից դուրս չի քննարկվել։ Բնականաբար հարց է առաջանում՝ ադրբեջանցիները, որտեղ նստում, վեր են կենում, ասում են՝ Հայաստանը պետք է փոխի սահմանադրությունը, որպեսզի լինի խաղաղության համաձայնագիր։ Այս իշխանությունները ասում են՝ պետք է փոխվի սահմանադրությունը, որպեսզի լինի խաղաղության համաձայնագիր։ Արարատ Միրզոյանը ասում է՝ դա իրենց նախապայմանն է, այլ ոչ թե իրենց պարտադրանքը։ Այսինքն ինչ-որ մի տեղ դա քննարկվել է, չէ՞»,–ասաց նա։

Անդրադառնալով Նիկոլ Փաշինյանի հայտարարությանը, որ ԹՐԻՓՓ–ը ուներ պատերազմի սպառնալիքը կանխելու նպատակ, Խաչատրյանն ասաց. «Եկեք մի հատ կողմնոշվենք, պատերազմի սպառնալիքը կանխում է ԹՐԻՓՓ–ը, թե՞ սահմանադրությունը: Իրենք ասում են՝ ԹՐԻՓՓ–ը պատերազմը կանխում է: Հիմա ԹՐԻՓՓ է կանխո՞ւմ, սահմանադրությունն է կանխո՞ւմ, եվրադիտորներն են կանխո՞ւմ։ Էլ ինչ պահանջ կարող է լինի, որպեսզի պատերազմը կանխվի։ Ասում է՝ ես ներվը հանում եմ, դրա համար եմ Տիգրանաշենին ասում Քյարքի, է՞լ ինչ պահանջներ կան»,–ասաց նա։

Անդրադառնալով ընդդիմադիր ուժերի ղեկավարների նկատմամբ հետապնդումներին, Արթուր Խաչատրյանն ասաց. «Ինչը, որ մենք տեսնում ենք, դա Հայաստանի Հանրապետությունում լարվածության և բռնությունների աճի մի նոր գալար է, երբ ընդիմադիրները այստեղից ասում են, որ Հայաստանը ալիևյան սահմանադրություն չպետք է ունենա, իշխանությունները հանկարծ սկսում են մարդկանց ձերբակալել՝ տարբեր մեղադրանքներ առաջադրելով։ Եվ այստեղ գալիս է Նիկոլ Փաշինյանի այդ հայտնի հայտարարությունը՝ կզացնելու եմ։ Հետո էլ նախագահ Քոչարյանին կալանավորելուց հետո ասաց՝ «Ասել եմ կկզացնեմ, կկզացնեմ»։

Բռնակալական երկրներում, ինչպիսին որ մենք ունենք, քաղաքական օպոնենտները դատվում են քրեական հանցագործություններով։

Ասում է՝ կհամոզեմ, որպեսզի ընդիմությունը փոխի իր միտքը և գնա սահմանադրական հանրաքվեի։ Ընդիմությունն ասում է՝ ոչ, մենք մեր միտքը փոխողը չենք։ Ասում է՝ կգնանք արտահերթ ընտրությունների։ Մենք էլ ասում ենք՝ ընտրություն ես ուզում, հրաժարական տուր, ո՞վ է քո ձեռքը բռնել։ Մեկ էլ հանկարծ պարզվում է, որ բոլորը հանցագո՞րծ են։ Այսինքն ովքեր Նիկոլ Փաշինյանի կողմն են, իրենք բարի պուպուշ բյուրեղյա ազնվության մարդիկ են, ովքեր Նիկոլ Փաշինյանի քաղաքականության դեմ են, դառնում են հանցագործնե՞ր»։

Նա չբացառեց, որ անցնեն փողոցային պայքարի. «Խորհրդարանական և արտախորհրդարանական պայքարի ձևերը պետք է համադրել։

Արտահերթ ընտրությունների գնալու միակ տարբերակը Նիկոլ Փաշինյանի հրաժարականն է, եթե ինքը համոզված լիներ, որ ընտրություններում կհավաքեր այդքան ձայն, ոչ թե կկալանավորեր Ռոբերտ Քոչարյանին, Սամվել Կարապետյանին, Գագիկ Ծառուկյանին, այլ հրաժարական կտար»։

Անդրադառնալով Ադրբեջանի կողմից հնչող պահանջներին, Արթուր Խաչատրյանն ասաց. «Ինչքա՞ն կարող ենք ընկրկել։ Վերջապես պետք է հասկանալ, որ կա կարմիր գիծը։ Ո՞րն է այդ կարմիր գիծը, կամ ո՞վ ասեց, որ այլ լրացուցիչ նախապայմաններ Ադրբեջանը չի դնելու։

Նույն Նիկոլ Փաշինյանը ասում էր՝ անկլավներ չեն լինելու, բոլորը մտածում էին՝ դե անկլավների փոխանակում կլինի։ Ես գծել եմ, ցույց եմ տվել, որ այսպես մի հատ սեպ կխրվի Հայաստանի թիկունքին, մի հատ ելուստ կառաջարկվի Հայաստանին դեպի Արծվաշեն»։

Մանրամասները՝ տեսանյութում