Դեկտեմբերի 11-ին Հրապարակ TV-ի Հինգշաբթի հաղորդաշարի հյուրն էր ՀՅԴ անդամ, ՀՀ ԱԺ պատգամավոր Արթուր Խաչատրյանը: Անդրադարձ է կատարվել Հայաստանի ներքաղաքական կյանքին, Արցախի խնդրին, ինչպես նաև ՀՀ իշխանությունների վարած ոչ հայանպաստ և պարտվողական արտաքին քաղաքականությանը:

Արթուր խաչատրյանը մանրամասներ է ներկայացրել նախօրեին Արցախի ներկայացուցչությունում Արցախի Հանրապետության Սահմանադրության օրվան նվիրված լսումների, քննարկված հարցերի մասին: Նա մասնավորապես կարևորել է Արցախ հավաքական վերադարձի հարցում արցախահայության և Արցախի գործող իշխանությունների միակարծությունն ու վճռականությունը: «Այդ ներկայացուցչական քննարկումը, որին մասնակցում էին Արցախի գործադիր և օրենսդիր մարմինների ղեկավարները, ԱՀ և ՀՀ ԱԺ պատգամավորներ, քաղաքագետներ, միջազգային իրավունքի մասնագետներ, հայտնի հասարակական և քաղաքական գործիչներ, ևս մեկ անգամ ցույց տվեց, որ Արցախի հարցը վերջնականապես փակված չէ և արցախահայության հավաքական վերադարձի իրավունքի պաշտպանությունը շարունակում է մնալ այդ խնդրի արծարծման և միջազգայնացման կարևորագույն գործոն»,- նշել է Արթուր Խաչատրյանը:

Խոսելով ՀՀ վարչապետի՝ Գերմանիայում արած մի շարք հայտարարությունների մասին՝ Արթուր Խաչատրյանն անընդունելի է համարել Նիկոլ Փաշինյանի՝ արցախահայության վերադարձի իրավունք և Ադրբեջանի կողմից շրջանառվող «Արևմտյան Ադրբեջան» խոսույթների միջև հավասարության նշան դնելու և դրանցից երկուստեք հրաժարվելու առաջարկը, ինչը, ըստ պատգամավորի, միանշանակ բխում է Ադրբեջանի շահերից: «Երբ Ալիևը խոսում է ադրբեջանցիների՝ այսպես կոչված «Արևմտյան Ադրբեջան» վերադարձի մասին, դրան պետք է հակադրել Բաքվի, Սումգայիթի, Մինգեչաուրի, Գանձակի, Շահումյանի շրջանի և Նախիջևանի հայերի վերադարձի հարցը»,- ասել է Արթուր Խաչատրյանը:

Անդրադարձ է կատարվել նաև Հայ Առաքելական Սուրբ Եկեղեցու դեմ ՀՀ իշխանությունների սանձազերծած արշավին, որն, ըստ պատգամավորի, ոչ թե անձերի դեմ պայքար է, ինչպես ներկայացնում են իշխանությունները, այլ նպատակ է հետապնդում հիմքից քանդել Հայ Եկեղեցին: «Հայ Առաքելական Սուրբ Եկեղեցին, ի տարբերություն աշխարհի շատ եկեղեցիների ու կրոնական կազմակերպությունների, իր արմատներով ազգային է և հանդիսանում է մեր ազգի ինքնության ու գենի ամենակարևոր բաղկացուցիչը: Այս իմաստով այն լուրջ խոչընդոտ է Հայաստանի անկախության և պետականության հակառակորդների համար»,- նշել է Արթուր Խաչատրյանը:

Մանրամասները՝ տեսանյութում