2026 թվականի հունվարի 10-ին Երևանում տեղի է ունեցել ՀՅԴ Հայաստանի կազմակերպության 29-րդ (արտահերթ) Գերագույն ժողովը, որը քննել է սպասվող խորհրդարանական ընտրություններին ՀՅԴ մասնակցության ձևաչափի հարցը։

ՀՅԴ Հայաստանի Գերագույն մարմնի ներկայացուցիչ, ՀՀ ԱԺ «Հայաստան» խմբակցության պատգամավոր Իշխան Սաղաթելյանն այսօր կայացած ասուլիսում հայտարարեց, որ ՀՅԴ Գերագույն ժողովը որոշել է մասնակցել ընտրություններին՝ նախապատվությունը տալով դաշինքային ձեւաչափին: Նա նշեց, որ վարելու են ակտիվ բանակցություններ հավանական դաշինքի ձեւաչափի վերաբերյալ՝ ապահովելով ՀՅԴ նշանակալի դերակատարությունը եւ մոտեցումների արտացոլումը կարեւոր հարցերում: «2026թ ընտրություններն անհրաժեշտ է վերածել գործող վարչախմբի վերարտադրությունը կանխելու միջոցի»,-նշեց Իշխան Սաղաթելյանը՝ ներկայացնելով ՀՅԴ 29–րդ Գերագույն ժողովի հայտարարությունը: «Մեր տրամադրվածությունը հետեւյալն է՝ մենք ունենք ցանկություն, ունենք հնարավորություն, հավակնություն՝ դաշինքը պահպանելու, այն ընդլայնելու եւ ավելի ազդեցիկ միավոր դարձնելու»,-ընդգծեց ՀՅԴ Հայաստանի Գերագույն Մարմնի ներկայացուցիչը:

Իշխան Սաղաթելյանը, շեշտեց, որ Նիկոլ Փաշինյանի իշխանությունը հեռացնելու համար պատրաստ են այլ քաղաքական ուժերի հետ միանալ:

«Եթե ստեղծվի իրավիճակ, որ այս իշխանության հեռացումը պայմանավորված լինի մեր՝ մեկ այլ ուժի հետ համագործակցելու հարցով, կհամագործակցենք ընդդիմադիր դաշտի իրական ուժերի հետ՝ այս իշխանության վերարտադրությունը կանխելու համար։ Ով ում կմիանա, ինչ իրավիճակներ կլինեն՝ ցույց կտան ընտրությունների արդյունքներրը»,- ասաց նա:

«Որևէ մեկը թող պահանջ չներակայացնի՝ ով մասնակցի ընտրություններին: Որևէ մեկը բարոյական, քաղաքական իրավունք չունի ասելու` ընտրություններին մի մասնակցեք»,- հայտարարեց Իշխան Սաղաթելյանը՝ պատասխանելով հարցին, թե նորաստեղծ ուժերը հայտարարում են, որ նախկին նախագահների մասնակցությունն ընտրություններին Փաշինյանին վերընտրվելու շանս է տալիս։

Սաղաթելյանի կարծիքով՝ 2026–ի ԱԺ ընտրություններին պետք է մի քանի խոշոր դաշինքներ լինեն, մարդկանց ներկայացնեն ծրագրեր, և ՀՀ քաղաքացին ընդդիմության միջից ընտրի, թե ում ծրագիրը կարող է երկիրն այս իրավիճակից դուրս բերել:

Մենք որեւէ աշխարհաքաղաքական կենտրոնից ո՛չ աջակցություն ուզել ենք, ո՛չ էլ ուզելու ենք, մենք մերժում ենք որեւէ արտաքին ազդեցություն. շեշտեց Իշխան Սաղաթելյանը:

Նրա պնդմամբ՝ ՀՀ իշխանությունը պետք է ձևավորվի ՀՀ քաղաքացիների մասնակցությամբ և նրա միջոցով, այլ սուբյեկտ չկա իշխանության ձևավորման համար:

«Եթե ՀՀ հաջորդ իշխանությունը ձևավորվի որևէ աշխահաքաղաքական կենտրոնի կողմից, իմացեք, որ մեր խնդիրներն ավելի կխորանան: Հետևաբար, մի փնտրեք մեր թիկունքում հարցեր, մեր թիկունքում փնտրեք հայկականություն, մեր խնդիրները լուծելու պատրաստակամ ուժ»,- հայտարարեց Իշխան Սաղաթելյանը:

Ասուլիսն ամբողջությամբ՝