7 Փետրուարի երեկոյեան, Սան Ֆրանսիսքոյի «Խաչատուրեան» կեդրոնին մէջ, առաւել քան 200 հայորդիներ նշեցին ՀՅԴ 135ամեակը:

Ձեռնարկը ի մի բերաւ համայնքի տարբեր տարիքի ներկայացուցիչները՝ միասնաբար յարգելու համար կուսակցութեան երկար տարիներու նուիրուածութիւնը հայ ժողովուրդին։

Յայտագիրը սկսաւ ՀՄԸՄի սկաուտներուն եւ ՀԵԴի ու ՀԵԴի կրտսերներու ներկայացուցիչներուն կողմէ առաջնորդուած դրօշակի արարողութեամբ եւ քայլերգներու կատարումով։ Անոնք նաեւ զգայացուց կերպով երգեցին «Արցախ» երգը։

Հանդիսավար Վանայ Անտոնեան ձեռնհասօրէն վարեց յայտագիրը, որուն ընթացքին շրջանի ՀՅԴ «Քրիստափոր» կոմիտէի խօսքը փոխանցեց Շանթ Փանոսեան։

ՀՅԴ Արեւմտեան Ամերիկայի Կեդրոնական կոմիտէի խօսքը փոխանցեց ներկայացուցիչ Կարօ Մատէնլեան, իսկ գլխաւոր բանախօսն էր դոկտ. Գէորգ Յակոբճեան (անգլերէնով, նոր սերունդին հասանելի ըլլալու նպատակով)։

Բանախօսները շեշտեցին յատկապէս կուսակցութեան գործունէութեան շարունակականութիւնը ապահովելու, պատասխանատուութիւն ստանձնելու եւ համայնքին գործօն մասնակցութիւնը երաշխաւորելու կարեւորութիւնը։ Անոնք նաեւ յիշեցուցին, որ կուսակցութեան հզօրութիւնը հիմնուած է անոր անդամներուն եւ համակիրներուն նուիրեալ եւ կամաւոր ծառայութիւններուն վրայ։

Գեղարուեստական յայտագիրին իրենց մասնակցութիւնը բերին Նատիմա Աւագեան, Դրօ Գրիգորեան եւ Արա Տապանճեան։

Հաւաքը առիթ մը հանդիսացաւ ոչ միայն տօնելու ՀՅԴ 135ամեայ հարուստ պատմութեան իրագործումները, այլ նաեւ խոստանալու, որ անոր աշխատանքը պիտի շարունակուի ներկայ եւ յաջորդ սերունդներուն կողմէ։