Գեղարքունիքի մարզը Հայաստանի ամենաբարդ, ամենամեծ և բազմաթիվ խնդիրներ ունեցող մարզերից մեկն է, և իրենք աշխատել են բավականին բարդ ժամանակահատվածում` տարբեր ոլորտներում հաջողություններ արձանագրելով. նոյեմբերի 17-ին «Երկիր մեդիա» հեռուստաընկերության «Հարցեր` դաշնակցականներին» հաղորդման ժամանակ ասել է Գեղարքունիքի նախկին մարզպետ, ՀՅԴ անդամ Իշխան Սաղաթելյանը:

«Ճիշտ չէ` իմ աշխատանքի գնահատականը ես տամ, իմ աշխատանքի գնահատականը պետք է տա Գեղարքունիքի մարզի ազգաբնակչությունը: Բայց աշխատանքից դուրս գալուց հետո ստացած ափսոսանքի բազմաթիվ նամակները վկայում են, որ իմ կատարած աշխատանքը գնահատված է»,- նշել է նա:

Դիտարկմանը, թե պաշտոնավարելու ժամանակահատվածում եղել է բավականին հրապարակային, նրա հետ շփումը հեշտ է եղել, Սաղաթելյանն արձագանքեել է, որ հենց առաջին օրվանից որդեգրել են բաց աշխատանք: «Իմ գործունեության ընթացքում եղել եմ 50-ից ավելի համայնքներում` տեղում ծանոթանալով խնդիրներին, այլ ոչ թե խնդիրներին ծանոթացել զեկույցների միջոցով: Այդ ամբողջ աշխատանքը նաև լուսաբանվել է: Այդ ընթացքում ինձ հետ հանդիպելու, հարցեր քննարկելու որևէ դժվարություն չի եղել»,-ասել է նախկին մարզպետը:

Անդրադառնալով սեպտեմբերի 1-ին սահմանամերձ գյուղում միակ առաջին դասարանցու հետ հայտնի լուսանկարին` Սաղաթելյանը պատմել է լուսանկարի պատմությունը: «Սեպտեմբերի 1-ին որոշեցի գնալ ոչ թե 500-800 աշակերտ ունեցող մեծ դպրոց, որտեղ բոլորը կհավաքվեն, կծափահարեն, կողջունեն, այլ` ծայրամասային դպրոցներից մեկը, ողջունել առաջին դասարանի միակ աշակերտին և դրանով իմ վերաբերմունքն ու կեցվածքը ցուցաբերել դատարկվող գյուղերի նկատմամբ»,- ասել է նա:

Իսկ թե ի՞նչ է պետք անել, որ այդ գյուղերը չդատարկվեն, Սաղաթելյանը պատասխանել է. «Քանի որ դպրոցներից խոսեցինք, Գեղարքունիքի մարզում մենք ունենք երկու տասնյակից ավելի դպրոցներ, որտեղ ուսուցիչների թիվը գերազանցում է աշակերտներինը: Ունենք նաև արտագաղթող համայնքներ: Այստեղ պետք են պետության անմիջական ուշադրությունը և աջակցությունը, հատկապես` սահմանամերձ և սահմանապահ գյուղերին, համայնքներին, որպեսզի մարդիկ չարտագաղթեն»:

Իշխան Սաղաթելյանն անդրադարձել է Բելառուսի ԱԳ նախարարության մամուլի խոսնակի կոշտ հայտարարությանը` ի պատասխան Նիկոլ Փաշինյանին:

«Ուզում եմ հստակ ասել, որ, լինի Բելառուսի արտաքին գործերի նախարարությունը կամ որևէ գերտերության ղեկավար` ՌԴ-ի նախագահը, ԱՄՆ-ի նախագահը, կապ չունի` ով, մեր երկրի, մեր երկրի ղեկավարի հետ այդ տոնով խոսելու իրավունք չունի»,- ասել է Սաղաթելյանը:

Նրա խոսքով` այդպես խոսելով` նրանք խոսում են մեր պետության հետ, մեր ժողովրդի հետ: «Հետևաբար` որևէ մեկին չպետք է թույլ տանք` իր քիթը խոթի մեր ներքին գործերի մեջ: Այդ հարցում մենք պետք է լինենք միասնական` մեր երկրի կողքին կանգնած: Նաև չեմ ընդունում այն քաղաքական գործիչներին և անհատներին, որոնք ուզում են իրավիճակից օգտվել և դիվիդենդներ հավաքել: Մենք կարող ենք երկրի ներսում ունենալ հակասություններ, վիճել, մրցակցել, կռվել, բայց դա մեր երկրի ներքին հարցերն են: Արտաքին աշխարհում մենք պետք է հանդես գանք միասնաբար»,- նշել է Սաղաթելյանը:

Պետք է ընտրել Դաշնակցությանը, որովհետև ազգային հարցերում Դաշնակցությանը փոխարինող չկա. ասել է Գեղարքունիքի նախկին մարզպետ, ՀՅԴ անդամ Իշխան Սաղաթելյանը` պատասխանելով «ինչո՞ւ պետք է ընտրել Դաշնակցությանը» հարցին:

«Դաշնակցությանը պետք է ընտրեն, որովհետև ՀՅԴ-ն հայ ժողովրդի, Արցախի, հայկական պետականության անվտանգության գլխավոր երաշխավորն է: Գուցե սա ճոռոմ է հնչում, բայց սա է իրականությունը: Սա մեր 128 տարվա պատմությունն է: Մեզ այսօր տարբեր հարցերում շատ են քննադատում, բայց մենք մեր 128 տարվա յուրաքանչյուր օրվա համար կարող ենք պատասխան տալ: Չկա մի օր, չկա մի արարք, չկա մի գործողություն, որի համար կարող ենք ամաչել: Երբեք չենք արել քայլեր, որոնք կարող են ճակատագրական եղած լինել մեր ժողովրդի կամ պետության համար»,- ասել է Սաղաթելյանը:

Նա նաև անդրադարձել դաշնակցականների բացթողումներին: «Իհարկե, եղել են բացթողումներ, վրիպումներ: Դա եղել է աշխատանքի արդյունքում, անսխալականներ չկան: 128 տարվա մեջ մենք արել ենք բազմաթիվ աշխատանքներ, որոնց համար մեր ժողովուրդը պետք է ընտրի ՀՅԴ-ին: Դաշնակցությունը պետք է մեր ժողովրդին, Արցախին, Սփյուռքին, հայ գյուղացուն, պետք է Երևանի կենտրոնում ապրող մարդուն»,- նշել է Սաղաթելյանը:

Իսկ թե ինչո՞ւ պետք է ընտրեն իրեն, նա ասել է. «Շատերը ճանաչում են ինձ, գիտեն իմ անցած ճանապարհը, ունեմ գիտելիքներ, փորձառություն, անցած ճանապարհ: Ես կարող եմ մեր մարզի յուրաքանչյուր խնդիր պատշաճ, ըստ արժանվույն ներկայացնել նոր խորհրդարանում, բարձրացնել մարզի խնդիրները, գտնել դրանց լուծման ճանապարհները: Հենց դրա համար, կարծում եմ, գեղարքունիքցին կարող է ընտրել ինձ, և կարծում եմ` կընտրի»:

Նշենք, որ Գեղարքունիքի նախկին մարզպետ Իշխան Սաղաթելյանը առաջադրվել է այդ մարզում թիվ 8 ընտրական տարածքում` որպես ՀՅԴ պատգամավորի թեկնածու: