«Հայաստան» դաշինքի նախընտրական քարոզարշավը Տավուշի մարզում
14 Հունիս 2021
«Հայաստան» դաշինքի հաղթարշավի յոթերորդ օրն (հունիսի 13) անցել է Տավուշի մարզում։ Դաշինքի առաջնորդներն ու անդամներն քարոզարշավն սկսել են Զորական գյուղ այցելությունից, այնուհետև Նոյեմբերյան քաղաքում հանրահավաք են հրավիրել։
Հանդիպումներ են եղել նաև Բերդ, Իջևան և Դիլիջան քաղաքներում, պատասխանել ընտրողների հարցերին, որոնք վերաբերում էին երկրի տնտեսական զարգացմանը, փոքր և միջին բիզնեսին աջակցությանը, անվտանգային խնդիրների լուծմանը։
ՀՀ երկրորդ նախագահ Ռոբերտ Քոչարյանն անդրադարձել է նաև «Հայաստան» համահայկական հիմնադրամից ծախսված գումարներին, նշելով, որ ներկայիս իշխանություններն այդպես էլ հստակ չեն ասել, թե ինչ նպատակներով են դրանք ծախսվել։
«Մեր հանդիպումների և շփումների ընթացքում մեր քաղաքացիների աչքերում տեսնում ենք վստահություն, հույս, հավատ, որ դուրս ենք գալու ստեղծված իրավիճակից»,- «Հայաստան» դաշինքի՝ Դիլիջանում ընտրողների հետ հանդիպմանն ասաց ՀՅԴ Հայաստանի ԳՄ ներկայացուցիչ Իշխան Սաղաթելյանը։ «Մենք արդարացնելու ենք այն վստահությունն ու հավատը, որ կա «Հայաստան» դաշինքի նկատմամբ։ Առաջիկա ընտրություններին մնացել է ընդամենը 7 օր։ Այս ընտրությունները մեր երկրի համար ճակատագրական են լինելու՝ պետություն ունենալ-չունենալու ընտրություններ են լինելու։
Հետևաբար, այս գործընթացներին պետք է մոտենալ այս վճռականությամբ ու տրամադրությամբ։ Հունիսի 20-ը լինելու է որոշիչ․ մենք փակելո՞ւ ենք այս ամոթի ու խայտառակության էջը և բացելո՞ւ ենք նոր ու հզոր Հայաստանի էջ, թե՝ ոչ»,- նշեց Սաղաթելյանը։