Արցախի Հանրապետության Ազգային ժողովի պատգամավորների նախաձեռնությամբ օգոստոսի 7-ին գումարվել է ԱՀ ԱԺ արտահերթ նստաշրջան՝ ԱՀ ԱԺ նախագահի ընտրության օրակարգով։

ԱՀ ԱԺ նախագահի տեղակալ Գագիկ Բաղունցը շնորհակալություն է հայտնել Արթուր Թովմասյանին՝ խորհրդարանական ակտիվ գործունեության, վերջին տարիներին Ազգային ժողովի նախագահի պաշտոնում կատարած աշխատանքների համար։

ԱՀ ԱԺ նախագահի թափուր պաշտոնի համար «Ազատ հայրենիք-ՔՄԴ» խմբակցության կողմից առաջադրվել էր «Հայ հեղափոխական դաշնակցություն» խմբակցության պատգամավոր, ՀՅԴ Բյուրոյի անդամ Դավիթ Իշխանյանի թեկնածությունը։

Հիմնավորելով առաջադրված թեկնածությունը՝ ԱՀ նախագահ Արայիկ Հարությունյանը կարևորել է Դավիթ Իշխանյանի անցած մարտական ու քաղաքական ուղին։

«Ազատ հայրենիք-ՔՄԴ» խմբակցության ղեկավար Արթուր Հարությունյանը ներկայացրել է թեկնածուի կենսագրական տվյալները։

Ելույթ ունենալով ներկաների առջև՝ Դավիթ Իշխանյանը շնորհակալություն է հայտնել այս վճռորոշ պահին պատասխանատու պաշտոնն իրեն վստահելու համար։

«Պայքարի ոգին այսօր թևածում է Արցախում: Արցախում բնակվող յուրաքանչյուր անհատ՝ դպրոցական մանուկից մինչև զառամյալ ծերունի, դիմադրություն ցուցաբերելով թշնամու օրեցօր սաստկացող ճնշումներին, կարողանում է պահպանել իր քույրերի և եղբայրների, հայրերի և պապերի կերտած պետությունը»,- իր խոսքում նշել է Դավիթ Իշխանյանը՝ ավելացնելով, որ չպետք է հրաշքների սպասել, քանի որ առանց մեր մասնակցության հրաշքներ չեն լինելու։

Թեկնածության առաջադրման մասին մտքեր են փոխանակել ԱՀ ԱԺ բոլոր խմբակցությունները։ Կայացած գաղտնի քվեարկության արդյունքում 22 կողմ, 9 դեմ ձայների հարաբերակցությամբ ԱՀ ԱԺ նախագահ է ընտրվել Դավիթ Իշխանյանը։

ԴԱՎԻԹ ՌՈՒԲԵՆԻ ԻՇԽԱՆՅԱՆ

Ծնվել է 1968թ. դեկտեմբերի 27-ին ԼՂ Մարտունու շրջանի Աշան գյուղում:

1985թ. ավարտել է Աշանի միջնակարգ դպրոցը:

1992թ. ավարտել է Ստեփանակերտի մանկավարժական ինստիտուտի պատմության ֆակուլտետը՝ «Պատմություն և իրավագիտություն» մասնագիտությամբ:

1987-1989թթ. ծառայել է ԽՍՀՄ զինված ուժերում: Արցախյան ազատագրական պայքարի և կամավորական շարժման ակտիվ մասնակից է:

1989-1991թթ. եղել է ուսանողական ջոկատի գործուն անդամ:

1991-1995թթ.՝ ԼՂՀ առաջին գումարման Գերագույն խորհրդի պատգամավոր

1992-1995թթ.՝ ծառայել է ԼՂՀ պաշտպանության բանակում, եղել Մարտունու շրջանի թիվ 28 գումարտակի հրամանատար:

1995-2000թթ.՝ Աշանի միջնակարգ դպրոցի տնօրեն

2000-2005թթ. ՝ Աշան համայնքի ղեկավար

1989թ-ից՝ ՀՅԴ կուսակցության անդամ

2007 -2021թթ․ ՀՅԴ Արցախի ԿԿ-ի ներկայացուցիչն է:

2015թ. մայիսի 3-ի խորհրդարանական ընտրություններում թիվ 8 ընտրատարածքից մեծամասնական ընտրակարգով ընտրվել է ԼՂՀ վեցերորդ գումարման Ազգային ժողովի պատգամավոր:

2015թ. մայիս — 2017թ. մարտ՝ ԱՀ Ազգային ժողովի «Դաշնակցություն» խմբակցության ղեկավար

2015-2020թթ․՝ ԱԺ ֆինանսաբյուջետային տնտեսական կառավարման հարցերի մշտական հանձնաժողովի անդամ

2020թ․ մարտի 31-ի խորհրդարանական ընտրություններում «Հայ Հեղափոխական Դաշնակցություն» կուսակցության համամասնական ցուցակով ընտրվել է ԱՀ 7-րդ գումարման Ազգային ժողովի պատգամավոր:

2022թ․ մարտին ընտրվել է ՀՅԴ Բյուրոյի անդամ։

Ամուսնացած է, ունի 3 զավակ:

Պարգևատրվել է «Մարտական Խաչ» 1-ին աստիճանի շքանշանով (ԼՂՀ նախագահի թիվ 24-Ա հրամանագիր 04.05.2012թ.) և «Մխիթար Գոշ» մեդալով (ԱՀ նախագահի թիվ 13-Ա հրամանագիր 16.02.2018թ.):