Ահաւասիկ քանի մը տարիներու տպագիր ձեւաչափով բացակայութենէն ետք, այս տարի տպագիր «Ռազմիկ» պարբերաթերթը լոյս տեսաւ նուիրուած Հայոց ցեղասպանութեան 110-ամեակին:

Բոլորս ալ գիտենք Հայոց ցեղասպանութիւնը յիշելու եւ մեր արդար իրաւունքները պահանջելու կարեւորութիւնը: Այսպիսի աշխատանքներ կը հանդիսանան լաւագոյն միջոցներէն մէկը` Հայ դատը ողջ պահելու, առիթ տալով հայ երիտասարդին` քննական միտքով եւ օրինաւոր կերպով մտածելու եւ շարադրելու իր գաղափարները թուղթի վրայ:

Մեզի համար հպարտութիւն է, որ «Ռազմիկ» պարբերաթերթի այս հրատարակութեան բովանդակութիւնը ա՛լ աւելի հարստացաւ, երբ իրենց ներդրումը ունեցան նաեւ Լիբանանի մէջ գործող հայկական վարժարաններու աշակերտները, որոնք իրենց իւրայատուկ յօդուածներու միջոցով անդրադարձան Հայոց ցեղասպանութիւնն ու Հայ դատը մնայուն կերպով յիշելու կարեւորութեան:

«Ռազմիկ» բացառիկի աշխատանքներուն ընթացքը ցոյց տուաւ, որ կայ զգօն երիտասարդ տարր` լիբանանահայ աշակերտութիւն մը, որ վճռական է շարունակելու մեր արդար Դատի հետապնդման պայքարը` անմահ պահելով այդ ոգին եւ Ցեղասպանութեան անմոռաց յիշատակը:

Արդարեւ, այս հրատարակութեան իրենց մասնակցութիւնը բերին 24 հայ աշակերտներ` 12 լիբանանահայ վարժարաններէ.

– Մեծի Տանն Կիլիկիոյ կաթողիկոսութեան դպրեվանք,

– Ազգային Եղիշէ Մանուկեան քոլեճ, Ազգային Միացեալ վարժարան, եւ Յառաջ-Գալուստ Կիւլպէնկեան ազգային վարժարաններ,

– Մ. եւ Հ. Արսլանեան ճեմարան,

– Հայ կաթողիկէ Մեսրոպեան, Ս. Խաչ – Հարպոյեան եւ Սրբոց Հռիփսիմեանց բարձրագոյն վարժարաններ,

– Հայ աւետարանական կեդրոնական բարձրագոյն վարժարան, Հայ աւետարանական քոլեճ (Այնճար) եւ Հայ աւետարանական Շամլեան Թաթիկեան վարժարան,

– ՀԿԲՄ Սահակեան – Լեւոն Մկրտիչեան քոլեճ:

Այս առիթով յատուկ շնորհակալութիւն կ՛ուզենք յայտնել մեր հայկական վարժարաններու տնօրէնութեանց, որոնք ընդառաջեցին եւ իրենց մասնակցութիւնը բերին այս նախաձեռնութեան, ինչպէս նաեւ` բոլոր այն ԼԵՄ-ականներուն, որոնք իրենց ներդրումը ունեցան այս աշխատանքի յաջողութեան մէջ:

«ՌԱԶՄԻԿ» ՅԱՆՁՆԱԽՈՒՄԲ