Կիրակի, Նոյեմբեր 8ի երեկոյեան, հայ համայնքի անդամները հաւաքուեցան Կլենտէյլի մէջ՝ մասնակցելու «Միասնաբար՝ Արցախի Համար» հաւաքին, լուռ քայլարշաւին եւ մոմավառութեան՝ վերահաստատելով իրենց յանձնառութիւնը Ատրպէյճանի մէջ պահուող հայ բանտարկեալներու ազատ արձակման, Արցախի բռնի տեղահանուած ժողովուրդի վերադարձի իրաւունքին եւ Արցախի հայկական ինքնութեան ու ժառանգութեան պաշտպանութեան ի նպաստ։

Կազմակերպուած Հայ Յեղափոխական Դաշնակցութեան Հայ Երիտասարդաց Դաշնակցութեան (ՀԵԴ) Արեւմտեան Ամերիկայի Շրջանի վարչութեան կողմէ, հաւաքը տեղի ունեցաւ Նոյեմբեր 9, 2020ի զինադադարի եռակողմ համաձայնագրի 6րդ տարելիցի նախօրեակին։ Ատրպէյճանական հետագայ շրջափակումը եւ 2023 Սեպտեմբերին իրականացուած ռազմական յարձակումը պատճառ դարձան Արցախի հայաթափման։

Հաւաքը սկսաւ երեկոյեան ժամը 5ին Արցախ եւ Պրոտուէյ փողոցներու խաչմերուկին վրայ, ուր մասնակիցները հաւաքուեցան լսելու հայ համայնքային, քաղաքական եւ հոգեւոր ներկայացուցիչներու խօսքերը, ապա լուռ քայլարշաւով ուղղուեցան դէպի Ս. Աստուածածին եկեղեցի՝ մոմավառութեան համար։

Արցախի պատմական Դադիվանքի նախկին հոգեւոր հովիւ Յովհաննէս քհնյ. Յովհաննիսեան աղօթքով բացաւ հաւաքը։ Ներկայիս Հայաստանի Եռաբլուր զինուորական պանթէոնին մէջ ծառայող տէր Յովհաննէսը իր հետ բերած էր Դադիվանքի Սուրբ Խաչը, որ Արցախի հայ քրիստոնէական ժառանգութեան եւ տեղահանուած ժողովուրդին ու իրենց պապենական հայրենիքի միջեւ անխզելի հոգեւոր կապին խորհրդանիշն է։

Սաթիկ Սերայտարեան ՀԵԴի անունով արտասանեց բացման եւ փակման խօսքերը՝ ընդգծելով հայ երիտասարդութեան պատասխանատուութիւնը՝ շարունակելու պայքարը Արցախի համար եւ ապահովելու, որ անոր ժողովուրդի ճակատագիրը չլքուի։

ՀՅԴ Արեւմտեան Ամերիկայի Կեդրոնական կոմիտէի անունով, Վիգէն Սոսիկեան հանդէս եկաւ խիստ քննադատական ելոյթով՝ դատապարտելով Հայաստանի վարչապետ Նիկոլ Փաշինեանի կառավարութիւնը՝ Արցախի եւ անոր ժողովուրդի հանդէպ իր պատասխանատուութենէն հրաժարելուն համար։ Անոր խօսքը ընդգծեց այն համոզումը, որ Արցախի համար հայ ազգային պայքարը չի կրնար ստորադասուիլ որեւէ իշխանութեան քաղաքական առաջնահերթութիւններուն։

Լոս Անճելըսի Արցախի Պահպանման յանձնախումբի ներկայացուցիչ Ալեոշա Պետրոսեան նոյնպէս արտասանեց խօսք՝ փոխանցելով տեղահանուած արցախահայութեան ձայնը եւ արդարութեան, ճանաչման ու իրաւունքներու վերականգնման անոնց անդուլ պայքարը։

Կլենտէյլի Քաղաքապետ Արտաշէս (Արտի) Քասախեան իր զօրակցութիւնը յայտնեց Արցախի ժողովուրդին։ Անոր խօսքը վերահաստատեց Սփիւռքի հայ համայնքներուն, յատկապէս Հայաստանէն դուրս ամենամեծ հայաբնակ քաղաքներէն մէկուն՝ Կլենտէյլի հայութեան հետեւողական պահանջատիրութեան կարեւորութիւնը։

Մովսէս քհնյ. Շաննագեան խօսք առաւ Ս. Աստուածածին եկեղեցւոյ անունով՝ Հայ եկեղեցւոյ ձայնը միացնելով զօրակցութեան եւ ազգային պատասխանատուութեան պատգամին։

Հաւաքէն ետք, մասնակիցները լուռ քայլարշաւով ուղղուեցան դէպի Ս. Աստուածածին եկեղեցի, ուր երեկոն աւարտեցաւ մոմավառութեամբ եւ աղօթքով՝ Ատրպէյճանի մէջ պահուող հայ բանտարկեալներուն, Արցախի տեղահանուած ընտանիքներուն եւ հայրենիքի պաշտպանութեան համար իրենց կեանքը զոհաբերած նահատակներուն համար։

Եկեղեցւոյ բակին մէջ տէր Յովհաննէսը արտասանեց ազդու փակման խօսք՝ հաստատելով, որ անոնք, որոնք չեն հաւատար եւ չեն պաշտպաներ Արցախի հայ ժողովուրդի իրաւունքները, չեն կրնար իրենք զիրենք հայ կոչել։ Անոր պատգամը ընդգծեց, որ Արցախի պաշտպանութիւնը պարզապէս քաղաքական դիրքորոշում չէ, այլ հիմնարար ազգային եւ բարոյական պատասխանատուութիւն։

Դադիվանքի Սուրբ Խաչի ներկայութիւնը յատուկ իմաստ հաղորդեց մոմավառութեան՝ Կլենտէյլի մասնակիցները կապելով Արցախի ամենանուիրական հայկական սրբավայրերէն մէկուն հետ, որ այժմ անհասանելի է հայ հաւատացեալներուն։

Հաւաքէն առաջ, Նոյեմբեր 5 թուակիր նամակ մը յղուած էր Ատրպէյճանի գլխաւոր հիւպատոսին՝ ՀԵԴի եւ ՀՅԴ «Շանթ» Ուսանողական միութեան կողմէ։ Նամակը կը պահանջէր ատրպէյճանական կալանքի տակ գտնուող բոլոր հայ պատանդներու եւ ձերբակալուածներու անյապաղ ազատ արձակումը, անկախ այցելութիւններու ապահովումը եւ միջազգային օրէնքին համապատասխան վերաբերմունքի երաշխիքներ։

Վկայակոչելով Նոյեմբեր 9, 2020ի զինադադարի համաձայնագրի 8րդ կէտը, որ նախատեսուած է ռազմագերիներու, պատանդներու եւ այլ ձերբակալուած անձանց փոխանակում, կազմակերպութիւնները նաեւ իրենց բողոքը կը յայտնէին, որ համաձայնագիրէն վեց տարի ետք Ատրպէյճան բանտարկուած կը պահէ գերիները։

Կիրակի օրուան հաւաքը փաստեց Սփիւռքի անսասան վճռակամութիւնը՝ Արցախը պահելու ազգային օրակարգի առաջնահերթութիւններու շարքին՝ անկախ Հայաստանի կամ տարածաշրջանի քաղաքական փոփոխուող հանգամանքներէն։ Արցախի, անոր ժողովուրդին եւ անոնց հիմնարար իրաւունքներու համար պայքարը կը շարունակուի։