Մինչ կը մօտենանք Նոր Տարուան, կը փոխանցենք մեր շնորհաւորանքը ձեզմէ իւրաքանչիւրին: Ընթացիկ տարին եղաւ մարտահրաւէրներու եւ իրագործումներու տարի մը, իսկ ձեր նուիրումն ու կարեկցութիւնը եղան փարոսներ` ծանր եւ դժուարին ժամանակներու մէջ: Երբ դժուարութիւններու դէմ յանդիման գտնուեցանք, դուք օժանդակութեան ձեռք երկարեցիք՝ կարիքաւորներուն յոյս եւ քաջալերանք ցոյց տալով:

ՀՕՄ-ի մեծ ընտանիքը շնորհակալ է բոլոր անոնց, որոնք կը մարմնաւորեն ծառայութեան իսկական ոգին: Ձեր յանձնառութիւնը, ուժն ու միասնականութիւնը եղան ներշնչման աղբիւրներ եւ մեր կազմակերպութիւնը ուժեղ պահեցին: Մենք շնորհակալ ենք մեր զօրակիցներուն՝ իրենց անվերապահ աջակցութեան եւ հաւատքին համար, հանդէպ մեր առաքելութեան: Իւրաքանչիւր նուիրատուութիւն մեծ եւ իմաստալից ազդեցութիւն ձգեց բազմաթիւ անձերու վրայ` անգամ մը եւս փաստելով գթութեան եւ առատաձեռնութեան անսահման ուժը:

Մինչ կը պատրաստուինք մեր կազմակերպութեան 115-ամեակին, կը գնահատենք կտակը մեր հիմնադիր սերունդին, որուն արիութիւնն ու տեսիլքը ընթացք տուին հարիւր տարի առաջ սկսուած մեր երթին: Խորապէս կը հաւատանք, որ ապագային իրերայաջորդ սերունդները մեր գործը պիտի շարունակեն, յառաջ տանելով միասնականութեան արժէքները, կարեկցութիւնն ու կամաւոր աշխատանքը, որ մեր առաքելութեան հիմքն է:
Նոր Տարին կը դիմաւորենք տոկունութեամբ եւ դժուարութիւնը յաղթահարելու խոր յանձնառութեամբ։ Խորապէս կը հաւատանք, որ միասնաբար կրնանք դիմագրաւել որեւէ մարտահրաւէր եւ նոյնիսկ կրնանք նոր գագաթներ նուաճել:

Խոր գնահատանքով՝ ձեզի կը մաղթենք ուրախ Սուրբ Ծնունդ եւ խաղաղութեամբ, առողջութեամբ եւ յոյսով պարուրուած Նոր Տարի մը:
Հայ Օգնութեան Միութեան Կեդրոնական Վարչութիւն