ԱԺ «Հայաստան» խմբակցության պատգամավորներ Թադեւոս Ավետիսյանն ու Արծվիկ Մինասյանը երկու նախագիծ են ներկայացրել Ազգային ժողով, իսկ երրորդը պատրաստվում են ներկայացնել առաջիկայում: Պատգամավոր Թադեւոս Ավետիսյանից «Հրապարակը» հետաքրքրվեց, թե ինչ նախագծերի մասին է խոսքը, դրանք կարժանանա՞ն արդյոք իշխանական կողմի հավանությանը, թե՞ ոչ:

«Նախագծերից մեկը վերաբերում է խնդրահարույց գույքահարկի բարձրացմանը: Առաջարկում ենք, որ 2025-2026 թվականներին նախատեսված 50 տոկոս բարձրացումը կասեցվի, եւ գոնե այս մակարդակի վրա մնա գույքահարկի գինը: Այդ ամենից հետո պետք է առավել գլոբալ մոտենալ հարցին, ինչպես նաեւ՝ նախատեսվի չհարկվող շեմ:

Մեր տեսակետն այն է, որ, այո, գերթանկարժեք գույքերի հարկերը շատ ավելի մեծ պետք է լինեն: Բայց կան բազմաթիվ քաղաքացիներ, ովքեր ապրում են ծայրամասերում եւ չունեն թանկարժեք գույք, սակայն նրանց համար եւս կարող է սոցիալական բեռն ավելանալ:

Գրեթե վստահ եմ, որ այս նախագիծը իշխանությունները չեն ընդունելու, քանի որ հարկ են քերթում քաղաքացիներից, մենք գիտենք, որ նախորդ տարվանից ունեն հարկային մուտքերի ապահովման խնդիր: 2024 թվականին 200 միլիարդ դրամի չափով թերակատարել են մուտքերը եւ այժմ նման թանկացումներով փորձում են քաղաքացիներից հարկեր քերթել: Բայց պետք է հաշվի առնեն, որ հատկապես սոցիալական խոցելի խավերն են տուժում այդ ամենից:

Հաջորդ նախագիծը վերաբերում է համատարած հայտարարագրմանը: Այդ ամենը սոցիալական քաղաքականության հասցեականացման բարձրացման հետ որեւէ աղերս չունի: Հակառակը` սա միայն լրացուցիչ վարչարարություն եւ լրացուցիչ անիմաստ բեռ է քաղաքացիների համար, իսկ իրական նպատակը թաքնված է: Այն քաղաքացիների գրպանը մտնելն է: Անգամ մարդկանց գրպանի կոպեկներն են փորձում հաշվել, սպառնալիքի, հարկադրանքի ներքո: Մենք առաջարկում ենք չեղարկել հայտարարագրման համակարգը, քանի որ այն ոչ մի հարց չի լուծում, զուտ ավելորդ վարչարարություն եւ խնդիրներ է ստեղծում քաղաքացիների համար, հատկապես մեր այն բազմահազար քաղաքացիների համար, ովքեր աշխատավարձից, թոշակից բացի այլ եկամուտ չունեն: Այստեղ հարց է առաջանում․ եթե հարկային մարմինն ունի այդ տեղեկությունները, ինչո՞ւ են իշխանությունները փորձում կրկնակի տեղեկություններ հավաքել մարդկանց մասին, խճճելով իրավիճակը:

Երրորդ նախագիծն էլ, որը մոտ օրերս կդնենք շրջանառության, վերաբերում է բազմակի քննարկումներ անցած փոքր բիզնեսի շրջանառության հարկին, ինչպես գիտենք՝ հունվարի 1-ից փոքր բիզնեսի շրջանառության հարկը կրկնապատկվել է: Առեւտրի ոլորտում 5 տոկոսից դրույքաչափը դարձել է 10 տոկոս, արդյունաբերության ոլորտում թիվը 3,5 տոկոսից դարձավ 7 տոկոս, հանրային սննդի ոլորտում 6 տոկոսից դարձավ 12 տոկոս, ու այսպես շարունակ: Այստեղ կրկին հարկ քերթելու գաղափարն ու նպատակն է: Ուղղակի խնամքով փորձում են իրենց նպատակները թաքցնել, իբրեւ թե ստվերի կրճատում են ուզում: Բայց իրականում մեծ բիզնեսի հարկերը մնում են նույնը, փոքր եւ միջին բիզնեսի հարկերն ավելացնում են: Արդյունքում մեռնում է փոքր բիզնեսը: Օրինակ` մեր բակում արդեն իսկ երկու բակային խանութ է փակվել: Մարդիկ 20 եւ ավելի տարիներ աշխատել են, եկամուտ են ստացել, իսկ այժմ չեն կարողանում նոր հարկերի տակից դուրս գալ: Ցավն այն է, որ ֆինանսական խնդիրներ ունեցող մեր քաղաքացիները, միայնակ թոշակառուները տուժում են այս ամենից»,- պատասխանեց մեր զրուցակիցը: