Ճիշտ ժամանակն է, որ մեր ժողովուրդը սթափվի, իր արմատներին վերադառնա
28 Մայիս 2025
ՀՅԴ Հայաստանի Գերագույն մարմնի նախաձեռնությամբ՝ այսօր Մայիս 28-ին, Հայաստանի առաջին հանրապետության հիմնադիր Արամ Մանուկյանի արձանի մոտ տեղի ունեցավ ծաղկեմատույց:
«Թուրքիայի հետ հարաբերությունների իրական կարգավորում իրականացրել են մեր նախնիները՝ Սարդարապատով»,- լրագրողների հետ զրույցում ասաց ՀՅԴ Բյուրոյի ներկայացուցիչ Արմեն Ռուստամյանը։
Նա հիշեցրեց, որ Սարդարապատի նախօրեին էլ Երևանի փողոցներում թուրքերի հետ բարեկամության քարոզ անողներ եղել են, և լավ է, որ ժողովուրդը նրանց հետևից չի գնացել։
Ճիշտ ժամանակն է, որ մեր ժողովուրդը սթափվի, իր արմատներին վերադառնա. Առաջին Հանրապետության հիմնադիր Արամ Մանուկյանի հիշատակին հարգանքի տուրք մատուցելիս լրագրողների հետ զրույցում ասաց ՀՅԴ Բյուրոյի ներկայացուցիչ Արմեն Ռուստամյանը։
«Ինչպես Գարեգին Նժդեհն է ասում՝ ժողովուրդներից է ամեն հաղթանակ, և ամեն անկարող ղեկավարությունից է պարտությունը։ Մենք պետք է համախմբվենք, մեր ժողովուրդն իր ուժի տեղը վերագտնի, ես վստահ եմ, որ հաղթանակները չեն ուշանա»,-ասաց Ռուստամյանը։
Նա նշեց, թե պետք է վերագտնել հաղթանակի հասնելու այն բանաձևը, որով անցել են մեր նախնիները և պարգևել այս Հայաստանը։
Ի՞նքն է գտել հայրենիքը, այդ հայրենիքն ինքը ստացել է պայքարողների, Արամ Մանուկյանների շնորհիվ, հայրենիքը կորած էր, ինքն եկավ, գտավ հա՞, ասաց Արմեն Ռուստամյանը՝ արձագանքելով Նիկոլ Փաշինյանի այսօրվա հայտարարությանը, թե «մեր ժողովուրդը հայրենիք փնտրելու կարիք չունի այլևս, հայրենիքի մասին երազելու անհրաժեշտություն չկա, որովհետև մեր երազանքներն իրագործված են, հայրենիքը գտնված՝ ի դեմս Հայաստանի Հանրապետության, ի դեմս պետության»։
«Այդ հայրենիքը ձևավորվել է մեր նախնիների թափած հերոսական արյան շնորհիվ։ Իրենք ոչինչ չեն գտել, իրենք եղածը կորցրել են։ Ի՞նչ գտնելու մասին են խոսում։ Այն, ինչ որ ժառանգել էին, թող պահեին, այն, ինչ ժառանգել են, օր-օրի կորցնելով գնում ենք, այ սա կանգնեցնելու խնդիր կա»,-ասաց Արմեն Ռուստամյանը։
Նրա խոսքով՝ այս իշխանությունները պարտությամբ փորձում են իրենց Հայաստանը ստեղծել։
«Իրենց «իրական Հայաստանի» հիմքում ընկած է պարտվողականությունը։ Իրենց համար երկու բառ ուղղակի սարսափ է առաջացնում՝ հաղթանակ և հայկական։ Իրենք այդ երկու բառերից փախչում են, ինչպես օձը՝ դաղձից»,-ասաց Ռուստամյանը։
Մանրամասները՝ տեսանյութում
