Նոյեմբերի 6-ին Հրապարակ TV-ի Հինգշաբթի հաղորդաշարի հյուրն էր ՀՅԴ Հայաստանի ԳՄ անդամ, ՀՀ ԱԺ Հայաստան խմբակցության պատգամավոր Գեղամ Մանուկյանը: Անդրադարձ է կատարվել օրվա հրատապ թեմաներին, մասնավորապես՝ Ադրբեջանի տարածքով Հայաստան՝ ցորենի առաջին խմբաքանակի տարանցմանը, այդ իրադարձության կապակցությամբ ՀՀ իշխանությունների՝ ոչնչով չհիմնավորված ցնծությանը, ադրբեջանական կողմի վերջին շրջանի հայտարարություններին, ՀՀ իշխանությունների կցկտուր արձագանքներին ու շարունակվող զիջողական քաղաքականությանը:

Ըստ Գեղամ Մանուկյանի՝ Ադրբեջանի իշխանությունների խոսույթում և վարած քաղաքականության հիմքում ոչինչ չի փոխվել: Հայաստանի տարածքի նկատմամբ նկրտումները մնացել են նույնը, մինչդեռ ՀՀ իշխանություններն ամեն ինչ անում են, որպեսզի մոռացվեն Արցախյան պատերազմներն ու մեր հերոսները, իրենց իսկ կողմից դավաճանված Արցախը: «Այսօր Երևանի բուսաբանական այգում զոհերի հիշատակին ինչ-որ Կյանքի պուրակ են կառուցում: Ինչո՞ւ… Որպեսզի Եռաբլուրից, որտեղ մեր հազարավոր զոհերն են ննջում, հանեն պետական արարողակարգերը»,- նշել է Գեղամ Մանուկյանը:

Անդրադարձ է կատարվել նաև ՀՀ իշխանությունների սանձազերծած հակաեկեղեցական պայքարին և ներհայաստանյան քաղաքական գործընթացներին: Պատասխանելով հարցին՝ արդյոք Նիկոլ Փաշինյանի և մի շարք ՔՊ-ականների հայտարարություններն այն մասին, որ դիմել են ընդգրկվելու ՔՊ նախընտրական ցուցակում, նշանակում է՝ ունենալու ենք ԱԺ հերթական ընտրություններ, Գեղամ Մանուկյանն ընդգծել է, որ այս իշխանությունների պարագայում, որոնք առավոտյան մի բան են ասում, իսկ երեկոյան մեկ այլ բան, օրական մի գլխարկ են փոխում, հնարավոր չէ ոչինչ գուշակել: Ուղղակի չգիտես՝ ինչ կասեն կամ կանեն հաջորդ վայրկյանին: «Մենք պարզապես պետք է պատրաստ լինենք ցանկացած սցենարի»,- ասել է Գեղամ Մանուկյանը:

Մանրամասները՝ տեսանյութում