Ադրբեջանը ուժ է կիրառել նաև Հայաստանի նկատմամբ. «Արցախ. չլուծված հակամարտություն, վերադարձի իրավունք» միջազգային համաժողովի ժամանակ հայտարարել է ՀՅԴ Հայ Դատի և քաղաքական հարցերի գրասենյակի պատասխանատու Կիրո Մանոյանը։

Ընդհանուր առմամբ, Մանոյանը ստեղծված իրավիճակը համեմատել է սենյակում փիղ ունենալու հետ, երբ բոլորը ձևացնում են, թե սենյակում փիղ չկա։ Իրավիճակն ավելի պատկերավոր ներկայացնելու համար Մանոյանը սլայդներ է ցուցադրել, որոնցում կոնկրետ նշված են հակառակորդի գործողություններն այս կամ այն դեպքում։ Նա պարզաբանել է, որ ուժի կիրառման և դրա սպառնալիքի պայմաններում ստորագրված փաստաթղթերն անվավեր են։

Մանոյանը հիշեցրել է, որ ավելի վաղ հայտարարվել էր, թե Բաքվի հետ խաղաղության համաձայնագրի ստորագրմանը խոչընդոտում են երկու հանգամանքներ՝ նրանք պահանջում էին ԵԱՀԿ ՄԽ-ի լուծարում և ՀՀ Սահմանադրության փոփոխություն։ Մայիսին Վաշինգտոնում հաստատել են, որ աշխատում են Հայաստանի և Ադրբեջանի միջև խաղաղության հաստատման ուղղությամբ՝ Բաքվի հնարավոր ագրեսիայի լույսի ներքո։ Ինչպես նկատել է Մանոյանը, սա նաև հաստատում է, որ Վաշինգտոնում փաստաթղթերը ստորագրվել են ուժի կիրառման սպառնալիքի ներքո։

«Իրականությունն այն է, որ նախաստորագրված փաստաթղթերում Արցախն ու արցախցիները չկան, չկա նաև ԵԱՀԿ Մինսկի խումբը։ Բայց արցախցիներ կան։ Հայաստանի իշխանություններն ապօրինի են, քանի որ վերընտրվելուց հետո մինչ օրս անում են ճիշտ հակառակն այն ամենին, ինչ խոստացել էին մինչև ընտրությունները և ներառել իրենց ծրագրում՝ դրանցից հետո։ Այս ապօրինությունը նաև վկայում է այն մասին, որ փաստաթղթերն ուժ չունեն։ Եթե իշխանություններին հաջողվի որևէ բան փոխել հանրաքվեով, դա նույնպես անվավեր կլինի», – ընդգծել է Մանոյանը։ «Այս իշխանությունները պետք է հեռանան», – եզրափակել է նա։