Մարտի 5-ին Հրապարակ TV-ի «Հինգշաբթի» հաղորդաշարի հյուրն էր ՀՅԴ Հայաստանի Գերագույն մարմնի անդամ, Իրանի Իսլամական Հանրապետության խորհրդարանի նախկին պատգամավոր Կարեն Խանլարյանը:

Անդրադարձ է կատարվել այս օրերին Իրանի Իսլամական Հանրապետության դեմ ամերիկա-իսրայելական ագրեսիայի հետևանքով ստեղծված տագնապալի իրավիճակին, և հակամարտության հնարավոր զարգացումներին: Հարցին՝ կլինի՞, արդյոք, ցամաքային ներխուժում Իրանի տարածք, Կարեն Խանլարյանը թերահավատությամբ է վերաբերվում: «Ոչ ԱՄՆ-ը, ոչ Իսրայելը չունեն հետևակի և ցամաքային զորքերի այնպիսի կուտակումներ տարածաշրջանում, որ կարողանան դիմակայել պաշտոնական տվյալներով մոտ մեկ միլիոն ցամաքային զորակազմ և մոտ երկու միլիոն աշխարհազորի հնարավորություն ունեցող իրանական բանակին: Դա ԱՄՆ-ի և Իսրայելի կողմից առնվազն արկածախնդրություն կլինի»,- ասել է Կարեն Խանլարյանը:

Ըստ Կարեն Խանլարյանի՝ միասնաբար գործող Իսրայելը և ԱՄՆ-ն այս պատերազմում հետապնդում են միմյանցից զգալիորեն տարբերվող նպատակներ: Եթե Իսրայելի նպատակը Իրանում ռեժիմի փոփոխություն իրականացնելն ու Իրանը մասնատելն է, ապա ԱՄՆ-ը հեռուն գնացող զուտ տնտեսական և աշխարհաքաղաքական նպատակներ է հետապնդում: «Դժվար է ասել՝ ինչպես կավարտվի այս պատերազմը, բայց մեկ բան հստակ է, որ Հայաստանի համար մասնատված Իրանը կարող է լրջագույն սպառնալիք լինել, մինչդեռ միասնական Իրանը եղել է, կա ու կլինի հուսալի և կանխատեսելի հարևան»,- նշել է Կարեն Խանլարյանը:

Քննարկվել են նաև իրանական տագնապի առնչությամբ ՀՀ իշխանությունների դրսևորած ոչ ադեկվատ կեցվածքին ու քայլերին վերաբերող հարցեր: Կարեն Խանլարյանի համոզմամբ՝ դրանք ևս մեկ անգամ ապացուցեցին, որ Իրանի հարևան Հայաստանը անկախության և ինքնիշխանության լրջագույն պակաս ունի: Նրա խոսքով՝ այդ կարկանդակային տեսարանները, Իրանի Գերագույն հոգևոր առաջնորդի սպանության կապակցությամբ ցավակցության ուշացումը կամ ցավակցողների ոչ պատշաճ աստիճանը հուշում են, որ ՀՀ իշխանություններն, ըստ էության, չեն կողմնորոշվում ստեղծված իրավիճակում և կարծես սպասում են, թե ինչ կհրահանգեն իրենց դրսից:

Կարեն Խանլարյանը խոսել է նաև այս օրերին Իրանի ժողովրդի ճակատագիրը կիսող իրանահայ համայնքի և մասնավորապես թեհրանի հայության խնդիրների մասին և ցավով նշել, որ ՀՀ իշխանությունները որևէ մտահոգություն այս կապակցությամբ չեն հայտնել:

Մանրամասները՝ տեսանյութում