ԱԺ «Պատիվ ունեմ» խմբակցության նախաձեռնությամբ այսօր՝ սեպտեմբերի 26-ին հրավիրվել են խորհրդարանական լսումներ: Քննարկվում է խմբակցության ներկայացրած «Ազգային ճգնաժամի եւ կառավարման ձախողման մասին» ԱԺ հայտարարության նախագիծը: ՀՅԴ Հայաստանի ԳՄ ներկայացուցիչ, «Հայաստան» խմբակցության պատգամավոր Իշխան Սաղաթելյանը ներկայացրեց իրենց խմբակցության եւ դաշինքի դիրքորոշումն այս նախագծի վերաբերյալ։

Նա ասաց, որ իրենք ամբողջությամբ կիսում են հայտարարության մեջ ներկայացված փաստերն ու հիմնավորումները։ «Ավելին, վերհաստատում ենք մեր դիրքորոշումները, որ Նիկոլ Փաշինյանի կառավարության ժամանակահատվածում բազմաթիվ անգամ խախտվել է մեր երկրի սահմանադրական կարգը, Նիկոլ Փաշինյանը գործել է պետական դավաճանության հատկանիշներով։ Եվ Նիկոլ Փաշինյանին պաշտոնազրկելու իրավա-քաղաքական հիմքերը անհերքելի են։ Հետեւաբար, մեր դիրքորոշումը հետեւյալն է՝ նախագծին կողմ ենք, ե՛ւ հանձնաժողովում, ե՛ւ լիագումար նիստում կողմ ենք քվեարկելու»,- ասաց Սաղաթելյանը։

Նա նշեց, որ որեւէ մեկը կասկածի տակ չի դնում այն հարցը, որ այս իշխանությունը մեր պետականությանը սպառնալիք է, եւ նրանց՝ մեկ օր ավելի իշխանությանը մնալը վտանգավոր է։ «Ամբողջ հարցը հետեւյալն է՝ ինչպե՞ս, ի՞նչ ժամկետներում եւ ի՞նչ ճանապարհով ազատվել այս իշխանությունից։ Նախորդ 5 տարիների ընթացքում մենք փորձել ենք մթնոլորտ գեներացնել, մեր երկրում համաժողովրդական շարժում ձեւավորել, եւ, այո, մենք տեսել ենք ճանապարհը՝ սահմանադրական ճանապարհով երկրի խորհրդարանում իմպիչմենտի ճանապարհով հասնել իշխանափոխության։ Բայց ինչո՞ւ մինչեւ հիմա մենք չենք եկել խորհրդարան, եւ այս հարցը չի մտել օրակարգ՝ բացառապես մի պատճառով, որ մենք չենք ունեցել բավարար ստորագրություններ՝ խորհրդարան մտնելու եւ հաջողության հասնելու համար։

Մեր գործընկեր «Պատիվ ունեմ» խմբակցությունը՝ ի դեմս ՀՀԿ-ի, ստանձնել է քաղաքական պատասխանատվությունը եւ հայտարարել իմպիչմենտի գործընթաց սկսելու մասին։

Մեր դիրքորոշումը եղել է հետեւյալը, որ մենք միանում ենք իմպիչմենտի գործընթացին, հրապարակել ենք մեր ստորագրությունները, ասել ենք՝ եկեք արձանագրենք, որ «Հայաստան» խմբակցությունը միացած է եւ ուժերը կենտրոնացնենք իշխանական պատգամավորների վրա՝ փորձելով ունենալ պակասող ստորագրությունները եւ սկսել գործընթաց։ Անցել է 3-4 ամիս, մեր գործընկերները պարբերաբար հայտարարել են, որ պրոցեսը չի ընդլայնվում եւ առաջ չի գնում նաեւ այն պատճառով, որ «Հայաստան» խմբակցության պատգամավորները չեն ստորագրել այն ձեւաթղթի տակ, որը ներկայացրել է «Պատիվ ունեմ» խմբակցությունը։ Նաեւ եղել է հրապարակային հայտարարություն, որ իշխանական պատգամավորները չեն միանում այն պատճառով, որովհետեւ այդ ձեւաթղթի տակ չկա մեր ստորագրությունը։

Հետեւաբար, հաշվի առնելով նոր իրողությունը եւ մեր գործընկերների այդ վստահեցումը, ես մեր խմբակցության պատգամավորների՝ երեք ամիս առաջ ստորագրած ստորագրությունները հիմա կփոխանցեմ «Պատիվ ունեմ» խմբակցությանը՝ կցելու այդ գործընթացին եւ ֆիքսելու, որ մեր ստորագրությունները կային ինչպես 3 ամիս առաջ, այնպես էլ հիմա»,- հայտարարեց Իշխան Սաղաթելյանը։

Նա ընդգծեց` ակնկալում է, որ ողջամիտ ժամանակահատվածում հնարավոր կլինի լրացնել պակասող ստորագրությունները և իմպիչմենտի իրական մեկնարկը տալ ԱԺ դահլիճում։

Մանրամասները՝ տեսանյութում.