ՀՅԴ Հայաստանի Երիտասարդական միության անդամներն այսօր, նոյեմբերի 6-ին ակցիա են իրականացրել կառավարության շենքի դիմաց։ Ակցիան արձագանք է Ալիևի վերջին սպառնալիքներին և Հայաստանի կառավարության լռությանը։

ՀՅԴ ՀԵՄ Կենտրոնական վարչության ներկայացուցիչ ժորա Ավդալյանն իր խոսքում հիշեցրեց, որ ՔՊ-ի երազանքի «խաղաղության» պայմաններում Արցախը հայաթափվեց, իսկ Ալիևը շարունակում է հոխորտալ։

«Մեզ համար Ադրբեջանի նպատակները միշտ եղել են հստակ և ակներև՝ ոչ թե խաղաղություն, այլ Հայաստանի ենթարկեցում ադրբեջանական շահերին, ոչ թե փոխադարձ հարգանք, այլ զավթում, ոչ թե ագրեսիվ հռետորաբանությունից ու ատելության տարածումից հրաժարում, այլ սեփական թեզերի առաջխաղացում գործող իշխանությունների օգնությամբ։

Բաքուն ձգտում է Հայաստանի ինքնիշխանության սահմանափակման։ Սևանա լճի սեփականացման քարոզչական գործընթացը, որը սկսել է Ալիևը, որին ջանք չխնայելով աջակցում են ադրբեջանական շահերի պաշտպաններ Ռուբեն Ռուբինյանը, Նիկոլ Փաշիյանը, Ալեն Սիմոնյանը և այլ պետականակործան գործիչներ, երևի չգիտեն, որ հայ ժողողուրդն ունի պատական հիշողություն։

Ալիևի հայտարարությունը քարոզչական հնարք է, որը նպատակ ունի նորմալացնել պատմական փաստերի կեղծումը»,-ասաց նա։

ՀՅԴ ՀԵՄ անդամ Ստելլա Հունանյանը իր հերթին մեջբերեց Ռուբեն Ռուբինյանի գրառումից հատված, որից հետո ներկայացրեց Ալիևի հոխորտանքներին արժանավայել հակադարձելու տարբերակները։

Լրագրողների հետ զրույցում ՀՅԴ անդամ, հրապարակախոս, վերլուծաբան Վաչե Բրուտյանը նշեց, որ փոխարեն Ալիևի սպառնալիքներին ու հոխորտանքներին համարժեք պատասխանելու, ՀՀ իշխանությունը լղոզում  է Ալիևի ասածները՝ փորձելով թմրեցնել հայ ժողովրդի զգոնությունը։

Մանրամասները՝ տեսանյութում