ՀՅԴ Բյուրոյի ներկայացուցիչ Արմեն Ռուստամյանի ելույթը ՀՅԴ «Նիկոլ Աղբալյան» ուսանողական միության 35-րդ ամյակին նվիրված միջոցառմանը.

«35 տարին շատ լուրջ ճանապարհ է և ինչպես ասվեց՝ շատ կայացած քաղաքական ուժեր անգամ այդքան տարի չեն գոյատևում և այս առումով մենք իսկապես միշտ խոսում ենք մեր տարիքի մասին և անդրադառնում նրան, որ այդ տարիքը մեզ չի մեծացնում, այլ երիտասարդացնում է և ՆԱՈւՄ-ը դրա ամենալավ ապացույցն է: Դաշնակցությունը 135 տարեկան է, բայց ունի ՆԱՈւՄ, որը 35 տարեկան է և գնալով ավելի երիտասարդանում է: Դաշնակցության կենսունակության և ՆԱՈւՄ-ի նաև կենսունակության ֆենոմենը, գաղտնիքը հենց դրանում է: Դաշնակցությունը կարողացել է իր ամբողջ կենսագրության մեջ մեկտեղել թե՛ փորձը, թե՛ երիտասարդական ավյունը, թե՛ ուժը, թե՛ միտքը, և մեր արժեհամակարգն էլ հենց դրա վրա է ձևավորված․․․

Մեր կենսունակության գաղտնիքը կարելի է փնտրել հենց մեր զինանշանի մեջ, որ թե՛ բահն է, թե՛ սուրը, թե՛ գրիչը, և շատ ճիշտ են արել ՆԱՈւՄ-ը ստեղծողները, երբ վերցրել են այդ զինանշանից գրիչն ու սուրը, և հավատարիմ են մնացել հենց այդ խորհրդին, որովհետև թե՛ միտքը, թե՛ ուժը, թե՛ ավյունը երիտասարդական կարողացել են մեկտեղել, և պատահական չէ, որ Դաշնակցության հիմնադիրները հենց ուսանողներ են եղել, որովհետև մեր ուժը եղել է բանիմաց, կրթված, ուսում ստացած երիտասարդը, և նա է, որ ապագա է կերտում, նա է, որ կարողանում է տեսնել օրվա հրամայականը, տեսնել ձևերը և մեթոդները, ինչպես իր կյանքը արժևորի և իմաստավորի»,-ասել է Արմեն Ռուստամյանը։

Նրա խոսքով՝ Դաշնակցությունը, որտեղ որ կայացել է, այնտեղ միշտ իր կողքին ունեցել է ՆԱՈւՄ-ի նման երիտասարդական կառույց։ Ուսանողական միությունները Դաշնակցության համար եղել են կադրերի դարբնոց։

«Այս կառույցը, իսկապես, դեռ երկար տարիների անելիք ունի, իր ժառանգությունը գիտակցում է, իր առաքելության տերն է և միայն կարող ենք մաղթել հաջողություն, մաղթել երկար տարիների աշխատանք․․․Այսօր էլ Հայաստանը և հայությունը կանգնած են լրջագույն մարտահրավերների առաջ, և ես վստահ եմ, որ ՆԱՈւՄ-ի նման կառույց ունեցող Հայ Յեղափոխական Դաշնակցությունը միակամ համոզումով հաղթահարելու է նաև այս դժվարությունները մեզ բաժին հասած, և ՆԱՈւՄ-ի նման մեծ, պայծառ դեմքեր ունեցող կառույցն է, որ կարող է անգամ անելանելի վիճակում ելքեր գտնել․․․ Ձեզ մաղթում եմ հաջողություն, բարի երթ և նորից ու նորից իրար հետ միասին՝ միավորված կերտենք մեր հաղթանակները, որին այսքան կարոտ է մեր ժողովուրդը»,- ամփոփելով խոսքը՝ ասել է ՀՅԴ Բյուրոյի ներկայացուցիչը: