ԱԺ «Հայաստան» խմբակցության նախաձեռնությամբ այսօր՝ նոյեմբերի 26–ին, Ազգային ժողովում մեկնարկել են «Հայաստանի Հանրապետությունում առկա քաղբանտարկյալների եւ նրանց խախտված իրավունքների վերականգնման մասին» խորագրով խորհրդարանական լսումներ։

«Այսօր գլխավոր դատախազը խուսափեց ներկա գտնվել լսումներին մեկ պարզ պատճառով՝ չունենալով զեկույցում տեղ գտած փաստերի նկատմամբ հակափաստարկներ և նաև չունենալով պատասխաններ մի շարք ապօրինությունների վերաբերյալ, որոնք իրականացվում են հաճախ կամ դատախազության անմիջական նախաձեռնությամբ կամ մասնակցությամբ». հայտարարեց ՀՅԴ Հայաստանի Գերագույն մարմնի ներկայացուցիչ, ՀՀ ԱԺ «Հայաստան» խմբակցության պատգամավոր Իշխան Սաղաթելյանը։

Նա նաև անդրադարձավ այն փաստին, որ միջազգային կառույցների ներկայացուցիչները ևս չեն մասնակցում լսումներին ու վստահեցրեց՝ կգտնեն արդյունավետ ձևաչափեր այս քննարկման արդյունքները միջազգային գործընկերներին ներկայացնելու համար։ Իշխան Սաղաթելյանը ահազանգեց՝ բոլոր նրանք, որոնք կանգնած են հայկական պետական շահերի պաշտպանության հիմքերում, նրանց փորձում են շինծու մեղադրանքներով կալանավորել և մեկուսացնել:

Իշխան Սաղաթելյանը հորդորեց ընդդիմադիր ուժերին միասնաբար վերահսկել նախընտրական, ընտրական և հետընտրական գործընթացները։ Նա վստահեցրեց՝ մեկ թիրախ պիտի ունենան ընդդիմադիր ուժերը, որն այս չարիքի իշխանությունն է։

Իշխան Սաղաթելյանն ԱԺ ամբիոնից համագործակցության հրապարակային կոչ արեց ընդդիմադիր ուժերին։

«Կարծում ենք, որ ընդդիմադիր դաշտի բոլոր ուժերը՝ ազգային, պետական մտածողություն ունեցող քաղաքական և հասարական շրջանակները պարտավոր են մեկտեղել իրենց ջանքերը և հնարավորությունները՝ այս իրավիճակը կասեցնելու և փոխելու համար։ Ընդդիմադիր ուժերը, անկախ իրենց տարաձայնություններից, առանցքային օրակարգային հարցերում պետք է համագործակցեն»,-ասաց Իշխան Սաղաթելյանը՝ ներկայացնելով առաջարկի 6 կետ։

1.Օրինական բոլոր միջոցներով հակազդեցություն բռնաճնշումների, քաղաքական հետապնդումների և ազատությունների սահմանափակումների նկատմամբ.
2.Հայ Առաքելական Եկեղեցու և ազգային արժեքների պաշտպանություն.
3.Քաղբանտարկյալների իրավունքների պաշտպանություն որևէ քաղբանտարկյալ բոլորիս քաղբանտարկյալն է սկզբունքով.
4.Ընտրական գործընթացի օրինականության ապահովում եւ վերահսկողության իրականացում.
5.Միմյանց նկատմամբ հակաքարոզչության բացառում.
6.Վարչախմբի հետ ցանկացած (այդ թվում հետընտրական փուլում) համագործակցության բացառում։

Այս օրակարգով համագործակցությունը չպետք է որեւէ կերպ կաշկանդի եւ սահմանափակի քաղաքական ուժերի՝ իրենց ծրագրերից ու քաղաքական կողմնորոշումներից բխած գործունեության ազատությունը։

Այս օրակարգով մենք մտադիր ենք մեկնարկել քաղաքական խորհրդակցություններ ՀՀ ընդդիմադիր դաշտում գործող բոլոր դերակատարների հետ: