«Մի քանի խնդիր կա․ առաջինը՝ իրավական ռեժիմը։ Ակնհայտ է՝ իրավական ռեժիմը, որը գործելու է այդ ճանապարհի վրա, տարբերվելու է այն իրավական ռեժիմից, որը գործում է օրինակ Մ-1 միջպետական մայրուղու վրա։ Դա արդեն միջանցք է։ Դրա վրա ՀՀ-ն ունի ինքնիշխանության սահմանափակում»,- լրագրողների հետ ճեպազրույցում այսպիսի մտահոգություն հայտնեց ՀՅԴ անդամ, «Հայաստան» խմբակցության պատգամավոր Արթուր Խաչատրյանը՝ անդրադառնալով Թրամփի ուղի՝ հանուն միջազգային խաղաղության և բարգավաճման» (ԹՐԻՓՓ) նախագծի` Հայաստան-ԱՄՆ իրականացման շրջանակի հրապարակման վերաբերյալ համատեղ հայտարարությանը։

Մյուս կողմից՝ պատգամավորը նշեց, որ իրանական կողմն ունի լուրջ մտավախություններ, որ շինարարության պատրվակի տակ նաև կարող են այլ ուժեր տեղակայվել․ «Դա ՀՀ-ի համար լուրջ խնդիրներ կարող է ստեղծել։ Մենք որ ասում էինք՝ թռի-վռի բաներ եք անում դեռ 2021-ին, երբ ասում էին՝ ի՞նչ կա՝ ռուսները թող Ղարաբաղում լինեն, իսկ Սոթք-Խոզնավարում թող այլ երկրներ լինեն, դա իրականում ՀՀ-ն կարող է դարձնել տիտանների մարտադաշտ, իսկ դա ՀՀ-ի համար լուրջ գլխացավանք կարող է լինել»։

Լրագրողների դիտարկմանը՝ ՀՀ իշխանություններն ասում են, որ ստորագրված փաստաթղթով էլ հավաստվում է, որ ՀՀ-ն է վերահսկելու իր տարածքով անցնող ճանապարհը, այսինքն՝ ինքնիշխանությունը պահպանվելու է ՀՀ-ի, Արթուր Խաչատրյանն արձագանքեց․ «Այս տեքստը, որ կարդում եք, երևում է, չէ՞, որ գրված է եղել, հետո մի բան ավելացվել է․ ամենայն հավանականությամբ ինքնիշխանությունը հենց այն է, ինչ ՀՀ-ն գրել է։ Գործելու է այլ իրավական ռեժիմ, որը ՀՀ-ի ինքնիշխանության սահմանափակում է ենթադրում։ Մնացած հարցերը դրանից են բխում։

Նախնական փաստաթղթում օգտագործվում է անխոչընդոտ անցման իրավունք։ Դա ի՞նչ է․ եթե որևէ բելգիացի ուզում է Բագրատաշենից իր մեքենայով մտնել ՀՀ, ինքը մի գործառույթով, մի կարգավորմամբ է անցնելու, իսկ ադրբեջանցին, որը ուզում է Ադրբեջանից մտնել ՀՀ և գնալ, Նախիջևանով դուրս գալ, այլ գործառույթով է անցնելու։ Ակնհայտ է, որ ադրբեջանցին ավելի մեղմ ընթացակարգերով է անցնելու․ դա չի՞ նշանակում ինքնիշխանության նվազեցում, ըստ իս՝ ենթադրում է։ Փոխադարձության սկզբունքը չի պահպանվում և ընդհանրապես չի պահպանվել։ Փոխադարձություն գոնե այս թղթով, որ TRIPP-ին է վերաբերվում, մենք չենք տեսնում։ Ադրբեջանն ի՞նչ անցում է տալիս ՀՀ-ին․ գոնե այս թղթով չկա այդ հարցը, հետևաբար ՀՀ-ի նույնիսկ ներքին ապաշրջափակումը Սյունիքից Արարատի մարզ՝ նվազագույն հարցը, չի լուծվում սրանով»։

Ճեպազրույցն ամբողջությամբ՝ տեսանյութում