Արամ Ա․ վեհափառ հայրապետը այսօր՝ 17 յունուարի առաւօտուն ընդունեց ՀՅԴ Լիբանանի Կեդրոնական կոմիտէի կազմը՝ գլխաւորութեամբ Կեդրոնական կոմիտէի ներկայացուցիչ Ալպեր Պալապանեանի։

Ա. Պալապանեան կաթողիկոսին փոխանցեց զեկուցում, յատկապէս լիբանանահայութեան վերաբերող հիմնական խնդիրներուն ընդառաջ մշակուած ծրագիրներուն եւ կատարուած աշխատանքներուն մասին։

Վեհափառը գնահատեց տարուող աշխատաքները եւ շեշտեց յատկապէս երկրի դիմագրաւած ճգնաժամային ներկայ պայմաններուն մէջ համախմբուած աշխատելու եւ լիբանանահայ բոլոր կառոյցներուն միջեւ համագործակցութիւնը ընդլայնելու հրամայականը։

Այնուհետեւ Կեդրոնական կոմիտէի անդամները կաթողիկոսին հետ արծարծեցին Հայաստանի, սփիւռքի, Հայ եկեղեցւոյ դիմագրաւած մերօրեայ խնդիրները՝ վերաշեշտելով լիբանանահայութեան ունեցած եւ ունենալիք հիմնական դերը՝ համահայկական մեր առաջադրանքներու հետապնդման մէջ։