ՀՅԴ անդամ, «Հայաստան» խմբակցության պատգամավոր Արծվիկ Մինասյանը խորհրդարանում լրագրողների հետ ճեպազրույցում անդրադարձավ ԱԺ արտահերթ նիստ հրավիրելու նախաձեռնությանը, որի օրակարգում ՔՊ-ական պատգամավորների մշակած «Ընտրական օրենսգրքում» փոփոխություններ եւ լրացումներ կատարելու նախագիծն է:

Խորհրդարանն այսօր առաջին ընթերցմամբ ընդունեց դիտորդական առաքելությունների գործունեությունը խստացնող նախագիծը։ «Մենք էլ ենք անակնկալի եկել, որովհետեւ ընդամենը երեկ երեկոյան ԱԺ կայքում տեղադրվեց ծանուցում այն մասին, որ խորհուրդն այսօր ժամը 11-ին հրավիրում է նիստ՝ քննարկելու պատգամավորների նախաձեռնությամբ ԱԺ արտահերթ նիստ հրավիրելու հարցը։ Սա հերթական անգամ իշխանության լկտի ու զոռբա պահվածքի օրինակներից մեկն է»,- ասաց նա։

Արծվիկ Մինասյանն ասաց, որ ՔՊ-ական պատգամավորների հեղինակած նախագիծն ընդամենը երեկ է դրվել շրջանառության մեջ։ Նա նշեց, որ այսօր ինքն ու խմբակցության ղեկավար Սեյրան Օհանյանը մասնակցել են խորհրդի նիստին, ներկայացրել են, որ չի կարելի նման կարեւոր հարցն այսպիսի այլանդակ արագությամբ բերել օրակարգ՝ առանց պատշաճ քննարկման։

«Դիտորդական առաքելություն իրականացնողներին, հատկապես նրանց, ովքեր վերջին ՏԻՄ ընտրություններում անաչառ գնահատականներ են հնչեցրել, այս մարդկանց ընդհանրապես չեն ծանուցել, նրանց հետ նախագիծը չի քննարկվել, չի քննարկվել նաեւ ընդդիմության ու հասարակական սեկտորի այն ներկայացուցիչների հետ, որոնք իշխանության սրտի ներկայացուցիչները չեն։ Չի քննարկվել նաեւ միջազգային կառույցների ներկայացուցիչների հետ, ինչպիսիք են Վենետիկ, ԺՀՄԻԳ համակարգերը։ Եվ բերել են այս նախագիծը։ Նախագիծը բովանդակային առումով կարող է բնութագրվել որպես իշխանական դիտորդական առաքելությունների ձեւավորման նախագիծ։ Զրկելու են բոլոր այն մարդկանց, ովքեր դիտորդական առաքելության կարգավիճակ են ստացել եւ նրանց գնահատականները, խոսքերը այս կամ քաղաքական ուժին ուղղված քննադատություն են պարունակում, որը քարոզչություն կամ հակաքարոզչություն իրականացնելու տակ են իրենք ներկայացնում»,- ասաց Մինասյանը։

Նրա խոսքով՝ գործ ունենք հերթական արշավանքի հետ, որը կազմակերպել է բռնապետը՝ իր չակերտավոր ընտրությունը լեգիտիմացնելու փորձի շրջանակներում։ «Դրա համար մենք հրաժարվեցինք քննարկումից, որովհետեւ սա համարվում է, ըստ էության, ընտրական օրենսդրության ընդունման կանոնների խախտում, եթե ընդդիմությունը չի մասնակցում ու ներգրավված չի եղել փոփոխություններին։ Սա նաեւ նախազգուշացում է, որ ապագայում էլ նման բաներ չլինեն, սա հնարավորինս արագ պետք է շտկվի։ Թե ինչպիսի գործողություններ առաջիկայում կլինեն, մենք լրացուցիչ կքննարկենք ու կասենք»,- նշեց Արծվիկ Մինասյանը։

Նա ասաց, որ ԱԺ մեծամասնության կողմից իրականացված նախորդ փոփոխությունների շրջանակներում շատ լուրջ խնդիր կա նաեւ լրատվամիջոցների համար։ Նույն պահանջների ներքո լրատվամիջոցները կարող են զրկվել հավատարմագրումից․ «Օրինակ՝ լրագրողը կարող է գնալ ու բացահայտել, որ մեկն այլանդակություն է անում, կարող են որակել այնպես, որ լրագրողը զբաղված է հակաքարոզչությամբ։ Այսինքն՝ մենք գործ ունենք տոտալ վերահսկողության փորձի հետ»։

Ըստ Մինասյանի՝ իշխանությունները մաքսիմալ ձեւով այլանդակում են ընտրական ամբողջ գործընթացը եւ դարձնում բացառապես իշխանական վերահսկողությանը ենթակա ընտրություններ։ Միջազգային կառույցներն էլ ընդամենը քաղցր խոսքեր են լսում ՀՀ իշխանությունների կողմից կամ ուզում են լսել այդպիսի խոսքեր եւ ձայն չեն հանում։ «Բայց մենք պետք է այս ամենը բարձրաձայնենք, եւ կոչ եմ անում նաեւ տեղական դիտորդական առաքելություն իրականացնող ՀԿ-ներին, լրատվամիջոցներին՝ ձեր բողոքի ձայնը բարձրացրեք հանրության առաջ։ Մենք ինքներս էլ ենք դիմելու եւ պատրաստ ենք համագործակցել, որպեսզի իշխանական այս այլանդակությունները փորձենք զսպել»,- հավելեց նա։

Մանրամասները՝ տեսանյութում